អន្តរជាតិ
នាយកក្រុមហ៊ុន United ចេញមកសុំទោស ក្រោយអ្នកដំណើរម្នាក់ត្រូវអូសចេញពីយន្តហោះ
× នាយកប្រតិបត្តិក្រុមហ៊ុនអាកាសចរណ៍ United លោក Oscar Munoz បានចេញមកសុំទោសជាសាធារណៈ ក្រោយមានហេតុការណ៍ទាញអ្នកដំណើរម្នាក់ចេញពីយន្តហោះ។ លោក Oscar Munoz ចាត់ទុកហេតុការណ៍នេះ ជារឿងគួរឲ្យរន្ធត់ ហើយលោកសន្យាដោះស្រាយបញ្ហានេះឲ្យបានម៉ត់ចត់បំផុត ដើម្បីធានាថា ហេតុការណ៍ដូចនេះនឹងមិនកើតម្ដងទៀតទេ។ អ្នកដំណើរឈ្មោះ David Dao ត្រូវបានទាញចេញពីយន្តហោះ ដែលដាក់លើសចំណុះ និងទុកកៅអីរបស់លោកឲ្យបុគ្គលិកបម្រើការវិញ។
ក្នុងសេចក្ដីថ្លែងការណ៍ថ្ងៃទី១១ ខែមេសា លោក Oscar Munoz នាយកក្រុមហ៊ុន United និយាយថា ក្រុមហ៊ុននឹងទទួលខុសត្រូវគ្រប់យ៉ាងចំពោះអ្វីដែលបានកើតឡើង ហើយនឹងព្យាយាមកែកំហុសទាំងនោះឲ្យប្រសើរឡើងវិញ។ លោក ក៏សន្យាសើរើបញ្ហាទាំងអស់ឡើងវិញ នៅត្រឹមថ្ងៃទី៣០ ខែមេសា ដើម្បីដោះស្រាយបញ្ហាដែលកើតមាន។
នេះជាការសុំទោសលើកទី៣ របស់នាយកក្រុមហ៊ុនអាកាសចរណ៍ United ដើម្បីបន្ថយកម្ដៅនៃការមិនពេញចិត្តនឹងចំណាត់ការរបស់ក្រុមហ៊ុនអាមេរិកមួយនេះ។ អ្នកដំណើរ David Dao ត្រូវបានទាញដោយបង្ខំចេញពីកៅអីរបស់លោក ដែលធ្វើឲ្យលោករបួសចេញឈាមទៀតផង។ ដោយសារតែយន្តហោះដាក់លើសចំណុះ លោក Dao ទំនងត្រូវបានស្នើឲ្យបោះបង់កៅអីរបស់ខ្លួន និងទុកកៅអីនោះឲ្យបុគ្គលិកយន្តហោះវិញ តែលោកមិនព្រម។
សកម្មភាពហិង្សាលើអ្នកដំណើរនេះ ត្រូវបានថតដោយអ្នកដំណើរផ្សេងទៀត ហើយបន្ទាប់មកក៏ល្បីពេញបណ្ដាញសង្គមតែម្ដង។ លោក Munoz និយាយក្នុងលិខិតសុំទោសលើកទី៣ នេះទៀតថា លោកពិតជារំខានដោយសាររឿងហេតុកើតឡើង ហើយលោកពិតជាសុំទោសដល់អ្នកដំណើរដែលរងគ្រោះ និងអ្នកដំណើរដទៃទៀតផងដែរ។
បើតាមសារព័ត៌មាន CNBC នៅពេលនេះ អ្នកដំណើរ Dao កំពុងទទួលការព្យាបាលនៅមន្ទីរពេទ្យ Chicago ។ មេធាវីរបស់លោកនិយាយថា លោក Dao ពិតជាអរគុណការបន់ស្រន់ និងការគាំទ្រមកលើរូបលោក។ ជាមួយគ្នានេះដែរ ក្រុមគ្រួសារលោក Dao ដែលសុំមិនបង្ហាញអត្តសញ្ញាណ កំពុងផ្ដោតការយកចិត្តទុកដាក់លើសុខភាពរបស់លោកជាមុនសិន។
បើតាមវីដេអូដែលថតបាន លោក David Dao ជាវេជ្ជបណ្ឌិតមកពី Kentucky ត្រូវអូសចេញពីកៅអីដោយប៉ូលិស Chicago ខណៈរង់ចាំការហោះហើទៅកាន់ Louisville ។ បើតាមអ្នកដំណើរលើយន្តហោះ បុគ្គលិក United បានរកអ្នកស្ម័គ្រចិត្តបោះបង់កៅអីរបស់ខ្លួន សម្រាប់បុគ្គលិកបម្រើការលើយន្តហោះចំនួន៤នាក់ តែគ្មានអ្នកស្ម័គ្រឡើយ។ ក្រុមហ៊ុននេះ ក៏ប្រើប្រព័ន្ធកុំព្យូទ័រដើម្បីកំណត់អ្នកត្រូវចាកចេញតែម្ដង។ Dao ក៏ក្លាយជាអ្នកត្រូវចាកចេញនេះ តែលោកបដិសេធ។
ចំណាត់ការរបស់ក្រុមហ៊ុន United បានធ្វើឲ្យក្រុមហ៊ុននេះខាតបង់យ៉ាងខ្លាំង។ ភាគហ៊ុនរបស់ក្រុមហ៊ុន បានធ្លាក់យ៉ាងគំហុក ក្រោយផ្ទុះចេញវីដេអូនៃហេតុការណ៍លើយន្តហោះ។ អ្នកប្រើប្រាស់បណ្ដាញសង្គម បានអំពាវនាវឲ្យមានការធ្វើពហិការជិះយន្តហោះក្រុមហ៊ុន United ដើម្បីឆ្លើយតបនឹងទង្វើមិនសមរម្យមកលើអ្នកដំណើរដែលទិញសំបុត្រត្រឹមត្រូវ៕
© រក្សាសិទ្ធិដោយ thmeythmey.com