អន្តរជាតិ
ស៊ី ប្រាប់ ត្រាំ ថា បញ្ហាកូរ៉េខាងជើង គួរដោះស្រាយតាមផ្លូវសន្តិភាព ប្រធានាធិបតីចិន ស៊ី ជីនភីង កំពុងជជែកគ្នាជាមួយប្រធានាធិបតីអាមរិក ដូណាល់ ត្រាំ នៅឯ Mar-a-Lago (រូបភាព Xinhua)
× សារព័ត៌មានរដ្ឋចិនផ្សាយថា ប្រធានាធិបតីចិន ស៊ី ជីនភីង បាននិយាយទូរសព្ទជាមួយប្រធានាធិបតីអាមេរិក ដូណាល់ ត្រាំ នៅថ្ងៃទី១២ ខែមេសា។ ប្រធានបទសំខាន់នៃការពិភាក្សាតាមទូរសព្ទនេះ គ្មានអ្វីក្រៅពីបញ្ហានុយក្លេអ៊ែរកូរ៉េខាងជើងឡើយ។ ការពិភាក្សាតាមទូរសព្ទនេះ ធ្វើឡើងចំពេលដែលស្ថានការណ៍ឧបទ្វីបកូរ៉េកើនកម្ដៅខ្លាំងឡើងៗ ដោយសារការនិយាយគំរាមគ្នាទៅវិញទៅមករវាងអាមេរិក និងកូរ៉េខាងជើង។
ការបង្អួតកម្លាំងយោធារបស់អាមេរិក និងការមិនចុះញ៉មរបស់កូរ៉េខាងជើង កំពុងធ្វើឲ្យឧបទ្វីបកូរ៉េ ដែលនៅក្បែររបងផ្ទះរបស់ចិន ប្រឈមមុខនឹងគ្រោះថ្នាក់យ៉ាងខ្លាំង។ ពិតណាស់ថា ចិនមិនចង់បានជម្លោះប្រដាប់អាវុធណាមួយផ្ទុះឡើងនៅជិតផ្ទះរបស់ខ្លួនឡើយ ហើយជាញឹកញយ ចិនតែងស្នើឲ្យភាគីពាក់ព័ន្ធទាំងអស់រក្សាការអត់ធ្មត់ និងជ្រើសយកផ្លូវដែលល្អសម្រាប់តំបន់។ ចិន ក៏រងសម្ពាធច្រើនពីអាមេរិក ដោយសាររឿងនេះដែរ។
ដោយឃើញចិនមិនសូវធ្វើអ្វី ប្រធានាធិបតីអាមេរិក ដូណាល់ ត្រាំ ក៏ព្រមានថា អាមេរិកនឹងចាត់វិធានការណ៍ជាឯកតោភាគីដើម្បីដោះស្រាយបញ្ហាកូរ៉េខាងជើង។ ទន្ទឹមការព្រមាននេះ នាវាដឹកយន្តហោះអាមេរិក ក៏កំពុងធ្វើដំណើរឆ្ពោះទៅកៀកឧបទ្វីបកូរ៉េ ដើម្បីបង្អួតអានុភាពយោធាដាក់កូរ៉េខាងជើង។ ជាមួយគ្នានោះ ខណៈកំពុងទទួលប្រធានាធិបតីចិននៅ Mar-a-Lago លោក ត្រាំ ក៏បញ្ជាឲ្យបាញ់មីស៊ីលដាក់ស៊ីរី កំញើញកូរ៉េខាងជើងទៀតផង។
យ៉ាងណាមិញ ចិន ដែលមានព្រំដែនជាប់កូរ៉េខាងជើង ពិតជាមិនចង់ឃើញការផ្ទុះអាវុធនៅឧបទ្វីបកូរ៉េឡើយ ព្រោះបញ្ហានឹងរាលដាលមកដល់ចិនផងដែរ។ បើតាមទីភ្នាក់ងារព័ត៌មាន Reuters ក្នុងកិច្ចសន្ទនាតាមទូរសព្ទជាមួយលោក ត្រាំ នៅថ្ងៃទី១២ ខែមេសា លោក ស៊ី បានសង្កត់ថា ដំណោះស្រាយសម្រាប់ជម្លោះ គួរសម្រេចបានតាមផ្លូវសន្តិភាព។ ជាមួយការលើកឡើងដូចនេះ ប្រធានាធិបតីចិន ប្រឆាំងការប្រើប្រាស់កម្លាំងទ័ពក្នុងការបង្ខំឲ្យកូរ៉េខាងជើងផ្អាកកម្មវិធីនុយក្លអ៊ែររបស់ខ្លួន។
ការគំរាមប្រើប្រាស់ទ័ពដោះស្រាយបញ្ហា ត្រូវបានលើកឡើងលើកដំបូងពីសំណាក់រដ្ឋមន្ត្រីការបរទេស Rex Tillerson អំឡុងទស្សនកិច្ចនៅតំបន់អាស៊ី។ ប្រមុខការទូតអាមេរិកបានលើកឡើងពីការអស់ការអត់ធ្មត់ និងបរាជ័យនៃការចរចារយៈពេល២០ឆ្នាំមកនេះ។ ប្រធានាធិបតី ត្រាំ ក៏បញ្ជាឲ្យទីប្រឹក្សាសន្តិសុខរបស់លោក ពិនិត្យគ្រប់វិធីសាស្ត្រទាំងអស់ក្នុងការតទល់នឹងកូរ៉េខាងជើង ដែលបង្ហាញថា លោកមិនមែនលេងសើចនឹងស្ថានការណ៍ដ៍គ្រោះថ្នាក់នេះទេ។
មិនមែនគំរាមតែមាត់ឡើយ លោក ត្រាំ ក៏ទើបចេញបញ្ជាឲ្យនាវាដឹកយន្តហោះ Carl Vinson ដ៏មានអានុភាព និងដើរដោយថាមពលនុយក្លេអ៊ែរ ធ្វើដំណើរឆ្ពោះទៅតំបន់មហាសមុទ្រប៉ាស៊ីហ្វិកទៀតផង។ ការបាញ់មីស៊ីល Tomahawk ដល់ទៅ៥៩គ្រាប់ដាក់ស៊ីរី ក៏ជាសញ្ញាព្រមានរបស់អាមេរិក បើកូរ៉េខាងជើងនៅរឹងទទឹងទៀត។ ជាការឆ្លើយតប កូរ៉េខាងជើង ទំនងសាកល្បងនុយក្លេអ៊ែលើកទី៦ ដើម្បីបញ្ចេញឥទ្ធិពលរបស់ខ្លួនតបវិញក៏ថាបាន៕
Tag:
ចិន
អាមេរិក
កូរ៉េខាងជើង
ស៊ី ជីនភីង
ដូណាល់ ត្រាំ
© រក្សាសិទ្ធិដោយ thmeythmey.com