សម្តេច ស ខេង ឯកភាពឲ្យនគរបាលគ្រប់គ្រងបញ្ជីកំណើតកូនជនអន្តោប្រវេសន៍

ជាតិ

សង្គមជាតិ

សម្តេច ស ខេង ឯកភាពឲ្យនគរបាលគ្រប់គ្រងបញ្ជីកំណើតកូនជនអន្តោប្រវេសន៍

31, Mar 2017 , 10:03 pm

រូបភាព

លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍

ដោយ:

ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានឯកភាពឲ្យអគ្គនាយកដ្ឋានចេញសំបុត្របញ្ជាក់កំណើតសញ្ជាតិខ្មែរមួយដោយឡែកសម្រាប់កូនជនអន្តោប្រវេសន៍ ដែលកំពុងរស់នៅក្នុងប្រទេសកម្ពុជា។ នេះបើតាមលោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍។

ថ្លែងក្រោយសន្និបាតបូកសរុបការងាររបស់អគ្គនាយកដ្ឋានអន្តោប្រវេសន៍ នាក្រសួងមហាផ្ទៃ លោក សុខ ផល បានឲ្យដឹងថា លោកមានគោលបំណងស្រាវជ្រាវ និងរៀបចំសំបុត្រកំណើតសម្រាប់កូនជនអន្តោប្រវេសន៍ដែលរស់នៅកម្ពុជាឲ្យត្រឹមត្រូវ។

អគ្គនាយកនៃអគ្គនាយកដ្ឋានអន្តោប្រវេសន៍ បានបញ្ជាក់អ្នកសារព័ត៌មាននៅថ្ងៃទី៣១ ខែមីនានេះថា លោកបានទទួលការឯកភាពពីសម្តេច ស ខេង ដោយផ្ទាល់មាត់រួចរាល់ ហើយលោកនឹងរៀបចំលិខិតលាយលក្ខណ៍អក្សរជាផ្លូវការមួយស្នើសម្ដេចខាងមុខទៀត ដើម្បីគ្រប់គ្រងសំបុត្រកំណើតសម្រាប់កូនជនអន្តោប្រវេសន៍។

«យើងមិនដែលបែងចែកសំបុត្រកំណើតកូនរបស់ជនអន្តោប្រវេសន៍ទេ។ ពួកគេកើតមកដាក់សញ្ជាតិខ្មែរតែម្តង។ មេឃុំចេញសំបុត្រកំណើតនេះ យើងមិនអាចធ្វើចឹងទៀតទេ»។ អគ្គនាយកអន្តោប្រវេសន៍ចាត់ទុកការចេញសំបុត្របែបនេះពិបាកគ្រប់គ្រងជនអន្តោប្រវេសន៍។

គួរជម្រាបថា គិតចាប់តាំងពីឆ្នាំ២០១៤ ដល់ឆ្នាំ២០១៦ អគ្គនាយកដ្ឋានអន្តោប្រវេសន៍បានបណ្តេញជនអន្តោប្រវេសន៍ខុសច្បាប់ប្រមាណ ១ម៉ឺន៣ពាន់នាក់ ក្នុងនោះ ជនជាតិវៀតណាមជាង ៩៨ ភាគរយ៕