អន្តរជាតិ
ពូទីន រិះគន់ណាតូ ដែលគាំទ្រការបាញ់មីស៊ីលរបស់អាមេរិក ទោះខុសច្បាប់អន្តរជាតិក្ដី ប្រធានាធិបតីរុស្ស៊ី វ្ល៉ាឌីមៀ ពូទីន រិះគន់សម្ព័ន្ធយោធាណាតូទាក់ទងការបាញ់មីស៊ីលរបស់អាមេរិកដាក់ស៊ីរី (រូបភាព Xinhua)
× ប្រធានាធិបតីរុស្ស៊ី វ្ល៉ាឌីមៀ ពូទីន បាននិយាយរិះគន់សម្ព័ន្ធយោធាណាតូ ដែលគាំទ្រការបាញ់មីស៊ីលដាក់ស៊ីរី ក្រោយចោទប្រកាន់ថាបានប្រើប្រាស់អាវុធគីមីលើប្រជាជនស្លូតត្រង់។ លោក ពូទីន ចាត់ទុកការបាញ់មីស៊ីលរបស់អាមេរិក ជាការបំពានច្បាប់អន្តរជាតិ ព្រោះអាមេរិកហ៊ានវាយប្រហារស៊ីរី ទាំងគ្មានភស្តុតាងបង្ហាញថា ក្រុងដាម៉ាស់ ពិតជាបានវាយប្រហារអាវុធគីមីដូចការចោទប្រកាន់មែនឬអត់ផងនោះ។ ចំណែកណាតូវិញ ចេះតែគាំទ្រអាមេរិកទៅទៀត។
ការបាញ់មីស៊ីល៥៩គ្រឿងលើមូលដ្ឋានអាកាសរបស់ស៊ីរី ទទួលបានការសាទរយ៉ាងខ្លាំងពីសំណាក់សម្ព័ន្ធមិត្តរបស់អាមេរិក។ សម្រាប់សម្ព័ន្ធមិត្តស៊ីរីវិញមានរុស្ស៊ី និងអ៊ីរ៉ង់ជាដើម បានប្រតិកម្មចំណាត់ការផ្លូវអាកាសរបស់អាមេរិក ទោះជាអាមេរិកលើកហេតុផលថា ការបាញ់មីស៊ីលនេះ ធ្វើឡើងជាការឆ្លើយតបនឹងការវាយប្រហារដោយអាវុធគីមីពីសំណាក់ទាហានរដ្ឋាភិបាលប្រធានាធិបតី Bashar al-Assad ក្ដី។ រុស្ស៊ី និយាយថា អាមេរិកមិនមានភស្តុតាងគ្រប់គ្រាន់ផង ក៏វាយប្រហារលើស៊ីរីតែម្ដង។
ប្រធានាធិបតីរុស្ស៊ី វ្ល៉ាឌីមៀ ពូទីន ដែលតែងចេញមុខការពារស៊ីរីរហូតមក ចាត់ទុកការវាយប្រហារមីស៊ីលរបស់អាមេរិក ជារឿងខុសច្បាប់អន្តរជាតិ។ បើតាមសារព័ត៌មាន RT លោកបន្តថា បើទោះជាអាមេរិកគ្មានភស្តុតាងដាក់បន្ទុកលើរបបស៊ីរីក៏ដោយ សម្ព័ន្ធយោធាណាតូឯណោះ ក៏នៅតែគាំទ្រការបាញ់មីស៊ីលនេះដដែល។ ទាំងអគ្គលេខាធិការណាតូ ទាំងមេដឹកនាំប្រទេសសមាជិកអង្គការយោធា ថែមទាំងទម្លាក់កំហុសលើប្រធានាធិបតី Assad ទៅទៀត។
ការវាយប្រហារលើមូលដ្ឋានអាកាស Shayrat កាលពីថ្ងៃទី៧ ខែមេសា គឺជាការឆ្លើយតបនឹងការប្រើប្រាស់អាវុធគីមីក្នុងខេត្ត Idlib ដែលបណ្ដាលឲ្យមនុស្សយ៉ាងតិច៨០នាក់ ត្រូវបាត់បង់ជីវិត។ ក្រុងវ៉ាស៊ីនតោន និងសម្ព័ន្ធមិត្តបានដាក់មុខព្រួញចោទប្រកាន់រដ្ឋាភិបាលស៊ីរីថានៅពីក្រោយការវាយប្រហារអមនុស្សធម៌នេះ និងប្រើប្រាស់មូលដ្ឋាន Shayrat ដើម្បីធ្វើប្រតិបត្តិការនេះ។ ប៉ុន្តែរដ្ឋាភិបាលស៊ីរី ទាត់ចោលការចោទប្រកាន់ទាំងអស់មកលើខ្លួន។
ក្រោយការវាយប្រហារអាវុធគីមីនេះ ប្រទេសជាច្រើន ក៏ស្នើឲ្យមានការស៊ើបអង្កេតរកមូលហេតុឲ្យបានច្បាស់លាស់ ប៉ុន្តែមកដល់ពេលនេះ គេមិនឃើញមានការស៊ើបអង្កេតណាមួយឡើយ។ អាមេរិក នៅតែរក្សាជំហរថារបបលោក Assad ជាអ្នកសម្លាប់ប្រជាជនខ្លួនឯង និងបានព្រមានវាយប្រហារជាថ្មីទៀត បើសកម្មភាពអមនុស្សធ៌បន្តកើតឡើងដដែល។
ចំណែកក្រុងមូស្គូ ក៏បាននិយាយការពាររបបដឹកនាំស៊ីរីទៀតថា ក្រុងដាម៉ាស់ គ្មានហេតុផល ឬយុទ្ធសាស្ត្រអ្វី ឬសូម្បីសមត្ថភាពដើម្បីវាយប្រហារអាវុធគីមីដែរ។ នេះក៏ព្រោះតែ អាវុធគីមីក្នុងឃ្លាំងស្តុកទាំងអស់ ត្រូវបានបំផ្លាញអស់ហើយ លើកលែងឃ្លាំងស្តុកនៅទឹកដីកាន់កាប់ដោយក្រុមឧទ្ទាមប៉ុណ្ណោះ។ លោក ពូទីន ក៏ព្រមានដែរថា អាមេរិកអាចប្រើមូលហេតុស្រដៀងគ្នានេះ ដើម្បីវាយប្រហារលើស៊ីរីលើកក្រោយទៀតមិនខាន៕
Tag:
រុស្ស៊ី
ណាតូ
Vladimir Putin
ស៊ីរី
© រក្សាសិទ្ធិដោយ thmeythmey.com