អន្តរជាតិ
អាមេរិកចំណាយលើយោធាច្រើនជាងគេ ឯចិននៅលេខ២, រុស្ស៊ីឡើងមកលេខ៣ យន្តហោះចម្បាំងរបស់អាមេរិកនៅមូលដ្ឋាន Kadena របស់ជប៉ុន (រូបភាព U.S. Pacific Command)
× អាមេរិក បានបន្តឈរនៅចំណាត់ទី ១ នៃប្រទេសដែលចំណាយលើវិស័យការពារជាតិច្រើនជាងគេប្រចាំឆ្នាំ ២០១៦ ខណៈចិន ក៏បានរក្សាចំណាត់ទី ២ របស់ខ្លួនដដែល។ ប៉ុន្តែរុស្ស៊ី បានហក់ឡើងមកឈរចំណាត់ទី ៣ ជំនួសអារ៉ាប៊ីសាអូឌីត ដែលធ្លាក់មកចំណាត់ទី ៤ វិញ។ នេះបើយោងតាមរបាយការណ៍ដែលចេញផ្សាយថ្ងៃទី២៤ ខែមេសា ដោយវិទ្យាស្ថានស្រាវជ្រាវមួយមានមូលដ្ឋានក្នុងទីក្រុង Stockolm ប្រទេសស៊ុយអែត។
របាយការណ៍វិទ្យាស្ថានស្រាវជ្រាវសន្តិភាពអន្តរជាតិស្តុកហូម (SIPRI) បង្ហាញថា ក្នុងឆ្នាំ២០១៦ អាមេរិក បានចំណាយលើការការពារជាតិដល់ទៅ ៦១១ពាន់លានដុល្លារ គឺជាប់ចំណាត់ទី ១តែម្ដង។ តាមពីក្រោយអាមេរិក គឺចិន បន្ទាប់មករុស្ស៊ី, អារ៉ាប៊ីសាអូឌីត និងឥណ្ឌា។ សម្រាប់អាមេរិក ថវិកាការពារជាតិប្រចាំឆ្នាំ២០១៦ ខ្ពស់ជាងការចំណាយក្នុងឆ្នាំ២០១៥ ហើយនឹងបន្តកើនឡើងទៀតក្នុងឆ្នាំ២០១៧ នេះក្រោមអាណត្តិប្រធានាធិបតី ដូណាល់ ត្រាំ ។
ចំណាត់ទី២ បន្ទាប់ពីអាមេរិក គឺមហាយក្សចិន ដែលកំពុងពង្រឹងវិស័យយោធាមិនចាញ់អាមេរិកឡើយ។ បើតាមរបាយការណ៍របស់ SIPRI ចិន ចំណាយទឹកប្រាក់ចំនួន ២១៥ពាន់លានដុល្លារក្នុងឆ្នាំ២០១៦ កើនឡើងចំនួន ៥,៤ភាគរយ បើប្រៀបធៀបការចំណាយក្នុងឆ្នាំ២០១៥ ។ ចិន បង្កើនការចំណាយលើវិស័យនេះ តាមរយៈការធ្វើទំនើបកម្មយោធារួមមានការសាងសង់នាវាមុជទឹកបន្ថែម និងការអភិវឌ្ឍអានុភាពដែនអាកាសជាដើម។
អ្វីដែលគួរឲ្យកត់សម្គាល់នោះ រុស្ស៊ី បានវ៉ាអារ៉ាប៊ីសាអូឌីត និងហក់ឡើងមកចំណាត់ទី ៣ នៃប្រទេសចំណាយច្រើនជាងគេ។ បើតាមទីភ្នាក់ងារព័ត៌មាន Sputnik រុស្ស៊ីចំណាយទឹកប្រាក់ចំនួន ៦៩,២ពាន់លានដុល្លារក្នុងឆ្នាំ២០១៦ ខ្ពស់ជាងការចំណាយក្នុងឆ្នាំ២០១៥ ចំនួន ៥,៩ភាគរយ។ តាមពិតទៅ រុស្ស៊ី គ្រោងចំណាយទឹកប្រាក់រាប់ពាន់លានដុល្លារលើវិស័យយោធារបស់ខ្លួន ប៉ុន្តែវិបត្តិសេដ្ឋកិច្ច និងការធ្លាក់ចុះតម្លៃរូបិយបណ្ណក្នុងស្រុក ធ្វើឲ្យគម្រោងចំណាយនេះ ធ្លាក់ចុះវិញ។
យ៉ាងណាមិញ ការងើបឡើងវិញនៃសេដ្ឋកិច្ច ធ្វើឲ្យការចំណាយខាងយោធាកើនឡើងដូចគ្នា។ បន្ទាប់ពីការធ្លាក់ចុះអស់ពេលជាច្រើនឆ្នាំ សេដ្ឋកិច្ចរបស់រុស្ស៊ី បានកើនឡើងវិញក្នុងត្រីមាសចុងក្រោយឆ្នាំ ២០១៦ ហើយវាក៏បានបង្កលក្ខណៈអំណោយផលសម្រាប់វិស័យការពារជាតិដែរ។ សម្រាប់ឆ្នាំ២០១៦ ការចំណាយសម្រាប់កិច្ចការការពារជាតិ មានចំណែកចំនួន ៥,៣ភាគរយនៃសេដ្ឋកិច្ចរុស្ស៊ី ដែលជាចំនួនដ៏ច្រើនចាប់តាំងពីការដួលរលំសហភាពសូវៀតក្នុងឆ្នាំ១៩៩១ ។
សម្រាប់ការចំណាយលើវិស័យយោធាទូទាំងពិភពលោកវិញ របាយការណ៍របស់ SIPRI រកឃើញថា ការចំណាយមានការកើនឡើងតិចតួច បើប្រៀធៀបនឹងការចំណាយសរុបក្នុងឆ្នាំ២០១៥ ។ ក្នុងឆ្នាំ២០១៦ ការចំណាយលើវិស័យយោធាលើពិភពលោក មានចំនួនដល់ទៅ១,៦៨៦ទ្រីលានដុល្លារ កើនឡើងចំនួន ០,៤ភាគរយ ដែលស្មើនឹង ២,២ភាគរយនៃផលិតផលក្នុងស្រុករបស់ពិភពលោកប្រចាំឆ្នាំ២០១៦ ៕
Tag:
អាមេរិក
ចិន
រុស្ស៊ី
យោធា
© រក្សាសិទ្ធិដោយ thmeythmey.com