អន្តរជាតិ
មេទ័ពអាមេរិក ចង់ពង្រាយប្រព័ន្ធការពារមីស៊ីលការពារកោះហាវ៉ៃពីការវាយប្រហារកូរ៉េខាងជើង ប្រមុខកងទ័ពអាមេរិកប្រចាំតំបន់ប៉ាស៊ីហ្វិក ឧត្តមនាវី Harry Harris
× ស្របពេលកូរ៉េខាងជើងបង្កើនសមត្ថភាពមីស៊ីលរបស់ខ្លួនដែលអាចវាយប្រហារដល់អាមេរិក ប្រមុខកងទ័ពអាមេរិកប្រចាំតំបន់ប៉ាស៊ីហ្វិក ឧត្តមនាវី Harry Harris បង្ហាញបំណងបង្កើនចំនួនប្រព័ន្ធការពារបន្ថែមទៀតនៅតំបន់ប៉ាស៊ីហ្វិក។ ឧត្តមសេនីយ៍រូបនេះ អះអាងថា កោះហាវ៉ៃ មិនមានសុវត្ថិភាពឡើយ បើកូរ៉េខាងជើងពិតជាវាយប្រហារមែននោះ។
មេបញ្ជាការកងទ័ពអាមេរិកតំបន់ប៉ាស៊ីហ្វិក Harry Harris បានទៅផ្ដល់សក្ខីកម្មនៅឯវិមាន Capitol នៅថ្ងៃទី២៦ ខែមេសា។ ចំពោះមុខគណៈកម្មាធិការយោធារដ្ឋសភា ឧត្តមនាវី Harry Harris និយាយថា ការគំរាមកំហែងរបស់មីស៊ីលកូរ៉េខាងជើង កើនឡើងយ៉ាងខ្លាំង ព្រោះប្រទេសនេះប្រឹងប្រែងអភិវឌ្ឍមីស៊ីលរបស់ខ្លួនឥតឈប់ឈរ រហូតមានមីស៊ីលអាចបំពាក់ក្បាលគ្រាប់នុយក្លេអ៊ែរបាញ់បានចម្ងាយឆ្ងាយទៀតផង។
ជាមួយនឹងការគំរាមកំហែងនេះ ឧត្តមនាវីផ្កាយ៤ Harris ក៏ស្នើឲ្យមានបង្កើនរ៉ាដា និងប្រព័ន្ធស្កាត់មីស៊ីលឲ្យកាន់តែច្រើនថែមទៀត ជាការការពារខ្លួន។ លោកនិយាយទៀតថា សូម្បីកោះហាវ៉ៃ ក៏ទំនងជាមិនអាចការពារពីការវាយប្រហាររបស់មីស៊ីលកូរ៉េខាងជើងបានដែរ ដែលរឿងនេះជាមូលហេតុតម្រូវបង្កើនខែលការពារនៅតំបន់ប៉ាស៊ីហ្វិកឲ្យច្រើននោះ។ អ្វីកាន់ព្រួយបារម្ភនោះ កូរ៉េខាងជើង ក៏ប្រកាសដែរថា ខ្លួនមានមីស៊ីលអន្តរទ្វីបបាញ់ដល់អាមេរិកទៅទៀត។
មិនត្រឹមតែកោះហាវ៉ៃដែលរងការគំរាមនោះ បើតាមការរាយការណ៍របស់មេបញ្ជាការកងទ័ពអាមេរិកប្រចាំប៉ាស៊ីហ្វិករូបនេះ កូរ៉េខាងត្បូង ជប៉ុន ក៏ប្រឈមមុខគ្រោះថ្នាក់ខ្ពស់ដូចគ្នា ហើយគេមិនអាចធានាថា កូរ៉េខាងជើងមិនធ្វើអ្វីឡើយ ពេលមានសមត្ថភាពមែននោះ។ ជាការពិត បើគិតលើចម្ងាយរវាងកូរ៉េខាងជើង ទៅកូរ៉េខាងត្បូង និងជប៉ុននោះ មីស៊ីលដែលកូរ៉េខាងជើងមាន ពិតជាអាចបង្កការគំរាមសម្រាប់សម្ព័ន្ធមិត្តអាមេរិកទាំង២បាន។
មកទល់ពេលនេះ អាមេរិក កំពុងដំឡើងជាបណ្ដើរហើយនូវផ្នែកមួយចំនួនប្រព័ន្ធការពារមីស៊ីល THAAD នៅកូរ៉េខាងត្បូង ខណៈស្ថានការណ៍នៅឧបទ្វីបកូរ៉េកំពុងតានតឹងខ្លាំង។ នេះជាប្រព័ន្ធមីស៊ីល THAAD ទី១ នៅតំបន់ប៉ាស៊ីហ្វិក ដែលទាំងកូរ៉េខាងត្បូង និងអាមេរិក និយាយថាពង្រាយដើម្បីការពារខ្លួន។ ក្រៅពីប្រព័ន្ធការពារទំនើបដាក់លើដីគោក អាមេរិក ក៏មាននាវាល្បាតបំពាក់ប្រព័ន្ធការពារ Aegis ជាច្រើនគ្រឿងនៅជុំវិញតំបន់ឧបទ្វីបកូរ៉េដែរ។
អ្វីគួរឲ្យកត់សម្គាល់នោះ វត្តមានរបស់មេបញ្ជាការជាន់ខ្ពស់រូបនេះនៅវិមាន Capitol កើតឡើងស្របពេលដែលរដ្ឋបាលប្រធានាធិបតី ដូណាល់ ត្រាំ អញ្ជើញសមាជិកព្រឹទ្ធសភាទាំងអស់ទៅស្ដាប់ការរាយការណ៍រឿងកូរ៉េខាងជើងនេះដែរ។ ប៉ុន្តែអ្វីដែលចម្លែកនោះ រដ្ឋបាលអាមេរិក ហាក់ដកឃ្លាពីការប្រើប្រាស់កម្លាំងយោធា និងងាកទៅបន្តវិធានការចាស់វិញ ដោយផ្ដោតលើការដាក់ទណ្ឌកម្ម និងដាក់សម្ពាធឲ្យកូរ៉េខាងជើង ចូលតុចរចាវិញ៕
Tag:
អាមេរិក
កូរ៉េខាងជើង
Harry Harris
© រក្សាសិទ្ធិដោយ thmeythmey.com