អន្តរជាតិ
ដូណាល់ ត្រាំ ស្វាគមន៍ប្រធានាធិបតីអេហ្ស៊ីបនៅសេតវិមាន ដោយមិនខ្វល់ការបំពានសិទ្ធិមនុស្ស ប្រធានាធិបតី ដូណាល់ ត្រាំ ចាប់ដៃសមភាគីអេហ្ស៊ីប ស៊ីស៊ី ក្នុងបន្ទប់ពងក្រពើនៃសេតវិមាន (រូបភាព Twitter @POTUS)
× ប្រធានាធិបតីអាមេរិក ដូណាល់ ត្រាំ បានជួបជាមួយប្រធានាធិបតីអេហ្ស៊ីប អាប់ឌែល ហ្វាតា អែលស៊ីស៊ី (Abdel Fattah el-Sisi) នៅឯសេតវិមាននៅថ្ងៃទី៣ ខែមេសា។ លោក ត្រាំ បានទុកស្ថានភាពសិទ្ធិមនុស្សនៅអេហ្ស៊ីបដែលធ្លាក់ចុះដោយឡែក និងបានសរសើរប្រធានាធិបតីស៊ីស៊ី ដែលបំពេញការងារបានយ៉ាងអស្ចារ្យក្នុងគ្រាលំបាកនៃការដឹកនាំប្រទេស។ បន្ថែមពីលើការប្ដេជ្ញាចិត្តពង្រឹងទំនាក់ទំនងទ្វេភាគី លោក ត្រាំ និងលោក ស៊ីស៊ី ក៏បានសន្យាសហការគ្នាដើម្បីប្រយុទ្ធប្រឆាំងភេរវកម្មដែរ។
ប្រមុខរដ្ឋអេហ្ស៊ីបអតីតឧត្តមសេនីយ៍ អាប់ឌែល ហ្វាតា អែលស៊ីស៊ី ត្រូវបានសមភាគីអាមេរិក ដូណាល់ ត្រាំ ទទួលយ៉ាងកក់ក្ដៅនៅឯសេតវិមាន ក្នុងដំណើរទស្សនកិច្ចលើកទី១ របស់លោកទៅកាន់អាមេរិក។ លោក ត្រាំ បានសរសើរការដឹកនាំរបស់លោក ស៊ីស៊ី ក្នុងន័យស្ដារទំនាក់ទំនងទ្វេភាគីឡើងវិញ បន្ទាប់ពីធ្លាក់ចុះដោយសារការបំពានសិទ្ធិមនុស្សធ្ងន់ធ្ងរនៅអេហ្ស៊ីបដូចជាការបង្ក្រាបបាតុកម្ម ការចាប់ឃុំខ្លួនអ្នកតវ៉ាពីសំណាក់ប៉ូលិសរបស់លោកប្រធានាធិបតី ស៊ីស៊ី ។
ក្នុងជំនួបនេះ ប្រធានាធិបតីអាមេរិកបានប្រាប់សមភាគីអេហ្ស៊ីបថា អាមេរិកនឹងនៅជួយពីក្រោយ និងនៅតែជាសម្ព័ន្ធមិត្តរបស់អេហ្ស៊ីប។ ក្រៅពីលើកសរសើរការដឹកនាំរបស់លោក ស៊ីស៊ី ទាំងស្ថានភាពសិទ្ធិមនុស្សយ៉ាប់យ៉ឺនខ្លាំង លោក ត្រាំ ក៏បាននិយាយដែរថា ទាំងអាមេរិក ទាំងអេហ្ស៊ីប នឹងធ្វើការជាមួយគ្នាដើម្បីបោសសម្អាតក្រុមភេរវកម្មនៅទូទាំងពិភពលោក។
យ៉ាងណាមិញ លោក ត្រាំ បានប្រាប់អ្នកសារព័ត៌មានដែរថា អាមេរិក និងអេហ្ស៊ីប ក៏មានចំណុចខ្លះមិនយល់ស្របគ្នាដែរ។ ប្រធានបទសិទ្ធិមនុស្សនៅតែជារឿងក្ដៅ បើទោះជាលោក ត្រាំ មិនបង្ហាញការព្រួយបារម្ភជាសាធារណៈលើរឿងក៏ដោយ។ បើតាមសារព័ត៌មាន Huffington Post មន្ត្រីរដ្ឋបាលលោក ត្រាំ និយាយថា មេដឹកនាំទាំងពីរពិភាក្សារឿងនេះជាសម្ងាត់។
ទំនាក់ទំនងរវាងអាមេរិក និងអេហ្ស៊ីប រំពឹងថានឹងកាន់តែប្រសើរឡើង បន្ទាប់ពីល្អក់កករខ្លាំងនៅអាណត្តិដឹកនាំរបស់អតីតប្រធានាធិបតី បារ៉ាក់ អូបាម៉ា ។ រដ្ឋបាលលោក អូបាម៉ា បានផ្អាកការផ្ដល់ជំនួយយោធាសម្រាប់អេហ្ស៊ីបក្នុងឆ្នាំ២០១៣ ក្រោយលោក ស៊ីស៊ី ដែលពេលនោះជាប្រមុខកងទ័ពអេហ្ស៊ីបបានធ្វើរដ្ឋប្រហារទម្លាក់ប្រធានាធិបតីជ្រើសរើសតាមការបោះឆ្នោត Mohamed Morsi ។ លោក អូបាម៉ា ក៏រិះគន់ការដឹកនាំរបស់លោក ស៊ីស៊ី ដែលស្ថានភាពសិទ្ធិមនុស្សធ្លាក់ដុនដាបខ្លាំង។
ចាប់តាំងពីរដ្ឋប្រហារឆ្នាំ២០១៣ មកនោះ ប្រជាជនអេហ្ស៊ីបបានងើបឡើងតវ៉ារដ្ឋាភិបាលយោធា តែត្រូវរងការបង្ក្រាប ដែលបណ្ដាលឲ្យមនុស្សច្រើនពាន់នាក់ស្លាប់ និងរបួស ខណៈមនុស្សជាច្រើនម៉ឺននាក់ ត្រូវបានចាប់ខ្លួន ហើយភាគច្រើនជាសមាជិកចលនាភាតរភាពមូស្លីម ដែលលោក ស៊ីស៊ី ចាត់ទុកជាក្រុមភេរវករ និងជាគោលដៅនៃការបោសសម្អាត។ ប៉ុន្តែអាមេរិក នៅតែមិនអាចដកដៃ និងឈប់គាំទ្រអេហ្ស៊ីបឡើយ ដ្បិតអេហ្ស៊ីបជាសម្ព័ន្ធមិត្តយូរអង្វែងរបស់អាមេរិក និងតែងដើរតួនាទីសំខាន់ក្នុងការស្វែងរកសន្តិភាពនៅមជ្ឈិមបូព៌ា៕
Tag:
អាមេរិក
ដូណាល់ ត្រាំ
អេហ្ស៊ីប
Abdel Fattah el-Sisi
© រក្សាសិទ្ធិដោយ thmeythmey.com