អន្តរជាតិ
អាមេរិក ប្រញាប់ដំឡើងខែលការពារមីស៊ីល THAAD ទាំងប្រឈមការប្រឆាំងតវ៉ាពីពលរដ្ឋកូរ៉េ រថយន្តដឹកសម្ភាររបស់ប្រព័ន្ធការពារ THAAD ត្រូវបានការពារយ៉ាងតឹងរឹង ស្របពេលប្រជាជនកូរ៉េខាងត្បូងកំពុងតវ៉ា (រូបភាព Reuters)
× ប្រព័ន្ធការពារមីស៊ីល THAAD ត្រូវបានបញ្ជូនទៅកាន់ទីតាំងពង្រាយយ៉ាងប្រញាប់ប្រញាល់នៅយប់ថ្ងៃទី២៥ ខែមេសា។ កងទ័ពអាមេរិកប្រចាំកូរ៉េខាងត្បូង ក៏ចាប់ផ្ដើមដំឡើងប្រព័ន្ធការពារនេះភ្លាមៗដែរ បើទោះជាប្រជាជនកូរ៉េខាងត្បូង មិនពេញចិត្តវត្តមានប្រព័ន្ធការពារនេះក៏ដោយ។ មន្ទីរបញ្ចកោណ ក៏ប្រកាសដែរថា ប្រតិបត្តិការនេះ នឹងត្រូវបញ្ចប់ឲ្យបានលឿនបំផុតតាមដែលអាចធ្វើបាន ជាមួយការសហការរបស់កងទ័ពកូរ៉េខាងត្បូង។
ស្របពេលករប្រឈមមុខជាមួយកូរ៉េខាងជើងកំពុងតានតឹងខ្លាំង យោធាអាមេរិក បានប្រញាប់ប្រញាល់បញ្ជូនប្រព័ន្ធការពារមីស៊ីល THAAD ទៅកាន់ភាគខាងត្បូងរបស់កូរ៉េខាងត្បូង ដែលជាទីតាំងត្រូវពង្រាយ។ បើទោះជាមានការតវ៉ាពីសំណាក់ប្រជាជនក្នុងតំបន់ក៏ដោយ ទាំងអាមេរិក ទាំងកូរ៉េខាងត្បូង សុទ្ធតែអះអាងពីការបន្តគម្រោងពង្រាយប្រព័ន្ធការពារនេះ ព្រោះការគំរាមកំហែងពីសំណាក់មីស៊ីលកូរ៉េខាងជើង ចេះតែកើនឡើងនាពេលចុងក្រោយនេះ។
ដោយមិនចាំយូរ យោធាអាមេរិក ក៏បានចាប់ផ្ដើមដំឡើងប្រព័ន្ធការពារនេះភ្លាមដែរ។ ពោល គឺធ្វើទាំងយប់ និងមិនបានប្រកាសជាមុនឡើយ ហើយម្យ៉ាងទៀតនោះ ការវាយតម្លៃផលប៉ះពាល់បរិស្ថានរួមគ្នា ក៏មិនទាន់បញ្ចប់អ្វីដែរ។ សកម្មភាពបន្ទាន់នេះ ធ្វើឡើងក្រោយកងទ័ពអាមេរិក ទទួលបានសិទ្ធិពីរដ្ឋាភិបាលកូរ៉េខាងត្បូងលើការពង្រាយប្រព័ន្ធការពារ THAAD នៅតំបន់ Seongju ខេត្ត Gyeongsang ខាងជើង។
ទីភ្នាក់ងារព័ត៌មាន Yonhap ផ្សាយថា ឡានធំចំនួន៦ ដែលដឹករ៉ាដាស៊េរីខ្ពស់ X-band របស់ប្រព័ន្ធការពារ និងសម្ភារសំខាន់ៗផ្សេងទៀត បានធ្វើដំណើរទៅដល់ទីតាំងដំឡើងនៅភាគត្បូងទាំងយប់ ដែលជាទីតាំងហាមឃាត់សម្រាប់ប្រជាជនធម្មតា។ មន្ទីរបញ្ចកោណនិយាយថា ការពង្រាយ THAAD គឺជារឿងសំខាន់ក្នុងការការពារប្រជាជនកូរ៉េខាងត្បូង និងកងទ័ពសម្ព័ន្ធមិត្ត ប្រឆាំងនឹងការគំរាមនៃមីស៊ីលកូរ៉េខាងជើង។
ចំណែកយោធាកូរ៉េខាងត្បូង ក៏លើកឡើងដែរថា ការពង្រាយខែលការពារនេះ គឺដើម្បីធានាសុវត្ថិភាពជាមុន តាមរយៈការដំឡើងឧបករណ៍ដែលបានមកដល់ស្រាប់។ ឯរឿងវាយតម្លៃផលប៉ះពាល់បរិស្ថាន និងការសាងសង់សំណង់នៅទីតាំងត្រូវពង្រាយវិញ ប្រទេសទាំង២ នឹងប្រឹងប្រែងបញ្ចប់ទៅតាមផែនការ ព្រោះកូរ៉េខាងត្បូង និងអាមេរិក ចង់បញ្ចប់ការងារដំឡើងប្រព័ន្ធការពារ THAAD ឲ្យបានស្រេចបាច់នៅចុងឆ្នាំ២០១៧ តែម្ដង។
ច្បាស់ណាស់ថា ការដំឡើងប្រព័ន្ធការពារ THAAD ទាំងប្រញាប់ប្រញាល់បែបនេះ គឺជាការត្រៀមខ្លួនទប់ទល់ពីការវាយប្រហារណាមួយពីសំណាក់កូរ៉េខាងជើង ដែលកំពុងសង្កៀតធ្មេញ បង្អួតកម្លាំងយោធា និងគំរាមកម្ទេចកូរ៉េខាងត្បូង និងអាមេរិកឲ្យក្លាយជាផេះផង់។ យ៉ាងណាក្ដី វត្តមានរបស់ THAAD ធ្វើឲ្យប្រជាជនកូរ៉េខាងត្បូងមួយចំនួនមិនសប្បាយចិត្តឡើយ។ ក្នុងប្រតិបត្តិការទាំងយប់នោះ អ្នកតវ៉ាជាច្រើន ក៏បានប៉ះទង្គិចជាមួយប៉ូលិសទៀត។
ក្រុមបាតុករស្រែកថា៖ «គ្មាន THAAD គ្មានសង្គ្រាម។ អាមេរិក! អ្នកជាមិត្ត ឬក៏ជាម្ចាស់អាណានិគម?»៕
Tag:
កូរ៉េខាងត្បូង
កូរ៉េខាងជើង
អាមេរិក
THAAD
© រក្សាសិទ្ធិដោយ thmeythmey.com