កម្ពុជា ទទួលឈុតអលង្ការមាសសម័យអង្គរ១០គ្រឿង ពីភា្នក់ងារលក់វត្ថុបុរាណអង់គ្លេស

ជាតិ

សិល្បះ

កម្ពុជា ទទួលឈុតអលង្ការមាសសម័យអង្គរ១០គ្រឿង ពីភា្នក់ងារលក់វត្ថុបុរាណអង់គ្លេស

22, Apr 2017 , 12:10 pm

រូបភាព

រូបភាពពីហ្វេសប៊ុកស្ថានទូតកម្ពុជាប្រចាំចក្រភពអង់គ្លេស

ដោយ: ខន ចំប៉ា

កម្ពុជា បានទទួលឈុតអលង្ការមាសសម័យអង្គរ ចំនួន១០គ្រឿង ពីភា្នក់ងារលក់វត្ថុបុរាណអង់គ្លេស កាលពីថ្ងៃទី២០ ខែមេសា កន្លងទៅ ។ ឈុតអលង្ការមាសនេះ មានដូចជា រង្វង់សម្រាប់លម្អព្រះសិរ ដើមដៃ និងដើមទ្រូង ក្រវិល ខ្សែក និងខ្សែក្រវ៉ាត់។ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ បញ្ជាក់ថា ឈុតអលង្ការមាសនេះ នឹងរៀបចំបញ្ជូនមកដល់កម្ពុជា ក្នុងពេលឆាប់ៗខាងមុខ។

ភ្នាក់ងារលក់វត្ថុបុរាណ Johnathan Tucker AntoniaTozer Asian Art បានស្ម័គ្រចិត្តប្រគល់គ្រឿងអលង្ការមាស សម្រាប់លម្អរូបចម្លាក់ថ្មដែលមានអាយុកាលក្នុងសម័យអង្គរ មកឲ្យរាជរដ្ឋាភិបាល និងប្រជាជនកម្ពុជាវិញ។ ពិធីប្រគល់ និងទទួល ធ្វើឡើងនាថ្ងៃទី២០ ខែមេសា ឆ្នាំ២០១៧ នៅស្ថានអគ្គរាជទូតកម្ពុជាប្រចាំចក្រភពអង់គ្លេស នាទីក្រុងឡុងដ៍។

បើតាម លោក ថៃ នរសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ ឈុតអលង្ការមាសសម័យអង្គរ ដែលកម្ពុជាទទួលបាននោះ មានចំនួន១០គ្រឿង រួមមាន រង្វង់សម្រាប់លម្អព្រះសិរ ដើមដៃ និងដើមទ្រូង ក្រវិល ខ្សែក និងខ្សែក្រវ៉ាត់។

សម្រាប់លោក ថៃ នរសត្យា ឈុតអលង្ការនេះ ជារតនសម្បត្តិមហាសាលមួយ បន្ទាប់ពីកម្ពុជា បានទទួលព្រះសិរព្រះហរិហរៈ រចនាប័ទ្មភ្នំដា នាសតវត្សទី៦-៧ ពីសារមន្ទីរជាតិសិល្បៈអាស៊ីហ្គីមេ ប្រទេសបារាំង។ ព្រះសិរ និងដងខ្លួនព្រះហរិហរ បានតភ្ជាប់គ្នាឡើងវិញ កាលពីដើមឆ្នាំ២០១៦ បន្ទាប់ពីបែកគ្នាអស់រយៈកាល១៣០ឆ្នាំ។

អ្នកនាំពាក្យរូបនេះ បញ្ជាក់ឲ្យដឹងទៀតថា ឈុតអលង្ការមាសទាំងនេះ នឹងបញ្ជូនមកកម្ពុជាដើម្បីតម្កល់ទុកនៅក្នុងសារមន្ទីរជាតិ ក្នុងពេលឆាប់ៗខាងមុខ អាស្រ័យដោយការកំណត់ពេលវេលា និងការរៀបចំវេចខ្ចប់ពីភ្នាក់ងារលក់វត្ថុបុរាណនៅអង់គ្លេស។ ទន្ទឹមនឹងការបញ្ជាក់នេះដែរ ស្ថានទូតកម្ពុជាប្រចាំចក្រភពអង់គ្លេស តាមរយៈហ្វេសប៊ុករបស់ខ្លួន បានបញ្ជាក់ពីកិច្ចប្រជុំជាមួយអ្នកពាក់ព័ន្ធនៅអង់គ្លេស ដើម្បីបញ្ជូនគ្រឿងអលង្ការមាសនេះ មកកម្ពុជាវិញឲ្យបានឆាប់។

កាលពីថ្ងៃទី ២០ ខែមេសា ឆ្នាំ ២០១៧ ស្ថានទូតកម្ពុជាប្រចាំចក្រភពអង់គ្លេស សហការជាមួយមន្ត្រីជំនាញនៃក្រសួងវប្បធ៌មនិងវិចិត្រសិល្ប: បានរៀបចំកិច្ចប្រជុំជាមួយប៉ូលិសរបស់អង្គភាពសិល្ប: និងវត្ថុបូរាណក្រុងឡុងដ៏ និងតំណាងក្រុមហ៊ុន Jonathan Tucker Antonia Asian Art ដើម្បីពិភាក្សាអំពីការប្រគល់ និងបញ្ជូន គ្រឿងអលង្ការមាស នៃរូបចម្លាក់បុរាណខ្មែរ ត្រឡប់ទៅកម្ពុជាវិញឲ្យបានឆាប់»។

ក្រសួងវប្បធម៌ និងវប្បថម៌ និងវិចិត្រសិល្បៈ បានបញ្ជាក់នៅក្នុងសេចក្តីជូនព័ត៌មាននៅថ្ងៃទី២០ មេសាដែរថា ការទទួលត្រឡប់មកវិញនូវឈុតអលង្ការដ៏មានតម្លៃមហាសាលនេះ គឺដោយសារតែការប្រឹងប្រែង និងការសហការ រវាងរាជរដ្ឋាភិបាលកម្ពុជា និងរដ្ឋាភិបាលអង់គ្លេស ក៏ដូចជាការសហការពីភា្នក់ងារលក់វត្ថុបុរាណ Johnathan Tucker AntoniaTozer Asian Art ។ ក្រសួងវប្បធម៌ បានចាត់ទុកការប្រគល់បុរាណមកឲ្យកម្ពុជាវិញ ដោយស្ម័គ្រចិត្តរបស់ ភ្នាក់ងារលក់វត្ថុបុរាណនេះ ជាការចូលរួមលើកតម្លៃវប្បធម៌របស់ជាតិខ្មែរ៕