ជាតិ
សង្គមជាតិ
ពលរដ្ឋនៅប៊ូឌីញ «ស»ទារថ្លៃផ្ទះ ២ពាន់ដុល្លារក្នុងមួយម៉ែត្រការ៉េ តែក្រសួងបដិសេធ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។ រូបថតទំព័រហ្វេសប៊ុកលោក ជា សុផារ៉ា
×
ភ្នំពេញ៖ ពលរដ្ឋរស់នៅក្នុងអគារប៊ូឌីញ«ស» ស្ថិតក្នុងសង្កាត់ទន្លេបាសាក់ពុំទាន់ទទួលយកតម្លៃផ្ទះដែលក្រសួងដែនដីបានកំណត់ពីចំនួនប្រមាណ ១២០០ដុល្លារ ដល់១៣០០ដុល្លារក្នុងមួយម៉ែត្រការ៉េនៅឡើយ ទោះបីជារដ្ឋមន្ត្រីក្រសួងរៀបចំដែនដីលោក ជា សុផារ៉ា បានប្រឹងពន្យល់ពីតម្លៃទីផ្សារដីដែលក្រុមហ៊ុនអភិវឌ្ឍន៍ជប៉ុនអាចទទួលយកបានក្តី។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានចំណាយពេលជាង ២ម៉ោង ជជែកពិភាក្សាជាមួយពលរដ្ឋរស់នៅអគារដ៏ចាស់ទ្រុឌទ្រោមក្នុងរាជធានីភ្នំពេញជិត ៥០០គ្រួសារ ដើម្បីរកដំណោះស្រាយក្នុងការអភិវឌ្ឍអគារ នៅថ្ងៃទី៧ ខែមេសានេះ ក្នុងសាលប្រជុំទីស្តីការក្រសួងដែនដី។ ប៉ុន្តែ ភាគីទាំងពីរពុំទាន់ឯកភាពតម្លៃផ្ទះដូចគ្នានោះទេ។
តំណាងពលរដ្ឋរស់នៅក្នុងអគារប៊ូឌីញ លោកស្រី ជុំ សុខា ជាអាជីវករលក់ទំនិញចាប់ហួយ បានស្នើសុំក្រសួងដែនដីឲ្យចរចាជាមួយក្រុមហ៊ុនអភិវឌ្ឍដំឡើងថ្លៃផ្ទះពួកគេថែមទៀត ដោយលោកស្រីទាមទារ តម្លៃជិត ២ពាន់ដុល្លារអាមេរិកក្នុងមួយម៉ែត្រការ៉េ។ ស្ត្រីវ័យ ៥១ឆ្នាំ ដែលអះអាងថា ខ្លួនបានរស់នៅក្នុងអគារនេះ តាំងពីឆ្នាំ១៩៨១រហូតមកបច្ចុប្បន្ន បាននិយាយថា ពលរដ្ឋពុំអាចទទួលយកតម្លៃផ្ទះពីចំនួន ១២៦៣ ដល់១៣៥០ដុល្លារអាមេរិកដែលក្រសួងបានជជែកពេលនេះទេ។ ស្ត្រីដែលមានកូនប្រុសស្រី ក្នុងបន្ទុកចំនួន ៦នាក់រូបនេះ លើកហេតុផលថា ពលរដ្ឋនឹងមិនអាចទិញផ្ទះថ្មីសមរម្យបានទេ ប្រសិនបើពួកគេព្រមទទួលយកតម្លៃផ្ទះដែលក្រសួងបានកំណត់។
«ខ្ញុំចង់ឲ្យឯកឧត្តមរដ្ឋមន្ត្រីជួយដោះស្រាយឲ្យយើងខ្ញុំអាចទិញដីរស់នៅសមរម្យផង។ សំណង់អគារខាងក្នុងមានគុណភាពល្អ ដ្បិតអគារខាងក្រៅចាស់ទ្រុឌទ្រោមក្តី។ ពួកគេយើងមិនបារម្ភនឹងគុណភាពសំណង់នេះទេ។ ឥឡូវនេះ គុណភាពសំណង់អគារខ្លះចាញ់កន្លែងហ្នឹងផង»។ លោកស្រី សុខា ដែលមានបន្ទប់ ស្នាក់នៅចំនួន២បន្ទប់ស្មើនឹងទំហំ ៣៥.៥១ ម៉ែត្រការ៉េ ពន្យល់អ្នកសារព័ត៌មានបន្ថែម ក្រោយជជែកជាមួយលោក ជា សុផារ៉ា ជាសាធារណៈ។
ដូចគ្នាដែរ តំណាងពលរដ្ឋម្នាក់ទៀត លោកស្រី ជ័យ រស្មី អាយុប្រមាណ ៦០ឆ្នាំ បានបដិសេធទទួលយកតម្លៃផ្ទះដែលក្រសួងដែនដីចរចាផងដែរ ដោយលោកស្រីលើកហេតុផលថា លោកស្រីពុំអាចរកទិញផ្ទះថ្មីដែលមានតម្លៃសមរម្យនោះទេ ប្រសិនបើលោកស្រីសម្រេចលក់ផ្ទះជាង ៣០ម៉ែត្រការ៉េឲ្យក្រុមហ៊ុនអភិវឌ្ឍ។
លោកស្រីបានស្នើលោក ជា សុផារ៉ា ឲ្យស្នើក្រុមហ៊ុនដំឡើងថ្លៃទិញផ្ទះតម្លៃជិត ២ពាន់ដុល្លារក្នុងមួយម៉ែត្រ សម្រាប់ពលរដ្ឋទាំង ៤៩៣គ្រួសារ ដែលកំពុងរស់នៅលើអគារប៊ូឌីញស។ ស្ត្រីសម្បុរសមាឌក្រអាញរូបនេះ និយាយទាំងញញឹមដូច្នេះថា៖«យើងសង្ឃឹមជឿជាក់ថា ឯកឧត្តម ជា សុផារ៉ា នឹងអាចដោះស្រាយជូនពួក យើង។ យើងសុំត្រឹមរស់នៅផ្ទះសមរម្យប៉ុណ្ណោះ»។ នៅពេលអ្នកសារព័ត៌មានសួរថា តើលោកស្រីព្រមទទួលយក ការអភិវឌ្ឍនៅហ្នឹងកន្លែងដែរឬទេ? លោកស្រីតបភ្លាមៗថា ពលរដ្ឋភាគច្រើន មិនចង់ទទួលយកគោលការណ៍អភិវឌ្ឍហ្នឹងកន្លែងនោះទេ ព្រោះពួកគេបារម្ភខ្លាចការអភិវឌ្ឍមិនដូចគម្រោងកំណត់។
បន្ថែមលើសពីនេះ តំណាងពលរដ្ឋទាំងពីររូបនេះ បានឆ្លៀតសន្យាដូចៗគ្នាថា ពួកគេនឹងបន្តបោះ ឆ្នោតជូនគណបក្សកាន់អំណាចបច្ចុប្បន្ន នៅអាណត្តិក្រោយៗទៀត ប្រសិនបើពួកគេអាចលក់ផ្ទះក្នុងតម្លៃដែលពួកគេ បានទាមទារខាងលើ។
តែយ៉ាងណា ក្រសួងដែនដីពុំទាន់ទទួលយកសំណើពលរដ្ឋដែលស្នើដំឡើងតម្លៃទិញផ្ទះពួកគេដល់ ២ពាន់ដុល្លារក្នុងមួយម៉ែត្រការ៉េនៅឡើយ។ លោក ជា សុផារ៉ា រដ្ឋមន្ត្រីក្រសួងរៀបចំដែនដី បានបញ្ជាក់ក្នុងកិច្ចពិភាក្សានៅថ្ងៃនេះថា ក្រុមហ៊ុនអភិវឌ្ឍន៍នឹងមិនទទួលយកតម្លៃលក់របស់ពលរដ្ឋខាងលើនោះទេ ដោយលោកលើកហេតុផលថា វាហួសតម្លៃទីផ្សារអចលនវត្ថុតំបននេះ បច្ចុប្បន្ន។ «បងប្អូនចង់បានតម្លៃច្រើនខ្ពស់ដូចគ្នា តែលើសទីផ្សារ។ និយាយឲ្យអស់ គឺលក់អត់បានតែម្តង។ តម្លៃនេះស្ថិតត្រឹមបន្ទាត់ក្រហម»។ លោកទេសរដ្ឋមន្ត្រី ស្នើពលរដ្ឋឲ្យចំណាយពេលពិចារណាបន្តទៀត មុនបង្ហើបបន្ថែមថា ក្រុមហ៊ុនប្រហែលអាចដំឡើងថ្លៃទិញអតិបរមាចំនួន ១០០ដុល្លារបន្ថែមទៀតប៉ុណ្ណោះ។
លើសពីនេះទៀត លោកបានបន្តព្រលយសម្តីថា ក្រុមហ៊ុននឹងមិនទិញផ្ទះរបស់ពលរដ្ឋនោះទេ ប្រសិនបើពួកគេលក់តម្លៃជិត ២ពាន់ដុល្លារអាមេរិកក្នុងមួយម៉ែត្រការ៉េ។ តាមប្រសាសន៍លោក ជា សុផារ៉ា ក្រុមហ៊ុននឹងចំណាយលុយទិញដីអគារប៊ូឌីញ «ស»ប្រមាណពី ២១ ដល់ ២២លានដុល្លារអាមេរិក ស្មើនឹងទំហំដីសរុបចំនួន ៦៥៣១ម៉ែត្រការ៉េ។
តាមគម្រោង ក្រសួងរៀបចំដែនដី និងក្រុមហ៊ុនជប៉ុន Arakawa នឹងអភិវឌ្ឍអគារជាថ្មីក្នុងទំហំថវិកាពី ៧០លានទៅ ៨០លានដុល្លារអាមេរិក នាពេលខាងមុខ។ ពួកគេនឹងសង់អគារទំនើបថ្មីមានកម្ពស់ ២១ជាន់ ក្នុងនោះ រួមមាន ទីតាំងចំណតយានយន្តមានចំនួន ៣ជាន់, កន្លែងលក់ដូរ១ជាន់ បន្ទប់ស្នាក់ធំទូលាយនៅ ៥ជាន់ ហើយក្រុមហ៊ុនជប៉ុន Arakawa នឹងក្លាយជាកម្មសិទ្ធិវិនិយោគចាប់ពីជាន់ទី៩ឡើងទៅ។ ពួកគេត្រូវការរយៈពេលសាងសង់ជាង ៣ឆ្នាំ ដោយគ្រោងចាប់ផ្ដើមសង់តាំងពីដើមឆ្នាំ២០១៧នេះមកម្ល៉េះ។ ប៉ុន្តែ គម្រោងនេះពុំទាន់ចេញជារូបរាងនៅឡើយមកទល់បច្ចុប្បន្ន ដោយសារពលរដ្ឋពុំអាចទទួលយក តម្លៃទិញលក់ផ្ទះពួកគេ។
គួរបញ្ជាក់ថា អគារប៊ូឌីញសដែលស្ថិតក្នុងសង្កាត់ទន្លេបាសាក់ ខណ្ឌចំការមនមានអាយុកាល ៦០ឆ្នាំ គិតចាប់ពីការសាងសង់ក្នុងឆ្នាំ១៩៦៣ ក្នុងសម័យសង្គមរាស្ត្រនិយម រហូតដល់ឆ្នាំ ២០១៧នេះ៕
Tag:
ជា សុផារ៉ា
សំណង់
អគារ
ប៊ូឌីញ
© រក្សាសិទ្ធិដោយ thmeythmey.com