អន្តរជាតិ
នុយក្លេអ៊ែរកូរ៉េខាងជើង៖ អាមេរិកប្រាប់ចិន បញ្ចេញសកម្មភាពខ្លះផង កុំបានតែមាត់ អគ្គរដ្ឋទូតអាមេរិកប្រចាំអង្គការសហប្រជាជាតិ Nikki Haley ក្នុងពេលបទសម្ភាសជាមួយក្រុមប្រឹក្សាទំនាក់ទំនងការបរទេស(រូបភាពហ្វេសប៊ុក Nikki Haley)
× អគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley នៅថ្ងៃទី៣០ ខែមីនា បានរិះគន់ចិន ដែលមិនសូវធ្វើអ្វីសោះក្នុងការបញ្ឈប់មហិច្ឆតានុយក្លេអ៊ែរកូរ៉េខាងជើង។ លោកស្រី បានស្នើឲ្យចិនធ្វើសកម្មភាពបន្ថែមទៀត ដើម្បីបង្ខំឲ្យកូរ៉េខាងជើងបោះបង់កម្មវិធីនុយក្លេអ៊ែររបស់ខ្លួន មិនមែនបានត្រឹមនិយាយឲ្យរួចពីមាត់ តែមិនធ្វើអ្វីជាដុំកំភួនទេ។ ម្យ៉ាងទៀត អាមេរិក ក៏អស់ការអត់ធ្មត់លើទង្វើព្រហើនមិនរអាចិត្តរបស់កូរ៉េខាងជើងទៀតហើយ។
តំណាងអាមេរិកប្រចាំអង្គការសហប្រជាជាតិ Nikki Haley និយាយថា ចិន គួរតែ និងត្រូវតែធ្វើសកម្មភាពឲ្យច្រើនថែមទៀត ដើម្បីរារាំងកូរ៉េខាងជើងពីការសាកល្បងមីស៊ីល និងបន្តកម្មវិធីនុយក្លេអ៊ែរ។ នេះ ក៏ព្រោះតែចិនត្រូវបានចាត់ទុកជាបងធំរបស់កូរ៉េខាងជើង និងតែងជួយទំនុកបម្រុងរដ្ឋឯកោមួយនេះរហូតមក។ ប៉ុន្តែចិនមិនសូវជាធ្វើសកម្មភាពខ្លាំងក្លាប្រឆាំងកូរ៉េខាងជើង ដែលធ្វើឲ្យអាមេរិកមិនសូវសប្បាយចិត្តទេ។
លោកស្រី Haley ចង់ឲ្យចិនជួយទប់ស្កាត់កូរ៉េខាងជើងផង ព្រោះគ្រប់គ្នាសុទ្ធតែដឹងថា ចិនមានសមត្ថភាពធ្វើរឿងនេះបាន ខណៈលោកស្រីប្រកាសថា អាមេរិកអស់ការអត់ទ្រាំនឹងកូរ៉េខាងជើងទៀតហើយ។ អស់ការអត់ធ្មត់ ក៏ព្រោះកូរ៉េខាងជើងលែងស្ដាប់អ្នកណាទាំងអស់ និងបែរជាបាញ់មីស៊ីលញឹកញាប់ ផ្គើនគេឯងទៀតផង ហើយថ្មីៗនេះទៀត កូរ៉េខាងជើងក៏កំពុងរៀបចំផែនការបាញ់មីស៊ីលម្ដងទៀត។
ជាមួយនឹងសកម្មភាពព្រហើនមិនខ្លាចចិត្តនេះ ក្រុងវ៉ាស៊ីនតោន ក៏បានប្រាប់ឲ្យក្រុងប៉េកាំងឲ្យ ដាក់សម្ពាធបន្ថែមទៀតលើក្រុងព្យុងយ៉ាង។ តាមពិតទៅ ក្រុងប៉េកាំង ក៏ព្យាយាមដាក់ទណ្ឌកម្មលើសម្ព័ន្ធមិត្តរបស់ខ្លួនដែរដូចជាការប្រកាសហាមឃាត់ការនាំចូលធ្យូងថ្មជាដើម។ ប៉ុន្តែគេនៅតែសង្កេតឃើញមានការនាំចូលធ្យូងថ្មពីកូរ៉េខាងជើងដដែល ហើយរឿងនេះត្រូវបានលោកស្រី Haley លើកឡើងថា ចិនមិនមានជំហរដាច់ខាតប្រឆាំងកូរ៉េខាងជើងសោះ។
អគ្គរដ្ឋទូតអាមេរិករូបនេះ បាននិយាយបែបឌឺដងថា ចិនតែងនិយាយពីការព្រួយបារម្ភរបស់ខ្លួនលើបញ្ហាកូរ៉េខាងជើង ហើយចិនផ្ទាល់ក៏ចង់ឃើញកូរ៉េខាងជើងលែងសាកល្បងមីស៊ីលទៀតដែរ។ អ៊ីចឹងហើយលោកស្រីចង់ឲ្យចិនបង្ហាញថា ចិនពិតជាព្រួយបារម្ភមែន និងត្រូវធ្វើសកម្មភាពពិតប្រាកដ មិនមែនបានតែនិយាយទេ។
បើតាមទីភ្នាក់ងារព័ត៌មាន AFP ប្រធានបទកូរ៉េខាងជើងនេះ ក៏ទំនងជាបញ្ហាក្ដៅដែលប្រធានាធិបតី ដូណាល់ ត្រាំ អាចលើកឡើងក្នុងជំនួបជាមួយប្រធានាធិបតីចិន ស៊ី ជិនពីង ផងដែរ។ ប្រធានាធិបតីចិន នឹងទស្សនកិច្ចនៅអាមេរិកចាប់ពីថ្ងៃទី៦ ដល់ថ្ងៃទី៧ ខែមីនា និងជួបលោក ត្រាំ ជាលើកទី១ នៅ Mar-a-Lago ។ ជាជំនួបនិយាយពីអនាគតនៃទំនាក់ទំនងទ្វេភាគី មេដឹកនាំមហាអំណាចទាំង២ ទំនងជាជជែកពិភាក្សាបញ្ហារសើបជាច្រើនផ្សេងទៀតដូចជាពាណិជ្ជកម្ម និងបញ្ហាតៃវ៉ាន់ផងដែរ៕
Tag:
កូរ៉េខាងជើង
អាមេរិក
ចិន
នុយក្លេអ៊ែរ
© រក្សាសិទ្ធិដោយ thmeythmey.com