សង្គមជាតិ
សេដ្ឋកិច្ច
ចូលឆ្នាំ៖ ពលរដ្ឋខ្មែរធ្វើដំណើរទៅកាន់ប្រទេស«អ្នកមាន»កាន់តែច្រើន
× ភ្នំពេញ៖ នៅក្នុងពិធីបុណ្យចូលឆ្នាំខ្មែរនេះ ពលរដ្ឋខ្មែរជាច្រើននាក់ត្រៀមអបអរសាទរពិធីបុណ្យប្រពៃណីនេះនៅក្នុងប្រទេសកម្ពុជា និងនៅតាមបណ្តាខេត្តនានា។ តែពលរដ្ឋខ្មែរមួយចំនួនផ្សេងទៀតត្រៀមធ្វើដំណើរទៅកម្សាន្តនៅក្រៅប្រទេស។ ជាការកត់សម្គាល់ ពលរដ្ឋខ្មែរមួយចំនួនមិនមែនធ្វើដំណើរទៅកាន់ប្រទេសជិតខាងកម្ពុជាទៀតទេ តែធ្វើដំណើរកម្សាន្តទៅកាន់ប្រទេសអ្នកមាន ដូចជា ប្រទេសចិនប្រជាមានិត កោះតៃវ៉ាន់ ជប៉ុន បារាំង អូស្ត្រាលី និងមជ្ឈឹមប្រទេស។ល។
កាលពី១០ឆ្នាំមុន ពលរដ្ឋខ្មែរដែលមានជីវភាពធូរធារធ្វើដំណើរកម្សាន្តទៅកាន់ប្រទេសជិតខាងកម្ពុជា ដូចជា ប្រទេសវៀតណាម ថៃ ម៉ាឡេស៊ី សឹង្ហបុរី។ តែនៅពេលនេះ និន្នាការត្រូវបានផ្លាស់ប្តូរបន្តិច។
អ្នកដែលធ្លាប់ទស្សនាប្រទេសទាំងនោះហើយ ពួកគេបានផ្លាស់ប្តូរទីកន្លែងទេសចរណ៍ដោយបែរទៅរកតំបន់ទេសចរណ៍ថ្មី ដូចជា កោះតៃវ៉ាន់ ប្រទេសចិន ហុងកុង អឺរ៉ុប អូស្ត្រាលី ប្រទេសជប៉ុន ប្រទេសនៅតំបន់មជ្ឈឹមបូព៌ា ជាពិសេស ប្រទេសអារ៉ាប៊ី សាវអូឌីត។ អ្នកដែលធ្វើដំណើរដំបូង នៅតែបន្តធ្វើដំណើរទៅកាន់ប្រទេសជិតខាងដដែល។ លោក កឹម បូរីវ៉ាត់ ដែលត្រៀមចេញដំណើរទៅកាន់ប្រទេសម៉ាឡេស៊ី សឹង្ហបុរី និងប្រទេសប្រ៊ុយណេនៅក្នុងអំឡុងបុណ្យចូលឆ្នាំនេះ បាននិយាយថា ប្រទេសក្នុងតំបន់លោកបានស្គាល់ស្ទើរអស់ហើយ តែនៅសល់ប្រទេសប្រ៊ុយណេមួយទៀត ដូច្នេះហើយទើបនៅពេលបុណ្យចូលឆ្នាំនេះ លោក និងមិត្តភក្តិលោកសម្រេចចិត្តនាំគ្នាទៅទស្សនាប្រទេស ប្រ៊ុយណេ ដោយឈាងចូលទស្សនាប្រទេស ម៉ាឡេស៊ី និងប្រទេស សឹង្ហបុរី ម្តងទៀតផងដែរ។
ស្ត្រីមា្នក់ដែលត្រៀមចេញដំណើរទៅកាន់ប្រទេស អារ៉ាប៊ី សាវអូឌីត ហើយសុំមិនឲ្យបញ្ចេញឈ្មោះ បាននិយាយប្រាប់ថា អ្នកស្រីចំណាយជិត៣ពាន់ដុល្លារជាមួយស្វាមីដើម្បីធ្វើដំណើរកម្សាន្តទៅកាន់ប្រទេសអារ៉ាប៊ី សាវអូឌីត។ អ្នកស្រីបញ្ជាក់យ៉ាងខ្លីថា៖«ធ្វើការច្រើនហើយ ដូច្នេះខ្ញុំចង់លម្ហែរកាយម្តង»។
លោក អាំង គីមអ៊ាង អតីតប្រធានសមាគមនៃទីភ្នាក់ងារទេសចរណ៍បានកត់សម្គាល់ឃើញថា ពលរដ្ឋខ្មែរកាន់តែច្រើនឡើងបន្តធ្វើដំណើរទៅកាន់ប្រទេសថ្មីៗ និងជាប្រទេសអភិវឌ្ឍន៍។ ចរន្តនេះបង្ហាញថា ជីវភាពរបស់ពលរដ្ឋខ្មែរកាន់តែប្រសើរ ហើយម្យ៉ាងទៀត វាបង្ហាញថា ការគិតរបស់ពលរដ្ឋលើតម្លៃជីវិតកាន់តែស៊ីវីល័យ។
តួលេខមួយចំនួនបានបង្ហាញថា ពលរដ្ឋខ្មែរជាង១លាននាក់បានធ្វើដំណើរទៅក្រៅប្រទេសជារៀងរាល់ឆ្នាំ៕
© រក្សាសិទ្ធិដោយ thmeythmey.com