រដ្ឋបាលត្រាំ ប្រកាសច្បាស់ថា ខ្លួនឈប់ប៉ងទម្លាក់លោក អាសាដ ពីតំណែងទៀតហើយ

អន្តរជាតិ

រដ្ឋបាលត្រាំ ប្រកាសច្បាស់ថា ខ្លួនឈប់ប៉ងទម្លាក់លោក អាសាដ ពីតំណែងទៀតហើយ

31, Mar 2017 , 8:19 pm

រូបភាព

ដោយ: ថ្មីៗ

រដ្ឋបាលលោក ដូណាល់ ត្រាំ បានបង្ហាញជំហរជាក់ច្បាស់ហើយចំពោះការដោះស្រាយបញ្ហាស៊ីរីដោយខ្លួននឹងបញ្ចប់ការប៉ុនប៉ងទម្លាក់មេដឹកនាំស៊ីរី បាសា អាល់អាសាដ ពីតំណែងទៀតហើយ។ រដ្ឋមន្ត្រីការបរទេសអាមេរិកបានបញ្ជាក់ពេញមាត់ថា «អនាគតរបស់លោក អាសាដ»នឹងត្រូវសម្រេចដោយប្រជាជនស៊ីរី។

ក្រោយរង់ចាំអស់យូរគ្រាន់បើ គេទើបអាចដឹងច្បាស់ពីគោលនយោបាយរបស់រដ្ឋបាលលោ ដូណាល់ ត្រាំ ចំពោះសង្គ្រាមស៊ីវិលស៊ីរី។ នោះគឺក្រុងវ៉ាស៊ីនតោនឈប់ប៉ុនប៉ងទម្លាក់លោក បាសា អាល់អាសាដ ពីតំណែងទៀតហើយ។ ការប្តូរគោលនយោបាយរបស់ក្រុងវ៉ាស៊ីនតោននេះប្រៀបដូចជាសំពងក្រុមឧទ្ទាមមួយព្រនង់ដូច្នេះដែរ។

ក្នុងសន្និសីទសារព័ត៌មានជាមួយរដ្ឋមន្ត្រីការបរទេសតួកគី Mevlut Cavusoglu លោក Rex Tillerson បានថ្លែងប្រាប់អ្នកសារព័ត៌មានថា អនាគតរបស់លោក បាសា អាល់អាសាដ នឹងត្រូវសម្រេចដោយប្រជាជនស៊ីរីមិនមែនអ្នកក្រៅឡើយ។

យោងតាមទីភ្នាក់ងារព័ត៌មាន AFP លោក Tillerson បានបញ្ជាក់ដូច្នេះ៖«ខ្ញុំគិតថា តួនាទីរយៈពេលវែងរបស់ប្រធានាធិបតី អាសាដ នឹងត្រូវសម្រេចដោយប្រជាជនស៊ីរី»។
តាមអ្វីដែលប្រមុខការទូតអាមេរិកបានលើកឡើង វាហាក់ដូចជាស្របជាមួយអ្វីដែលរុស្ស៊ីធ្លាប់ទាមទារកន្លងមកដែរ។ រុស្ស៊ីប្រកាសថា ខ្លួនចង់ឃើញ អនាគតមេដឹកនាំស៊ីរី អាសាដ នឹងត្រូវសម្រេចដោយប្រជាជនស៊ីរីតាមសន្លឹកឆ្នោត មិនមែនដោយអ្នកក្រៅលូកដៃចូលទេ។

តាមពិតទៅ ក្នុងអាណត្តិលោក បារ៉ាក់ អូបាម៉ា ការទម្លាក់លោក អាសាដ ចេញពីតំណែងជាចំណុចស្នូលនៃគោលនយោបាយរបស់លោក ប៉ុន្តែលោក ដូណាល់ ត្រាំ វិញកំណត់យកការកម្ចាត់ភេរវកម្មជាពិសេសក្រុមរដ្ឋឥស្លាមជារឿងអាទិភាព។ បច្ចុប្បន្ននេះកងទ័ពអាមេរិកនិងកងកម្លាំងក្រុមឧទ្ទាមដែលអាមេរិកគាំទ្រកំពុងប្រឹងប្រែងបង្កើនការវាយប្រហារលើក្រុមភេរវជនរដ្ឋឥស្លាមនៅក្រុង Raqa ផងដែរ។

ក្នុងពេលឃោសនាបោះឆ្នោតលោក ដូណាល់ ត្រាំ ធ្លាប់ប្រកាសដែរថា ពេលលោកជាប់ឆ្នោតលោកនឹងបញ្ចប់«នយោបាយផ្លាស់ប្តូររបបដឹកនាំ »និង «នយោបាយសាងសង់រដ្ឋ»ផងដែរ ហើយមិនត្រឹមតែប៉ុណ្ណោះទេលោកក៏សន្យាបញ្ចប់ការផ្តល់ជំនួយដល់ក្រុមឧទ្ទាមស៊ីរីទៀត។

ត្រឡប់មកវិញ ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley នាថ្ងៃព្រហស្បតិ៍ក៏បានលើកឡើងស្រដៀងគ្នាថា រឿងអាទិភាពសម្រាប់អាមេរិកបច្ចុប្បន្នលែងជាការតាមបណ្តេញអាសាដ ពីតំណែងហើយ។ លោកស្រីបានបញ្ជាក់ដូច្នេះថា៖« រឿងអាទិភាពរបស់យើងគឺលែងអង្គុយរង់ចាំទម្លាក់អាសាដពីតំណែងហើយ។ រឿងអាទិភាពសម្រាប់យើងគឺត្រូវប្រឹងប្រែងរកដំណោះស្រាយ និងកំណត់ថាអ្នកណាយើងត្រូវសហការជាមួយដើម្បីផ្លាស់ប្តូរជីវិតប្រជាជនស៊ីរី»។

ការប្រកាសបែបនេះរបស់មន្ត្រីជាន់ខ្ពស់អាមេរិកអាចបញ្ជាក់កាន់តែច្បាស់ហើយថា គោលនយោបាយអាមេរិកផ្លាស់ប្តូរ ១០០ភាគរយចំពោះរបបដឹកនាំស៊ីរី ហើយលទ្ធភាពនៃការឈានទៅសហការគ្នារវាងរដ្ឋាភិបាលក្រុងវ៉ាស៊ីនតោននិងក្រុងដាម៉ាសដើម្បីកម្ចាត់ភេរវកម្មក៏កើនឡើងខ្ពស់ដូចគ្នា៕