អន្តរជាតិ
ពូទីន ព្រមានថា កម្លាំងនយោបាយអាមេរិកអាចរុញឲ្យមហាអំណាចទាំងពីរធ្លាក់ក្នុងស្ថានភាពគ្រោះថ្នាក់ដូច«វិបត្តិមីស៊ីលគុយបា»
× ក្នុងវេទិកាអន្តរជាតិអាកទិកនៅរុស្ស៊ី លោក វ្ល៉ាឌីមៀ ពូទីន បដិសេធដាច់អហង្ការចំពោះការចោទប្រកាន់របស់អាមេរិកថា លោកជាអ្នកបញ្ជាឲ្យគេលូកលាន់ក្នុងការបោះឆ្នោតប្រធានាធិបតីអាមេរិកកាលពីឆ្នាំមុន។ លោកព្រមានផងដែរថា ចលនានយោបាយអាមេរិកកំពុងបង្កើតកំហុសថ្មីដោយប្រឹងរុញច្រានឲ្យទំនាក់ទំនងរុស្ស៊ីនិងអាមេរិកធ្លាក់ចូលក្នុងដានប្រវត្តិសាស្ត្រស្រដៀងគ្នានឹងស្ថានភាពវិបត្តិមីស៊ីលគុយបាទសវត្សរ៍ឆ្នាំ ១៩៦០។
«ទេ»ក្នុងសំនៀងជាភាសាអង់គ្លេសរបស់ប្រធានាធិបតីរុស្ស៊ី វ្ល៉ាឌីមៀ ពូទីន បានធ្វើឲ្យគ្រប់គ្នាលាន់មាត់ហ៊ោរកញ្ជៀវក្នុងវេទិកាអន្តរជាតិអាកទិកដែលរៀបចំឡើងនៅទីក្រុងរបស់រុស្ស៊ី។
បើតាមវីដេអូបង្ហោះដោយសារព័ត៌មាន RT ពាក្យថា«ទេ»នេះគឺចម្លើយដ៏ខ្លីរបស់លោកឆ្លើយតប នឹងសំណួរថាតើលោកនិងរដ្ឋាភិបាលរុស្ស៊ីពិតជាបានលូកលាន់ចូលក្នុងការបោះឆ្នោតប្រធានាធិបតីអាមេរិកឬអត់?។ លោក ពូទីន បាននិយាយជាភាសារុស្ស៊ីថា៖«មើលមាត់ខ្ញុំណា!» ហើយសង្កត់សំឡេងដោយឆ្លើយថា«ទេ» ជាភាសាអង់គ្លេសតែម្តង។
រឿងអាស្រូវពាក់ព័ន្ធរុស្ស៊ីលូកលាន់ក្នុងការបោះឆ្នោតអាមេរិកនៅតែជារឿងចម្រូងចម្រាសខ្លាំងនៅក្នុងបរិបទនយោបាយអាមេរិក ថ្វីបើគេដឹងថាលោក ដូណាល់ ត្រាំជាប់ឆ្នោតក៏ដោយ។បណ្តាក្រុមភ្នាក់ងារចារកម្មរុស្ស៊ីជឿជាក់ថា រុស្ស៊ីពិតជាបានលូកលាន់ការបោះឆ្នោតអាមេរិក និងជួយឲ្យលោក ដូណាល់ ត្រាំ ជាប់ឆ្នោតផង។ ប៉ុន្តែការស៊ើបអង្កេតរបស់សភាពាក់ព័ន្ធការចោទប្រកាន់នេះក្លាយជាសមរមភូមិនយោបាយរវាងបក្សនយោបាយទាំងពីរផង។
ប្រធានាធិបតី ដូណាល់ ត្រាំ និងគណៈរដ្ឋមន្ត្រីរបស់លោកបានបដិសេធការចោទប្រកាន់នេះ ដោយអះអាងថា គ្មានការជ្រៀតជ្រែកពីសំណាក់រុស្ស៊ីចូលក្នុងការបោះឆ្នោតឡើយអាមេរិកឡើយ។ ប៉ុន្តែបញ្ហារុស្ស៊ីនេះបានបង្ខំឲ្យលោក Michael Flynn ទីប្រឹក្សាសន្តិសុខលោក ដូណាល់ ត្រាំ លាលែងពីតំណែងដោយសារលោកបានលួចទាក់ទងមន្ត្រីទូតរុស្ស៊ីប្រចាំអាមេរិកតាំងពីមុនតែងតាំង ប៉ុន្តែលោកកុហក។
យ៉ាងណាក៏ដោយលោក វ្ល៉ាឌីមៀ ពូទីន បានព្រមានផងដែរ នៅពេលដែលទំនាក់ទំនងរវាងអាមេរិកនិងរុស្ស៊ីធ្លាក់ដល់កម្រិតសូន្យដូចបច្ចុប្បន្ន។ ហើយលោកមើលឃើញថា អាមេរិកនៅតែមានចលនានយោបាយដែលរុញច្រានទំនាក់ទំនងរុស្ស៊ីនិងអាមេរិកដែលអាក្រក់ស្រាប់នោះឲ្យធ្លាក់ចូលក្នុងដំណាក់កាលអាក្រក់មួយដូចសម័យវិបត្តិមីស៊ីលនៅគុយបាអំឡុងទសវត្សរ៍ឆ្នាំ ១៩៦០ ដែរ។ លោកពូទីន ក៏ខកចិត្តខ្លាំងដែរចំពោះកាយវិការរបស់រដ្ឋបាលលោក បារ៉ាក់ អូបាម៉ា ចំពោះមន្ត្រីទូតខ្លួនផងដែរ ដូចជាចាត់ទុករាល់សកម្មភាពមន្ត្រីទូតរុស្ស៊ីជាសកម្មភាពចារកម្មផង។
រដ្ឋមន្ត្រីការបរទេសអាមេរិកលោក Rex Tillerson នឹងបំពេញទស្សនកិច្ចទៅកាន់ក្រុងម៉ូស្គូនៅខែមេសា ហើយលោកនឹងជួបជាមួយប្រធានាធិបតីរុស្ស៊ីផងដែរ។ កន្លងមក គេឃើញមានជំនួបជាន់ខ្ពស់រវាងមន្ត្រីប្រទេសទាំងពីរដែរ ដូចជាជំនួបរដ្ឋមន្ត្រីការបរទេសនៅអាល្លឺម៉ង់។ ទាំងនេះ ជាសញ្ញាវិជ្ជមានដែរសម្រាប់ការស្តារចំណងការទូតឡើងវិញនៅពេលខាងមុខរវាងមហាអំណាចទាំងពីរនេះ៕
Tag:
វ្ល៉ាឌីមៀ ពូទីន
ដូណាល់ ត្រាំ
Rex Tillerson
© រក្សាសិទ្ធិដោយ thmeythmey.com