ជាតិ
រដ្ឋាភិបាល អះអាងថា គ្មាននិស្សិតខ្មែរស្លាប់ក្នុងករណីភេរវកម្មនៅរុស្ស៊ីឡើយ
×
ភ្នំពេញ៖ ក្រោយពីមានករណីបំផ្ទុះគ្រាប់បែកនៅក្នុងរថភ្លើងនៅរុស្ស៊ី កាលពីថ្ងៃទី៣ មេសានោះ នៅពេលនេះរដ្ឋាភិបាលកម្ពុជា បានអះអាងថា គ្មាននិស្សិតខ្មែរណាម្នាក់ ដែលកំពុងសិក្សា និងរស់នៅទីនោះ បាត់បង់ជីវិតឡើយ។ ករណីបំផ្ទុះគ្រាប់បែកនៅក្នុងរថភ្លើងនាក្រុង St Petersburg បានសម្លាប់មនុស្សជាង១០នាក់និងបង្កឲ្យមនុស្សជាច្រើននាក់ផ្សេងទៀតរងរបួសធ្ងន់និងស្រាលផង។
ក្រសួងបរទេស និងសហប្រតិបត្តិការអន្តរជាតិ បានឲ្យដឹងថា ស្ថានឯកអគ្គរាជទូតកម្ពុជា ប្រចាំប្រទេសរុស្ស៊ី បានទាក់ទងជាមួយសមាគមនិស្សិតកម្ពុជានៅទីនោះ ដើម្បីស្វែងយល់ពីស្ថានការណ៍និស្សិតហើយដែរ។ ប៉ុន្តែមិនមាននិស្សិតខ្មែរស្ថិតនៅក្នុងរថភ្លើង ដែលត្រូវបានបំផ្ទុះនោះទេ។ សេចក្ដីជូនព័ត៌មានរបស់អ្នកនាំពាក្យក្រសួងការបរទេសកម្ពុជា ចុះថ្ងៃទី៤ មេសា បានបញ្ជាក់ថា៖« តាមរបាយការណ៍ពីស្ថានឯកអគ្គរាជទូត ក្រសួងការបរទេស និងសហប្រតិបត្តិការអន្តរជាតិ សូមបញ្ជាក់ថា ពុំមានពលរដ្ឋ និងនិស្សិតខ្មែរណាម្នាក់ស្ថិតក្នុងចំណោមជនរងគ្រោះក្នុងហេតុការណ៍ផ្ទុះនេះឡើយ»។
ការបំផ្ទុះគ្រាប់បែកនៅក្នុងរថភ្លើងនាក្រុង St Petersburg បានសម្លាប់មនុស្ស១៤នាក់ និងបង្កឲ្យមនុស្សជាច្រើននាក់ផ្សេងទៀតរងរបួសធ្ងន់និងស្រាលផង។ ការស៊ើបអង្កេតកំពុងបន្តទៅមុខ តែគេវាយតម្លៃថាការវាយប្រហារនេះពាក់ព័ន្ធករណីភេរវកម្មច្រើនជាហេតុផលផ្សេង។ យ៉ាងណាក៏ដោយក្រុមប្រឹក្សាសហព័ន្ធរុស្ស៊ីយល់ថា ករណីនេះអាចទាក់ទងនឹងវត្តមានរបស់លោក វ្ល៉ាឌីមៀ ពូទីន នៅក្រុង St Petersburg ផងដែរ។ រុស្ស៊ីរងគ្រោះច្រើនដងមកហើយដោយសារករណីភេរវកម្ម ប៉ុន្តែប្រទេសនេះប្រឈមមុខកាន់តែខ្លាំងដោយសារការគំរាមកំហែងសន្តិសុខបង្កឡើងដោយចលនាភេរវកម្មអន្តរជាតិចាប់ពីពេលលោក ពូទីន បញ្ជូនទ័ពទៅអន្តរាគមន៍នៅស៊ីរីប្រឆាំងក្រុមដែស្ហឬក្រុមរដ្ឋឥស្លាម៕
© រក្សាសិទ្ធិដោយ thmeythmey.com