ជាតិ
សង្គមជាតិ
លោក មុំ រ៉ាឌី៖«The road in Cambodia is amazing!»
× លោក មុំ រ៉ាឌី ដែលជាសមាជិកសភារដ្ឋ Massachusetts នៃសហរដ្ឋអាមេរិក និងមានដើមកំណើតខ្មែរអ្នកខេត្តតាកែវ បានបង្ហាញភាពភ្ញាក់ផ្អើលខ្លាំងជាវិជ្ជមាននៅចំពោះមុខអ្នកកាសែត អំពីផ្លូវថ្នល់ល្អស្អាត ក្រោយពីលោកបានបញ្ចប់ការធ្វើដំណើរជុំវិញខេត្តទាំង៥ជុំវិញបឹងទន្លេសាប។
សូមស្តាប់ប្រសាសន៍របស់លោក មុំ រ៉ាឌី
នៅក្នុងសន្និសីទកាសែតមួយកាលពីពេលថ្មីៗនេះ លោក មុំ រ៉ាឌី បានរំឮកទាំងអស់សំណើចថា លោកបានគិតថាលោកមិនចង់ធ្វើដំណើរទៅខេត្តសៀមរាបទៀតឡើយ ពីព្រោះកាលពីជាង២ឆ្នាំមុន លោកបានចំណាយពេលជាង៨ម៉ោងដើម្បីធ្វើដំណើរពីភ្នំពេញទៅខេត្តទេសចរណ៍វប្បធម៌របស់ប្រទេសកំណើតមួយនេះ។
កាលពីឆ្នាំ២០១៤ បន្ទាប់ពីលោកបានជាប់ជាសមាជិកសភារដ្ឋ Massachusetts លោក មុំ រ៉ាឌី ដែលបានភៀសខ្លួនចេញពីប្រទេសកំណើតក្នុងរបបប៉ុលពត បានមកទស្សនកិច្ចប្រទេសកំណើតជាលើកដំបូង។ នៅពេលនេះលោក មុំ រ៉ាឌី ទើបបញ្ចប់ទស្សនកិច្ចនៅប្រទេសកម្ពុជាជាលើកទី២ ដែលជាទស្សនកិច្ចឯកជន ដើម្បីបង្កើតសមាគមកីឡាបាល់បោះអាមេរិកកម្ពុជា។ ដោយមានការសម្របសម្រួលពីស្ថានទូតអាមេរិក លោក មុំ រ៉ាឌី បានជួបថ្នាក់ដឹកនាំប្រទេសមួយចំនួន និងមនុស្សសំខាន់ៗជាច្រើនទៀតដែលទាក់ទងនឹងគម្រោងបង្កើតសមាគមកីឡាបាល់បោះអាមេរិកកម្ពុជា។
សូមបញ្ជាក់ផងដែរថា សមាជិកសភាអាមេរិកដើមកំណើតខ្មែរក៏បាននិយាយផងដែរថា លោករីករាយនឹងឃើញការរីកចម្រើនរបស់កម្ពុជា និងសន្តិសុខ។ លោកបានបន្ថែមថា នៅពេលនេះពលរដ្ឋខ្មែរដែលរស់នៅសហរដ្ឋអាមេរិកកាន់តែច្រើនបានមកធ្វើជំនួញ និងមករស់នៅក្នុងប្រទេសកម្ពុជាវិញ។ ហើយថានេះ គឺក៏ព្រោះតែកម្ពុជាមានសន្តិភាព។ នេះជាការអះអាងរបស់លោក មុំ រ៉ាឌី៕
© រក្សាសិទ្ធិដោយ thmeythmey.com