ពលរដ្ឋថៃ បានរារាំងក្រុមសកម្មជនថៃមួយក្រុម កុំឲ្យមានការរំខានដល់តំបន់ព្រំដែនកម្ពុជា-ថៃ

ជាតិ

នយោបាយជាតិ

ពលរដ្ឋថៃ បានរារាំងក្រុមសកម្មជនថៃមួយក្រុម កុំឲ្យមានការរំខានដល់តំបន់ព្រំដែនកម្ពុជា-ថៃ

31, Mar 2017 , 9:20 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ប្រជាពលរដ្ឋថៃ ដែលរស់នៅខេត្ត Buri Ram បាននាំគ្នារារាំងក្រុមសកម្មជនថៃមួយក្រុម កុំឲ្យមករំខានដល់តំបន់ព្រំដែនកម្ពុជា-ថៃ។ ក្រុមសកម្មជនប្រឆាំងអំពើពុករលួយថៃ ត្រូវពលរដ្ឋរារាំងនេះ បាននាំគ្នាធ្វើដំណើរទៅត្រួតពិនិត្យមើលការសាងសងកាស៊ីណូមួយកន្លែង ក្នុងតំបន់ព្រំដែនប្រទេសទាំងពីរ។

ក្រុមសកម្មជនថៃ ដែលដឹកនាំដោយលោក Veera Somkwamkid នោះត្រូវបានអាជីវករ និងពលរដ្ឋថៃជាច្រើននាក់ រារាំងដំណើរពួកគេមិនចូលមក ត្រួតពិនិត្យមើលការសាងសង់កាស៊ីណូ តាមព្រំដែនកម្ពុជា-ថៃ ឡើយ។ មូលហេតុដែលពលរដ្ឋថៃ រារាំងក្រុមសកម្មជនទាំងនោះ ដោយសារតែពួកគេបារម្ភពីភាពអសន្តិសុខតាមព្រំដែន ដែលអាចបង្កឡើងដោយក្រុមសកម្មជនថៃទាំងនេះ។

សារព័ត៌មានបាងកកប៉ុស្តិ៍ ដែលបានស្រង់សម្តីប្រជាពលរដ្ឋថៃ បាននិយាយថា៖«ពួកគេចង់ឲ្យក្រុមសកម្មជនរបស់លោក Veera បញ្ឈប់សកម្មអធិការកិច្ចស៊ើបអង្កេតរបស់គេទៅ។ ព្រោះពួកគេមិនចង់ឃើញសកម្មភាពច្របូកច្របល់របស់ក្រុមសកម្មជនទាំងនោះ បង្កឲ្យមានជម្លោះព្រំដែន ជាមួយប្រទេសជិតខាងកម្ពុជានោះទេ។ ពួកគេមិនចង់រត់ និងលាក់ខ្លួនដោយសារតែការបាញ់គ្នាទៅវិញទៅមករវាងទាហានកម្ពុជា និងទាហានថៃនោះឡើយ»។

សកម្មជនប្រឆាំងអំពើពុករលួយលោក Veera Somkwamkid ខាងលើនេះ ធ្លាប់បានឆ្លងដែនចូលមកប្រទេសកម្ពុជាបង្កបញ្ហាម្ដងហើយ កាលពីឆ្នាំ២០១១។ កាលណោះលោក Veera និងបក្ខពួកគេចំនួន៦នាក់ទៀត ត្រូវបានអាជ្ញាធរខ្មែរចាប់ខ្លួន ហើយត្រូវតុលាការខ្មែរកាត់ទោសឲ្យជាប់ពន្ធនាគារ៨ឆ្នាំ លបចូលនិងស៊ើបការណ៍សម្ងាត់ក្នុងទឹកដីកម្ពុជាខុសច្បាប់។

តែយ៉ាងណាសកម្មជនប្រឆាំងអំពើពុករលួយថៃ លោក Veera Somkwamkid បាននិយាយថា មូលហេតុដែលក្រុមរបស់ពួកគេ ចង់មកត្រួតពិនិត្យគម្រោងសាងសងកាស៊ីណូ នៅជាប់ព្រំដែនកម្ពុជា-ថៃ ដើម្បីឲ្យបានដឹងច្បាស់ថា តើកាស៊ីណូនេះ សាងសងក្នុងទឹកដីថៃ ឬក្នុងទឹកដីកម្ពុជាប៉ុណ្ណោះ។ បើតាមលោក Veera ពលរដ្ឋថៃមួយចំនួន មិនចង់ឲ្យមានការសាងសង់កាស៊ីណូនៅលើទឹកដីថៃ តាមខ្សែបន្ទាត់ព្រំដែនកម្ពុជា-ថៃ នោះដែរ។ ហើយលោកមិនជឿថា កាស៊ីណូនឹងសាងសងនៅក្នុងទឹកដីកម្ពុជា ដូចការលើកឡើងរបស់ឧបនាយករដ្ឋមន្ត្រីថៃ Prawit Wongsuwon នោះទេ។

លោក Veera ដែលបានទទួលការពាក្យបណ្ដឹងរបស់ពលរដ្ឋថៃ ដែលរស់នៅតំបន់សាងសងកាស៊ីណូជាប់ព្រំដែននោះ បានអះអាងថា បើការសាងសងកាស៊ីណូនេះ នៅក្នុងទឹកដីថៃមែននោះ វានឹងបង្កឲ្យមានការប៉ះពាល់ដល់អធិបតេយ្យភាពប្រទេសថៃ។

ការសាងសងកាស៊ីណូមួយកន្លែង នៅតាមព្រំដែនកម្ពុជា-ថៃ នោះ គឺស្ថិតនៅក្នុងគម្រោងនៅឡើយទេ។ ហើយគម្រោងនេះនឹងចាប់ផ្ដើមដំណើការនៅថ្ងៃទី០៧ ខែមេសា ខាងមុខ។ តែយ៉ាងណារដ្ឋមន្ត្រីការពារជាតិលោក Prawit បាននិយាយថា គម្រោងសាងសងកាស៊ីណូនេះ គឺមិនមានក្នុងទឹកដីថៃទេ។ ហើយបើមានការសាងសងមែននោះ លោកនឹងបញ្ជាឲ្យវាយកម្ទេចចោលវិញ៕