អន្តរជាតិ
ត្រាំ នៅតែយកទណ្ឌកម្មជាអាទិភាពមិនមែនកម្លាំងបាយដើម្បីដោះស្រាយនុយក្លេអ៊ែរកូរ៉េខាងជើង ប្រធានាធិបតី ដូណាល់ ត្រាំ អង្គុយក្បែររដ្ឋមន្ត្រីការបរទេស Rex Tillerson និងរដ្ឋមន្ត្រីការពារជាតិ James Mattis (រូបភាព Reuters)
× មន្ត្រីទទួលបន្ទុកសន្តិសុខជាតិអាមេរិក បានប្រាប់សមាជិកព្រឹទ្ធសភាទាំង ១០០នាក់ ថា បញ្ហាកូរ៉េខាងជើង នឹងត្រូវបន្តដោះស្រាយដោយការរឹតបន្តឹងទណ្ឌកម្ម និងតាមរយៈការដាក់សម្ពាធរបស់សហគមន៍អន្តរជាតិ ។ ទន្ទឹមនឹងការចាត់ទុកកូរ៉េខាងជើងជាការគំរាមកំហែងដ៏ធំរបស់ខ្លួន អាមេរិក ក៏នឹងបើកទ្វារចរចាសម្រាប់កូរ៉េខាងជើងដែរ បើទោះជាកន្លងមក អាមេរិកធ្លាប់គំរាមប្រើកម្លាំងយោធា បង្ខំឲ្យកូរ៉េខាងជើងបោះបង់មហិច្ឆតានុយក្លេអ៊ែរក្ដី។
សមាជិកព្រឹទ្ធសភាទាំង ១០០នាក់ បានទៅជុំគ្នានៅសេតវិមាននៅថ្ងៃទី២៦ ខែមេសា ដើម្បីស្ដាប់ការរាយការណ៍របស់រដ្ឋបាលប្រធានាធិបតី ដូណាល់ ត្រាំ លើបញ្ហាកូរ៉េខាងជើង។ នេះ ជារឿងកម្រកើតឡើងដែលមន្ត្រីរដ្ឋាភិបាលអញ្ជើញសមាជិកព្រឹទ្ធមករាយការណ៍ដល់សេតវិមាន និងខុសពីទម្លាប់ដែលជាធម្មតាមន្ត្រីរដ្ឋាភិបាលជាអ្នកទៅបកស្រាយបញ្ហាសំខាន់ៗដល់វិមាន Capitol នោះ។ មន្ត្រីទទួលបន្ទុកសន្តិសុខជាតិ ក៏បានប្រាប់សមាជិកព្រឹទ្ធសភាពីជំហររបស់រដ្ឋាភិបាលលើរឿងកូរ៉េខាងជើងនេះ។
រដ្ឋបាលប្រធានាធិបតី ត្រាំ បានបញ្ជាក់ថា អាមេរិកនឹងជំរុញឲ្យកូរ៉េខាងជើងបញ្ឈប់កម្មវិធីនុយក្លេអ៊ែរតាមរយៈការដាក់ទណ្ឌកម្មកាន់តែធ្ងន់ និងការដាក់សម្ពាធរបស់អន្តរជាតិ តែអាមេរិកក៏មិនបិទទ្វារចរចាដែរ។ ជំហរបែបនេះ គឺផ្ទុយពីការលើកឡើងមុនៗរបស់មន្ត្រីធំៗរបស់រដ្ឋាភិបាលអាមេរិក ដែលគំរាមប្រើទ័ពដើម្បីដោះស្រាយបញ្ហាសាំញាំនេះ ជាជាងការវិលត្រឡប់ទៅរកតុចរចាដែលគ្មានប្រសិទ្ធភាពអ្វីសោះ។
រដ្ឋមន្ត្រីការបរទេស រដ្ឋមន្ត្រីការពារជាតិ នាយកចារកម្មជាតិ និងនាយសេនាធិការចម្រុះកងទ័ព ជាអ្នករាយការណ៍ស្ថានការណ៍កូរ៉េខាងជើង និងច្រកចេញនានាដល់សមាជិកព្រឹទ្ធសភា។ ក្នុងសេចក្ដីថ្លែងការណ៍រួមក្រោយកិច្ចប្រជុំកម្រនេះ មន្ត្រីជាន់ខ្ពស់ទាំង៤ និយាយថា កូរ៉េខាងជើង គឺជាគ្រោះថ្នាក់ដល់សន្តិសុខជាតិ និងជាបញ្ហាអាទិភាពក្នុងនយោបាយការបរទេសរបស់រដ្ឋបាល ដូណាល់ ត្រាំ ហើយលោក ត្រាំ ផ្ទាល់ ក៏បញ្ជាឲ្យសើរើឡើងវិញនយោបាយការបរទេសលើកូរ៉េខាងជើងដែរ។
បើទោះបានបញ្ជូននាវាចម្បាំងទៅកៀកកូរ៉េខាងជើងយ៉ាងគគ្រឹកគគ្រេងក្ដី មន្ត្រីទទួលបន្ទុកសន្តិសុខជាតិ ៤នាក់ ក៏ប្រកាសថា អាមេរិកចង់បានការលុបបំបាត់នុយក្លេអ៊ែរកូរ៉េខាងជើងតាមផ្លូវសន្តិភាព និងរក្សាស្ថិរភាពតំបន់ផង។ ពោល គឺអាមេរិក ក៏នឹងសហការជាមួយសម្ព័ន្ធមិត្តរបស់ខ្លួន និងមហាអំណាចក្នុងតំបន់មានចិនជាដើម ដើម្បីបង្កើនទណ្ឌកម្មខ្លាំងថែមទៀត។ ជាមួយវត្តមានរបស់ចិន អាមេរិកជឿថា បញ្ហាកូរ៉េខាងជើង នឹងអាចរកច្រកចេញបានមិនខាន។
យ៉ាងណាក្ដី អាមេរិក ក៏អះអាងដែរថា ខ្លួន នឹងបន្តការពារខ្លួនឯង និងសម្ព័ន្ធមិត្តដដែល។ ការបញ្ជូននាវាចម្បាំងជាច្រើនគ្រឿង និងការដំឡើងប្រព័ន្ធការពារ THAAD ទាំងប្រញាប់ប្រញាល់នៅកូរ៉េខាងត្បូង សុទ្ធតែជាវិធានការរបស់អាមេរិកដើម្បីការពារសម្ព័ន្ធមិត្តរបស់ខ្លួន បើទោះជាមានការប្រឆាំងទាំងប្រជាជនកូរ៉េខាងត្បូង និងពីសំណាក់ចិនក៏ដោយ៕
Tag:
អាមេរិក
កូរ៉េខាងជើង
ដូណាល់ ត្រាំ
នុយក្លេអ៊ែរ
© រក្សាសិទ្ធិដោយ thmeythmey.com