លោក James Corden ពិធីករអង់គ្លេសដ៏ល្បីល្បាញ បានលើកយកកម្មវិធី Late Late Show របស់ខ្លួន ដើម្បីរិះគន់រូបសំណាកខ្សែប្រយុទ្ធអន្តរជាតិព័រទុយហ្គាល់ Cristiano Ronaldo ដែលត្រូវដាក់តាំងនៅអាកាសយានដ្ឋាន Madeira ក្នុងក្រុង Funchal ប្រទេសព័រទុយហ្គាល់។ ការតាំងរូបសំណាកនៅពេលនោះ ធ្វើឡើងដើម្បីសម្ពោធឈ្មោះអាកាសដ្ឋានដែលប្តូរពី Madeira ទៅជា Cristiano Ronaldo Airport។
ក្នុងកម្មវិធី Late Late Show ពិធីករកំប្លែង លោក James Corden បាននិយាយចំអកថា រូបសំណាកតារាបាល់ទាត់ពិភពលោក Cristiano Ronaldo នៅអាកាសយានដ្ឋាន Madeira ដែលមានឈ្មោះថ្មីថា Cristiano Ronaldo Airport មើលទៅមានស្នាមជ្រួញដូចមុខ អតីតកីឡាករឆ្នើមជម្រើសជាតិអង់គ្លេស David Beckham ហើយផ្ទៃមុខទាំងមូលមានទម្រង់ដូចតារាភាពយន្តជើងចាស់អាមេរិក លោក Gary Busey។
អាកាសយានដ្ឋាន Madeira ដែលស្ថិតនៅលើកោះ Madeira ក្នុងទីក្រុង Funchal ប្រទេសព័រទុយហ្គាល់ ត្រូវបានប្តូរឈ្មោះទៅជា Cristiano Ronaldo វិញដើម្បីជាការអរគុណដល់តារាឆ្នើមរូបនេះដែលបានជួយឲ្យក្រុមកីឡាបាល់ទាត់ជម្រើសជាតិព័រទុយហ្គាល់ឈ្នះពាន Euro កាលពីឆ្នាំ២០១៦នៅប្រទេសបារាំង។
ក្នុងពិធីសម្ពោធប្តូរឈ្មោះនោះ ក៏មានការបង្ហាញរូបសំណាកថ្មីមួយ របស់ខ្សែប្រយុទ្ធវ័យ៣២ឆ្នាំនេះ រួមទាំងមានការចូលរួមពីប្រធានាធិបតី និងនាយករដ្ឋមន្ត្រីព័រទុយហ្គាល់ផងដែរ។ ប៉ុន្តែរូបសំណាកមួយកំណាត់ខ្លួន របស់ខ្សែប្រយុទ្ធមុតស្រួច Real Madrid នេះ ក៏ត្រូវបានអ្នកគាំទ្របាល់ទាត់ជាច្រើនរិះគន់នៅតាមបណ្តាញសង្គម ថាមិនដូច Ronaldo ទាល់តែសោះ ហើយចាត់ទុកថានេះជារូបដ៏អាក្រក់មិនធ្លាប់មានរបស់គេផងដែរ។