ភូមិបង្អែមនៃក្តីស្រឡាញ់ឆ្នាំនេះមាននំ៦មុខសម្រាប់ចែកពិសាដោយសេរី

ជាតិ

សង្គមជាតិ

ភូមិបង្អែមនៃក្តីស្រឡាញ់ឆ្នាំនេះមាននំ៦មុខសម្រាប់ចែកពិសាដោយសេរី

10, Apr 2017 , 9:19 am

រូបភាព

ដោយ: អុីសា រ៉ហានី (Isa Rohany)

សៀមរាប៖ «ភូមិបង្អែមនៃក្តីស្រឡាញ់» គឺជាឈ្មោះភូមិមួយនៃព្រឹត្តិការណ៍អង្គរសង្ក្រាន្តឆ្នាំ២០១៧។ អ្វីដែលពិសេសនោះ គឺថានៅឆ្នាំនេះភូមិមួយនេះបានត្រៀមធ្វើមុខបង្អែមខ្មែររហូតដល់ទៅ៦មុខ សម្រាប់ចែកជូនភ្ញៀវទេសចរជាតិ និងអន្តរជាតិចូលភ្លក់ដោយសេរី ក្នុងរយៈពេល៣ថ្ងៃនៃព្រឹត្តិការណ៍អង្គរសង្ក្រាន្ត។

បើតាមការឲ្យដឹងពីអនុប្រធានភូមិបង្អែមនៃក្តីស្រឡាញ់ មុខបង្អែមទាំង៦មុខដែលត្រៀមធ្វើនោះរួមមាន នំគ នំល្ពៅបុក នំអាកោខ្ទិះ នំអាកោត្នោត នំក្រូច និងនំអន្សមខ្នុរ។ លោក ឡុង ប៊ុនហោ បានឲ្យដឹងថា គោលបំណងនៃការរៀបចំកម្មវិធីនេះ គឺដោយសារចង់ចែករំលែកមុខបង្អែមខ្មែរឲ្យបានច្រើនមុខ ដល់ភ្ញៀវទេសចរជាតិ ក៏ដូចជាអន្តរជាតិបានដឹង និងស្គាល់រសជាតិនៃបង្អែមទាំងនោះ។

លោកអនុប្រធានភូមិក៏បានឲ្យដឹងទៀតថា កម្មវិធីខាងលើគឺមានកិច្ចសហការជាមួយសមាគមចុងភៅកម្ពុជា ដែលក្នុងនោះនឹងមានចុងភៅប្រមាណពី២៥នាក់ទៅ៣០នាក់ នឹងចូលរួមចម្អិនបង្អែម។ លោកបញ្ជាក់ទៀតថា៖« សម្រាប់មុខបង្អែមទាំង៦មុខ ដែលយើងត្រៀមសម្រាប់ចូលពិសាដល់សេរីនេះ គឺយើងបានត្រៀមក្នុងមួយមុខចន្លោះពី៣០ទៅ៥០គីឡូក្នុងមួយថ្ងៃ»។

លោកបន្ថែមទៀតថា ភ្ញៀវទេសចរជាតិ និងអន្តរជាតិ អាចចូលរួមកម្សាន្តក្នុងភូមិបង្អែមបាន ដោយមានរៀបចំជារោងកញ្ចុះជារង្វង់មូល ងាយស្រួលដល់ការដើរភ្លក់បង្អែម។ ក្រៅពីចូលភ្លក់បង្អែមដោយសេរីហើយនោះ នៅក្នុងបរិវេណភូមិបង្អែមក៏មានរោងមួយផ្នែកទៀតរបស់អាជីវកដែលនឹងធ្វើមុខបង្អែមចំនួន ២០មុខទៀត សម្រាប់លក់ដល់ភ្ញៀវផងដែរ។

គួររម្លឹកថា កាលពីឆ្នាំទៅ ភូមិបង្អែមនៃក្តីស្រឡាញ់បានរៀបចំកម្មវិធីចម្អិនបង្អែមចំនួន២មុខ សម្រាប់ចែកជូនដល់ភ្ញៀវទេសចរចូលភ្លក់ដោយសេរី។ មុខបង្អែមទាំងនោះមាននំផ្លែអាយ និងនំត្រៀបបាយ ហើយក្នុងនោះក៏មានវត្តមានភរិយាសម្តេច ហ៊ុន សែន ចូលធ្វើនំចែកជូនភ្ញៀវពិសាផងដែរ។

ដោយឡែកសម្រាប់ឆ្នាំនេះ មិនមានការប្រកួតធ្វើនំដូចឆ្នាំទៅមិញទេ។ នេះបើតាមការបញ្ជាក់ពីអនុប្រធានភូមិ មុននឹងលោកប្រាប់ពីពេលវេលានៃដំណើរភូមិបង្អែម ដោយពេលព្រឹកចាប់ពីម៉ោង៩ ដល់ម៉ោង១១កន្លះ និងពេលរសៀលចាប់ពីម៉ោង ២ ដល់ម៉ោង៧យប់៕