អន្តរជាតិ
ចិន ស្នើអាមេរិក-កូរ៉េខាងត្បូង និងកូរ៉េខាងជើង ថយមួយជំហានម្នាក់ ដើម្បីបន្ថយកម្ដៅតានតឹង រដ្ឋមន្ត្រីការបរទេសចិន វ៉ាង យី និងសមភាគីអាល្លឺម៉ង់ Sigmar Gabriel (រូបភាព Xinhua)
× ប្រមុខការទូតចិន វ៉ាង យី បានទទូចជាថ្មីម្ដងទៀតឲ្យអាមេរិក និងកូរ៉េខាងត្បូង បញ្ឈប់ការធ្វើសមយុទ្ធរួមគ្នា ព្រោះសមយុទ្ធនេះក៏ជាដើមហេតុមួយ ដែលធ្វើឲ្យកូរ៉េខាងជើងក្ដៅក្រហាយដែរ។ ចិន ក៏ស្នើឲ្យកូរ៉េខាងជើងផ្អាកកម្មវិធីនុយក្លេអ៊ែររបស់ខ្លួន ដើម្បីបន្ធូរបន្ថយកម្ដៅឧបទ្វីបកូរ៉េ។ ចំពោះចិន បើភាគីជម្លោះទាំងសងខាង អាចដកថយម្នាក់ជំហាន នោះស្ថានការណ៍ពិតជាអាចធូរស្រាល ហើយអាចឈានដល់ការចរចាឡើងវិញផង។
រដ្ឋមន្ត្រីការបរទេសចិន បានអំពាវនាវឲ្យភាគីជម្លោះនៅឧបទ្វីបកូរ៉េមានអាមេរិក កូរ៉េខាងត្បូង និងកូរ៉េខាងជើងជាដើម បញ្ឈប់ទង្វើផ្គើនដាក់គ្នាទៅវិញទៅមកដើម្បីរក្សាស្ថិរភាពតំបន់។ ចិន ទំនងជាកំពុងទម្លាក់កំហុសឲ្យភាគីទាំងសងខាង ចំពោះការឡើងកម្ដៅនៃភាពតានតឹងនៅឧបទ្វីបកូរ៉េ ដែលគេឯងបារម្ភថាអាចរាលដាលទៅជាសង្គ្រាមលោកលើកទី៣ ។ ចំពោះមុខនៃបញ្ហានេះ ចិន ក៏ព្រមានដែរថា ផលវិបាកនៃសង្គ្រាម ដែលអាចផ្ទុះឡើងគ្រប់ពេល ពិតជាពិបាកស្មានណាស់។
ថ្លែងពីរដ្ឋធានីបែរឡាំងនៅថ្ងៃទី២៦ ខែមេសា ប្រមុខការទូតចិន វ៉ាង យី ទទួលស្គាល់ថា ការបន្តកម្មវិធីនុយក្លេអ៊ែររបស់កូរ៉េខាងជើង គឺជារឿងផ្ទុយសេចក្ដីរបស់ក្រុមប្រឹក្សាសន្តិសុខយ៉ាងជាក់ច្បាស់។ ប៉ុន្តែលោកក៏បានរិះគន់សមយុទ្ធប្រចាំឆ្នាំរួមគ្នាដ៏គគ្រឹកគគ្រង អូសបន្លាយពេលយូរ រវាងអាមេរិក និងកូរ៉េខាងត្បូងដែរ។ លោក និយាយថា ល្បែងសង្គ្រាមរបស់សម្ព័ន្ធមិត្តទាំង២ នេះ មិនអាចជួយអ្វីដល់ការរកដំណោះស្រាយឡើយ។
ចំពោះមុខសមភាគីអាល្លឺម៉ង់ Sigma Gabriel រដ្ឋមន្ត្រីការបរទេសចិនរូបនេះ ក៏បង្ហាញការព្រួយបារម្ភ ជុំវិញគ្រោះថ្នាក់នៃជម្លោះដែលមិនអាចស្មានត្រូវ ស្របពេលសន្តិសុខ និងស្ថិរភាពតំបន់ កំពុងស្ថិតក្នុងស្ថានភាពផុយស្រួលខ្លាំងណាស់នារយៈពេលចុងក្រោយនេះ។ បើតាមទីភ្នាក់ងារព័ត៌មាន AFP លោក វ៉ាង យី សង្កត់ធ្ងន់ថា៖ «យើងមិនអាចប្រថុយនឹងគ្រោះថ្នាក់បានឡើយ ទោះជាវាមានលទ្ធភាពផ្ទុះចេញត្រឹម ១ភាគរយក្ដី ព្រោះផលវិបាកលើមមិនឃើញឡើយ»។
តាមពិតទៅ ជារៀងរាល់ឆ្នាំ ស្ថានការណ៍នៅឧបទ្វីបកូរ៉េ តែងឡើងកម្ដៅខ្លាំងនៅរយៈពេលប៉ុន្មានខែនេះ ព្រោះអាមេរិក និងកូរ៉េខាងត្បូង តែងធ្វើសមយុទ្ធយោធារួមគ្នាជាច្រើនខែ។ កូរ៉េខាងជើង បានសមយុទ្ធរួមគ្នាដែលចូលរួមដោយកងទ័ពជាច្រើនពាន់នាក់មកពីប្រទេសទាំង២ ជាការប្រុងប្រៀបធ្វើសង្គ្រាម ដែលតម្រូវឲ្យខ្លួនត្រូវឆ្លើយតបវិញឲ្យបានស័ក្ដិសម។ ប៉ុន្តែ អាមេរិក និងកូរ៉េខាងត្បូង អះអាងថា សមយុទ្ធរួមគ្នានេះ គ្រាន់តែជាការការពារខ្លួនប៉ុណ្ណោះ។
ចិន ដែលជាអ្នកជិតខាងរបស់កូរ៉េខាងជើង ពិតជាមិនចង់ឃើញសង្គ្រាមផ្ទុះឡើងទេ ហើយរឹតតែមិនចង់ឃើញវត្តមានកងទ័ពអាមេរិកនៅមាត់ទ្វារផ្ទះរបស់ខ្លួនទៅទៀត។ ចិន ក៏ជំទាស់ដាច់ខាតបំណងប្រើប្រាស់កម្លាំងទ័ពរបស់រដ្ឋបាលប្រធានាធិបតី ដូណាល់ ត្រាំ ហើយតែងស្នើឲ្យភាគីពាក់ព័ន្ធទាំងអស់ ជ្រើសរើសផ្លូវចរចាវិញ។ ប៉ុន្តែកូរ៉េខាងជើង មិនស្ដាប់បានតាមសំណើនេះទេ ហើយអាមេរិកឯណោះ ថែមទាំងនិយាយថា ការចរចាជាច្រើនឆ្នាំមកនេះ គ្មានបានប្រយោជន៍អ្វីឡើយ៕
Tag:
ចិន
កូរ៉េខាងត្បូង
កូរ៉េខាងជើង
អាមេរិក
វ៉ាង យី
© រក្សាសិទ្ធិដោយ thmeythmey.com