កីឡាជាតិ
ជាតិ
សម្តេច ហ៊ុន សែន សុំទោសចំពោះការពន្យាពេលធ្វើម្ចាស់ផ្ទះស៊ីហ្គេមរហូតដល់ឆ្នាំ២០២៣
× ពីពិធីសម្ពោធដាក់ឲ្យប្រើប្រាស់នូវសមិទ្ធផលមួយចំនួន និងបើកការដ្ឋានសាងសង់កីឡដ្ឋានធំនៃពហុកីឡដ្ឋានជាតិមរតកតេជោ កាលពីព្រឹកថ្ងៃទី៤ ខែមេសា សម្តេចនាយករដ្ឋមន្ត្រី ហ៊ុន សែន បានសុំទោសជាសាធារណៈនៅមុខកីឡាករ គ្រូបង្វឹក និងថ្នាក់ដឹកនាំកីឡា ចំពោះការពន្យាពេលធ្វើជាម្ចាស់ផ្ទះការប្រកួតកីឡាស៊ីហ្គេមរហូតដល់ឆ្នាំ២០២៣។ ការសុំទោសនេះ បន្ទាប់ពីកម្ពុជាបានអាក់ខានក្នុងការធ្វើជាម្ចាស់ផ្ទះជាច្រើនលើក ដោយសារបញ្ហាហេដ្ឋារចនាសម្ព័ន្ធ និងធនធានមនុស្ស។
ក្រោយកម្ពុជាបានអាក់ខានក្នុងការធ្វើជាម្ចាស់ផ្ទះការប្រកួតកីឡាស៊ីហ្គេមជាច្រើនលើកក្នុងទស្សវត្សរ៍៦០, ៩០ និងឆ្នាំ២០០០ កន្លងមក ថ្នាក់ដឹកនាំកម្ពុជាបានសម្រេចទទួលធ្វើជាម្ចាស់ផ្ទះការប្រកួតកីឡាស៊ីហ្គេមសារជាថ្មីនាឆ្នាំ២០២៣ ខាងមុខនេះ។ ការពន្យាពេលរហូតដល់ឆ្នាំ២០២៣ នេះ បានធ្វើឲ្យសម្តេចនាយករដ្ឋមន្ត្រី ហ៊ុន សែន ប្រកាសសុំទោសជាសាធារណៈនៅចំពោះមុខមហាជន ក៏ដូចជាថ្នាក់ដឹកនាំកីឡា គ្រូបង្វឹក និងកីឡាករ ក្នុងពិធីសម្ពោធដាក់ឲ្យប្រើប្រាស់អគារអាងហែលទឹក អគារបណ្ឌលកីឡាក្នុងសាល និងក្រៅសាល និងការបើកការដ្ឋានសាងសង់កីឡដ្ឋានធំនៃពហុកីឡដ្ឋានជាតិមរតកតេជោ កាលពីព្រឹកថ្ងៃទី៤ ខែមេសា។
ពាក់ព័ន្ធទៅនឹងការពន្យាពេលនៃការធ្វើជាម្ចាស់ផ្ទះការប្រកួតកីឡាស៊ីហ្គេមនេះ សម្តេចនាយករដ្ឋមន្ត្រី ហ៊ុន សែន បានបញ្ជាក់ពីមូលហេតុយ៉ាងដូច្នេះថា៖«មូលហេតុដែលមានការពន្យាពេលដូចតែយើងទាំងអស់គ្នាបានដឹងហើយថា ហេដ្ឋារចនាសម្ព័ន្ធ និងធនធានមនុស្សនៃវិស័យកីឡារបស់យើង ត្រូវបានបំផ្លិតបំផ្លាញយ៉ាងខ្លាំង»។
សម្តេចបានបន្ថែមថា៖«ម្យ៉ាងទៀតសេចក្តីត្រូវការរបស់យើងប៉ុន្មានឆ្នាំមុន និងឥឡូវនេះ គឺបញ្ហាទាក់ទាត់នឹងការកសាង និងស្តារអភិវឌ្ឍន៍ឡើងវិញ តម្រូវការថវិការរបស់យើង គឺការកសាងផ្លូវ កសាងស្ពាន ប្រឡាយទឹក មន្ទីរពេទ្យ សាលារៀន ជូនប្រជាជន។ ដូច្នេះហើយ បានជាកម្ពុជាបានស្នើសុំការយោគយល់ពីសំណាក់ដៃគូអាស៊ាននានាថា កម្ពុជាសុំការពន្យាក្នុងការធ្វើជាម្ចាស់ផ្ទះស៊ីហ្គេមនេះ»។
បើតាមរបាយការណ៍ដែលអានដោយ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ការធ្វើជាម្ចាស់ផ្ទះការប្រកួតកីឡាស៊ីហ្គេម គឺតម្រូវឲ្យប្រទេសនៅក្នុងតំបន់អាស៊ានទាំងអស់ត្រូវធ្វើជាម្ចាស់ផ្ទះម្នាក់ម្តងៗក្នុងរយៈពេល២ឆ្នាំ។ ប៉ុន្តែប្រសិនបើប្រទេសណាមួយមិនមានហេដ្ឋារចនាសម្ព័ន្ធ ឬធនធានគ្រប់គ្រាន់អាចស្នើសុំការពន្យាពេលទៅកាន់សមាជិកទាំងអស់បាន៕
Tag:
ស៊ីហ្គេម
សម្តេច ហ៊ុន សែន
ពហុកីឡដ្ឋានជាតិមរតកតេជោ
© រក្សាសិទ្ធិដោយ thmeythmey.com