ជាតិ
ជម្លោះសមុទ្រចិន៖ លោក ប្រាក់ សុខុន ថា កម្ពុជានឹងខិតខំបញ្ចៀសផលអវិជ្ជមានរវាងអាស៊ាន និងចិន
× ភ្នំពេញ៖ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក ប្រាក់ សុខុន បានអះអាងថា កម្ពុជាមានបំណងបញ្ចៀសភាពតានតឹង និងប៉ះពាល់អវិជ្ជមានរវាងទំនាក់ទំនងអាស៊ាន និងចិន។ ការអះអាងរបស់លោក ប្រាក់ សុខុន បែបនេះ នៅក្នុងជំនួបពិភាក្សាជាមួយលោក Patrick Murphy ឧបការីរងរដ្ឋមន្ត្រីការបរទេស អាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក។
ក្រោយពីជំនួបទ្វេភាគីកម្ពុជា និងអាមេរិក លោក ជុំ សុន្ទរី បានប្រាប់អ្នកសារព័ត៌មានពីបញ្ហាសមុទ្រចិនខាងត្បូងថា កម្ពុជាដែលជាប្រទេសពុំជាប់ពាក់ព័ន្ធនឹងទឹកដីជម្លោះនោះ នៅតែរក្សាជំហរបញ្ចៀសសកម្មភាពតានតឹង នឹងសភាពការណ៍ណាមួយ ដែលកើតឡើងក្នុងដែនសមុទ្រចិនខាងត្បូងនេះ។ អ្នកនាំពាក្យក្រសួងការបរទេសរូបនេះ បានស្រង់សម្តីរបស់លោក ប្រាក់ សុខុន ដែលបានប្រាប់លោក Patrick Murphy យ៉ាងដូច្នេះថា៖«កម្ពុជាបានខិតខំបញ្ចៀសផលប៉ះពាល់ជាអវិជ្ជមានរវាងទំនាក់ទំនងអាស៊ាន និងចិន និងសម្របសម្រួលរវាងអាស៊ាននិងចិន»។
បន្ថែមពីនេះលោក ប្រាក់ សុខុន ក៏បានប្រាប់លោក Murphy ថា កម្ពុជាចង់ឃើញការវិវត្តការងារជាវិជ្ជមាន រវាងអាស៊ាន និងចិន ក្នុងនោះរួមមាន ការតាំងចិត្តរបស់អាស៊ាន និងចិនក្នុងការអនុវត្តសេចក្តីថ្លែងការណ៍ ស្តីពី ការប្រតិបត្តិ (DOC) ដោយពេញលេញ និងប្រសិទ្ធភាព។ ការបង្កើតទំនាក់ទំនង Hotline រវាងក្រសួងការបរទេសអាស៊ាន និងចិន។ ការសន្ទនាប្រកបដោយវិជ្ជមានរវាងប្រទេសចិន និងសមាជិកអាស៊ានដែលមានជម្លោះទឹកដីផ្ទាល់ រួមទាំង ការប្តេជ្ញារបស់អាស៊ាន និងចិនលើក្របខ័ណ្ឌក្រមប្រតិបត្តិ (COC) នៅពាក់កណ្តាល ឆ្នាំ២០១៧ ដែលជាឯកសារគោលសម្រាប់កាត់តែងក្រមប្រតិបត្តិ (COC)។ នេះបើតាមលោក ជុំ សន្ទរី៕
Tag:
ប្រាក់ សុខុន
ជុំ សុន្ទរី
Patrick Murphy
ចិន
អាស៊ាន
អាមេរិក
ការបរទេស
© រក្សាសិទ្ធិដោយ thmeythmey.com