អន្តរជាតិ
កូរ៉េខាងជើងបាញ់មីស៊ីលបាលីស្ទិកចម្ងាយមធ្យម ស្វាគមន៍ជំនួបដូណាល់ ត្រាំ-ស៊ី ជីនភីង មីស៊ីលរយៈចម្ងាយមធ្យម Pukguksong-2 ដែលបានបាញ់កាលពីខែកុម្ភៈ។ យោធាអាមេរិកជឿថា មីស៊ីលប្រភេទនេះ ត្រូវបានបាញ់ម្ដងទៀតនៅថ្ងៃទី៥ ខែមេសានេះ (រូបភាព Xinhua)
× កូរ៉េខាងជើង បានបាញ់មីស៊ីលបាលីស្ទិកមួយគ្រាប់នៅព្រឹកថ្ងៃទី៥ ខែមេសា តែមិនទាន់ដឹងថាជោគជ័យ ឬបរាជ័យនៅឡើយ។ មីស៊ីលបាលីស្ទិកនេះ ហោះបានចម្ងាយប្រហែល៦០គីឡូម៉ែត្រ មុននឹងធ្លាក់ចូលសមុទ្រជប៉ុន។ កងទ័ពអាមេរិកប្រចាំតំបន់ប៉ាស៊ីហ្វិកបញ្ជាក់ថា មីស៊ីលនេះ ជាប្រភេទមីស៊ីលរយៈចម្ងាយមធ្យម ហើយត្រូវបាញ់មុនជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំចិន ស៊ី ជីនភីង ។
យោធាកូរ៉េខាងត្បូង បានប្រកាសថា កូរ៉េខាងជើង បានបាញ់មីស៊ីលមួយគ្រាប់ចេញពីទីតាំងបាញ់មីស៊ីល Sinpo ស្ថិតក្នុងខេត្ត Hamgyong ។ មីស៊ីលបាញ់ដោយបច្ចេកវិទ្យាបាលីស្ទិកនេះ បាញ់នៅព្រឹកព្រលឹមថ្ងៃទី៥ ដោយហោះបានចម្ងាយប្រហែល៦០គីឡូម៉ែត្រ មុនធ្លាក់ចូលសមុទ្រជប៉ុន។ ការបាញ់នេះ ធ្វើឡើងក្រោយកូរ៉េខាងជើងព្រមានសងសឹកសហគមន៍អន្តរជាតិដែលចង់បង្កើនការដាក់ទណ្ឌកម្មលើរបបកុម្មុយនីស្តមួយនេះ ដែលចេះតែសាកល្បងមីស៊ីលរហូត។
បើតាមទីភ្នាក់ងារព័ត៌មាន Yonhap មន្ត្រីយោធាជាន់ខ្ពស់កូរ៉េខាងត្បូងនិយាយថា មីស៊ីលដែលបាញ់នេះ ទំនងជាមីស៊ីលបាលីស្ទិករយៈចម្ងាយមធ្យម KN-15 ដែលគេស្គាល់ជាទូទៅជា Pukguksong-2 ។ មីស៊ីលប្រភេទនេះ អាចហោះបានកំពស់១៨៩គីឡូម៉ែត្រ។ យ៉ាងណាក្ដី គេមិនទាន់ដឹងថា ការបាញ់មីស៊ីលលើកនេះ ជោគជ័យឬយ៉ាងណាដែរ ខណៈកូរ៉េខាងជើងផ្ទាល់ ក៏មិនបាននិយាយដែរក្រោយការបាញ់នេះ។
ជាមួយការបាញ់នេះ គេជឿថា កូរ៉េខាងជើងកំពុងសាកល្បងបច្ចេកវិទ្យាបាលីស្ទិករបស់ខ្លួន ដែលនៅមិនទាន់ដល់កម្រិតនៅឡើយ ជាពិសេសបច្ចេកវិទ្យាបាញ់មីស៊ីលអន្តរទ្វីប (ICBM) តែម្ដង។ ក្រុងព្យុងយ៉ាង កំពុងប្រឹងប្រែងយ៉ាងខ្លាំងក្នុងការអភិវឌ្ឍមីស៊ីលរយៈចម្ងាយនេះ ដែលអាចបាញ់ដល់ទឹកដីអាមេរិកឯណោះ។ មេដឹកនាំកំពូលកូរ៉េខាងជើង គីម ជុងអ៊ុន ក៏ធ្លាប់ប្រកាសដែរថា ខ្លួននឹងបាញ់មីស៊ីលនេះនៅពេលណាមួយមិនខាន។
លើសពីនេះទៅទៀត ការបាញ់នេះ បង្ហាញពីអាកប្បកិរិយាផ្គើនរបស់កូរ៉េខាងជើង នៅមុនជំនួបទល់មុខរវាងប្រធានាធិបតី ដូណាល់ ត្រាំ និងប្រធានាធិបតី ស៊ី ជីនភីង ។ មេដឹកនាំទាំង២ គ្រោងជួបគ្នានៅឯ Mar-a-Lago អំឡុងទស្សនកិច្ចរបស់លោក ស៊ី នៅអាមេរិកចាប់ពីថ្ងៃទី៦ ដល់ថ្ងៃទី៧ ខែមេសា។ ការជួបទល់មុខនេះ គឺដើម្បីពង្រឹងទំនាក់ទំនងទ្វេភាគី និងគូសបន្ទាត់ផ្លូវដើរថ្មីនៃទំនាក់ទំនងរវាងមហាអំណាចទាំង២នេះ។
គេរំពឹងថា ជំនួបលើកដំបូងនេះ ក៏នឹងមានការពិភាក្សាលើប្រធានបទនុយក្លេអ៊ែរកូរ៉េខាងជើងដែរ។ លោកប្រធានាធិបតី ត្រាំ ទំនងជាឆ្លៀតឱកាសនេះជំរុញឲ្យចិនដាក់សម្ពាធបន្ថែមទៀតលើកូរ៉េខាងជើង ដើម្បីបញ្ចប់មហិច្ឆតានុយក្លេអ៊ែររបស់ខ្លួន។ ប៉ុន្តែនៅមុនជំនួបមកដល់ លោក ត្រាំ ក៏ព្រមានទុកមុនរួចហើយថា បើចិនមិនព្រមជួយដោះស្រាយបញ្ហានេះទេ អាមេរិកប្រាកដជាចាត់ការកូរ៉េខាងជើងដោយខ្លួនឯងមិនខាន៕
Tag:
កូរ៉េខាងជើង
ដូណាល់ ត្រាំ
ស៊ី ជីនភីង
© រក្សាសិទ្ធិដោយ thmeythmey.com