ក្រុងបាងកក បោសសម្អាតការលក់ដូរតាមដងផ្លូវដ៏មានប្រជាប្រិយ ដើម្បីរក្សាសណ្ដាប់ធ្នាប់

អន្តរជាតិ

ក្រុងបាងកក បោសសម្អាតការលក់ដូរតាមដងផ្លូវដ៏មានប្រជាប្រិយ ដើម្បីរក្សាសណ្ដាប់ធ្នាប់

19, Apr 2017 , 8:19 pm

រូបភាព

ដោយ: តន ចាន់រិទ្ធារ៉ា

មួយខែក្រោយជាប់ឈ្មោះជាទីក្រុងមានប្រជាប្រិយផ្ដាច់គេសម្រាប់គោលដៅអាហារតាមដងផ្លូវ រដ្ឋបាលក្រុងបាងកក បានចេញយុទ្ធនាការបោសសម្អាតការលក់ដូរតាមដងផ្លូវដ៏ល្បីល្បាញនេះ ដើម្បីរំដោះចិញ្ចើមផ្លូវសម្រាប់អ្នកថ្មើរជើង និងរក្សាអនាម័យក្នុងទីក្រុងមួយនេះ។ យុទ្ធនាការបោសសម្អាតនេះ ធ្វើឡើងនៅទូទាំងទីក្រុងបាងកក ដោយគ្មានការលើកលែងឡើយ ហើយនឹងសម្រេចឲ្យបាននៅដំណាច់ឆ្នាំ២០១៧ នេះតែម្ដង។

អាជ្ញាធរក្រុងបាងកក បានប្រកាសថា ការលក់ដូរអាហារតាមដងផ្លូវក្នុងទីក្រុង នឹងត្រូវលុបបំបាត់ទាំងស្រុងនៅចុងឆ្នាំនេះ ក្នុងគោលដៅបង្កើនសុវត្ថិភាព អនាម័យក្នុងទីក្រុង និងការរំដោះផ្លូវសម្រាប់ការធ្វើដំណើរឡើងវិញ។ ចំណាត់ការនេះ ធ្វើឡើងស្របពេលដែលទីក្រុងបាងកកត្រូវបានទទួលស្គាល់ជាគោលដៅដ៏ពេញនិយមសម្រាប់អាហារតាមដងផ្លូវ ដែលល្បីល្បាញពេញពិភពលោក និងទាក់ទាញភ្ញៀវទេសចរណ៍យ៉ាងច្រើន។

បើតាមសារព័ត៌មានថៃ The Nation លោក Wanlop Suwandee ប្រធានទីប្រឹក្សាអភិបាលក្រុងបាងកកនិយាយថា ការលក់ដូរតាមដងផ្លូវទាំងអស់នៅក្នុងខណ្ឌទាំង៥០របស់ក្រុងបាងកក នឹងត្រូវហាមឃាត់ដាច់ខាត ដោយគ្មានការលើកលែងឡើយ។ លោកបន្តថា គោលដៅបន្ទាប់នៃការបោសសម្អាត គឺ Yaowarat និងផ្លូវ Khao San គឺជា ក្រោយអាជ្ញាធរលុបបំបាត់ការលក់ដូរខុសច្បាប់នៅឯ Siam Square, Pratunam និងផ្សារក្រោមស្ពាន Phra Phuttayotfa ។

មន្ត្រីខាងលើពន្យល់ថា៖ «អ្នកលក់ដូរតាមផ្លូវទាំងនោះ លក់ដូរទំនិញលើផ្លូវសាធារណៈអស់ជាច្រើនឆ្នាំមក ហើយយើងក៏បានផ្ដល់កន្លែងឲ្យពួកគេលក់ទំនិញរបស់ពួកគេឲ្យបានស្របច្បាប់ដែរ។ ដូច្នេះអាជ្ញាធរនឹងមិនបន្ធូរដៃឡើយ។ គ្រប់អ្នកលក់តាមផ្លូវទាំងអស់ ត្រូវតែរើចេញ»៕