កម្មការិនីសំណង់ម្នាក់ បានស្លាប់ ដោយសារធ្លាក់ពីលើអគារកម្ពស់បួនជាន់

ជាតិ

សង្គមជាតិ

កម្មការិនីសំណង់ម្នាក់ បានស្លាប់ ដោយសារធ្លាក់ពីលើអគារកម្ពស់បួនជាន់

11, Apr 2017 , 7:48 pm

រូបភាព

កម្មការិនីសំណង់ លាង សុខហេង ឈរនៅពីមុខការដ្ឋានសំណង់សង់ផ្ទះល្វែង ជាកន្លែងដែលនាងធ្វើការ។

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ កម្មការិនីសំណង់ម្នាក់ ឈ្មោះ លាង សុខហេង អាយុ១៨ឆ្នាំ បានបាត់បង់ជីវិត ដោយសារតែធ្លាក់ពីលើអគារកម្ពស់បួនជាន់ នៅព្រឹកថ្ងៃទី១១ ខែមេសា ឆ្នាំ២០១៧នេះ ខណៈនាងកំពុងតែធ្វើការ។ នេះបើតាមកម្មការិនីម្នាក់ ដែលជាអ្នកធ្វើការជាមួយ សុខហេង ក្នុងការដ្ឋានសំណង់សង់ផ្ទះល្វែងមួយ ស្ថិតនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

កម្មការិនី ដែលមិនបញ្ចេញឈ្មោះរូបនោះ បានប្រាប់ភ្នាក់ងារសារព័ត៌មានថ្មីៗ ដែលបានចុះទៅដល់កន្លែងកើតហេតុ ថា នៅពេលធ្លាក់ពីលើអគារភ្លាមៗ សុខហេង មិនទាន់ស្លាប់នោះទេ ហើយក៏ត្រូវបានបញ្ជូនទៅកាន់មន្ទីរពេទ្យកាល់ម៉ែត្រ។ កម្មការិនីខាងលើ បញ្ជាក់ថា សុខហេង ទើបតែនឹងស្លាប់ នៅពេលព្រលប់ ក្នុងថ្ងៃនេះ។

កម្មការិនីរូបនោះដដែល បាននិយាយទៀតថា ក្រោយស្លាប់ សពរបស់សុខហេង ត្រូវបានយកទៅតម្កល់ក្នុងវត្តមួយ ក្នុងរាជធានីភ្នំពេញ ដើម្បីរង់ចាំក្រុមគ្រួសារ មកធ្វើបុណ្យតាមប្រពៃណី។

សូមបញ្ជាក់ថា ក្នុងទិវាសិទ្ធិនារីអន្តរជាតិ កាលពីថ្ងៃទី៨ ខែមីនា ឆ្នាំ២០១៧ កន្លងទៅ សារព័ត៌មានថ្មីៗ បានសម្ភាស សុខហេង ទាក់ទងនឹងជីវិតរបស់នាង ដែលធ្វើការជាកម្មករសំណង់ ។ ពេលផ្តល់បទសម្ភាសដល់សារព័ត៌មានថ្មីៗ សុខហេង បាននិយាយដូច្នេះថា៖«ខ្ញុំមិនខ្មាសគេទេ ដែលខ្លួនខ្ញុំជាកម្មករសំណង់។ តែបើគិតថាខ្មាសគេ ព្រោះការងារបែបនេះ គ្មានអ្នកណាមកជួយខ្ញុំឡើយ»៕