អន្តរជាតិ
មេដឹកនាំអាស៊ាន៨ ទីប្រឹក្សារដ្ឋមីយ៉ាន់ម៉ា នឹងចូលរួមប្រជុំកំពូលអាស៊ាននៅហ្វីលីពីន កិច្ចប្រជុំកំពូលអាស៊ានលើកទី ២៩ ឆ្នាំ ២០១៦ នៅប្រទេសឡាវ
× ប្រមុខរដ្ឋនិងប្រមុខរដ្ឋាភិបាលប្រទេសអាស៊ានចំនួន៨ រួមជាមួយទីប្រឹក្សារដ្ឋមីយ៉ាន់នឹងអញ្ជើទៅចូលរួមក្នុងកិច្ចប្រជុំកំពូលអាស៊ានលើកទី ៣០ ដែលនឹងរៀបចំឡើងនៅក្រុងម៉ានីល ប្រទេសហ្វីលីពីននាថ្ងៃ ២៩ មេសា សប្តាហ៍នេះ។
កិច្ចប្រជុំកំពូលអាស៊ាននឹងត្រូវរៀបចំឡើងនៅចុងសប្តាហ៍នេះ ហើយមេដឹកនាំអាស៊ានទាំងអស់នឹងអញ្ជើញទៅចូលក្នុងវេទិកាតំបន់ដ៏សំខាន់នេះដែរ។ ក្នុងចំណោមប្រទេសទាំង ៩ មានតែមីយ៉ាន់ម៉ាមួយប៉ុណ្ណោះដែលមិនបញ្ជូនប្រមុខរដ្ឋទៅចូលរួមកិច្ចប្រជុំ តែបញ្ជូនរដ្ឋមន្ត្រីការបរទេសនិងជាទីប្រឹក្សារដ្ឋលោកស្រី អ៊ុងសាន ស៊ូជី ប៉ុណ្ណោះ។
យោងតាមសារព័ត៌មានហ្វីលីពីន Rappler ឯកអគ្គរដ្ឋទូតហ្វីលីពីនដែលទទួលបន្ទុករៀបចំកិច្ចប្រជុំអាស៊ានលោក Marciano Paynor Jr បានបញ្ជាក់ថា មេដឹកនាំអាស៊ានទាំង៨ដែលស្ថិតក្នុងកម្រិតប្រមុខរដ្ឋប្រមុខរដ្ឋាភិបាលនោះមានដូចជា សម្តេច ហ៊ុន សែន នាយករដ្ឋមន្ត្រីកម្ពុជា, លោក លីសៀន ឡុង នាយករដ្ឋមន្ត្រីសិង្ហបុរី, លោក ចូកូ វីដូដូ ប្រធានាធិបតីឥណ្ឌូណេស៊ី, លោកប្រាយុទ្ធ ចន្ទអូចា នាយករដ្ឋមន្ត្រីថៃ, លោក ណាជីព រ៉ាហ្សាក់ នាយករដ្ឋមន្ត្រីម៉ាឡេស៊ី, ព្រះចៅស៊ុលតង់ Hassanal Bolkiah ស្តេចព្រុយណេ, នាយករដ្ឋមន្ត្រីវៀតណាម ង្វៀង សួនហ្វ៊ុក, ប្រធានាធិបតីឡាវ ប៊ុនហាង វូរ៉ាជិត។ ចំណែកមីយ៉ាន់ម៉ា គឺតំណាងដោយរដ្ឋមន្ត្រីការបរទេសនិងជាទីប្រឹក្សារដ្ឋ អ៊ុងសាន ស៊ូជី ។
ពាក់ព័ន្ធវត្តមានលោកស្រី អ៊ុងសាន ស៊ូជីនេះ លោក Marciano Paynor Jr បានបញ្ជាក់ផងដែរលោកស្រីជាតំណាងឲ្យរដ្ឋាភិបាលមីយ៉ាន់ម៉ា ហើយកាលពីកិច្ចប្រជុំមុនៗក៏លោកស្រីទៅចូលរួមដូចគ្នា។ លោកបានលើកឡើងដូច្នេះ ៖«កាលពីមុនក៏ដូចគ្នាដែរ។ លោកស្រី អ៊ុងសាន ស៊ូ ជី បានតំណាងឲ្យមីយ៉ាន់ម៉ាក្នុងកិច្ចប្រជុំកំពូលអាស៊ាននៅក្នុងប្រទេសឡាវ»។
មេដឹកនាំអាស៊ានទាំងអស់នឹងធ្វើដំណើរទៅដល់ប្រទេសហ្វីលីពីននៅថ្ងៃ ២៨ មេសាព្រោះកិច្ចប្រជុំកំពូលអាស៊ានលើកទី៣០ នឹងត្រូវរៀបចំឡើងនៅថ្ងៃសៅរ៍នាទីក្រុង Pasay។ ប្រធានាធិបតីហ្វីលីពីនលោក Rodrigo Duterte នឹងធ្វើស្វាគមន៍វត្តមានមេដឹកនាអាស៊ាន និងបន្តធ្វើជាអធិបតីក្នុងកិច្ចប្រជុំនេះក្នុងនាមជាប្រធានអាស៊ានផងដែរ។
ហ្វីលីពីនបានត្រៀមលក្ខណៈរួចរាល់ហើយដើម្បីស្វាគមន៍កិច្ចប្រជុំអាស៊ាននិងកិច្ចប្រជុំពាក់ព័ន្ធក្នុងសប្តាហ៍នេះ។ ប៉ូលិសនិងទាហាន ៤១ ០០០នាក់ត្រូវបានពង្រាយនៅក្នុងរដ្ឋធានីម៉ានីលដើម្បីការពារសុវត្ថិភាពប្រតិភូជាន់ខ្ពស់និងមេដឹកនាំអាស៊ាន ព្រោះបញ្ហាសន្តិសុខហ្វីលីពីននៅស្ថិតក្រោមការគំរាមកំហែងដោយសារភេរវកម្មក្នុងស្រុកផងដែរប៉ុន្មានខែចុងក្រោយ៕
Tag:
កិច្ចប្រជុំកំពូលអាស៊ានលើកទី៣០
ហ្វីលីពីន
© រក្សាសិទ្ធិដោយ thmeythmey.com