ត្រាំ ទារលុយកូរ៉េខាងត្បូង១ពាន់លានដុល្លាថ្លៃដំឡើងខែលការពារមីស៊ីល តែកូរ៉េខាងត្បូងមិនព្រម

អន្តរជាតិ

ត្រាំ ទារលុយកូរ៉េខាងត្បូង១ពាន់លានដុល្លាថ្លៃដំឡើងខែលការពារមីស៊ីល តែកូរ៉េខាងត្បូងមិនព្រម

28, Apr 2017 , 2:48 pm

រូបភាព

ដោយ: តន ចាន់រិទ្ធារ៉ា

ប្រធានាធិបតី ដូណាល់ ត្រាំ បានទារលុយពីសម្ព័ន្ធមិត្ត គឺកូរ៉េខាងត្បូង ថ្លៃពង្រាយប្រព័ន្ធការពារមីស៊ីល THAAD ។ ប្រធានាធិបតីដែលជាអ្នកជំនួញរូបនេះ និយាយថា ប្រព័ន្ធការពារមីស៊ីល ដែលត្រូវបានដំឡើងបណ្ដើរៗហើយនោះ មានតម្លៃដល់រាប់រយលានដុល្លារឯណោះ ហើយវាជារឿងត្រឹមត្រូវដែលកូរ៉េខាងត្បូង បង់ថ្លៃប្រព័ន្ធការពារនេះ។ យ៉ាងណាក្ដី កូរ៉េខាងត្បូងឆ្លើយវិញថា ខ្លួនមិនព្រមបង់ថ្លៃតាមការទាមទារ។

ស្ថានការណ៍ឧបទ្វីបកូរ៉េកំពុងតានតឹងខ្លាំង រហូតដល់អាមេរិក និងកូរ៉េខាងត្បូង ប្រញាប់ប្រញាល់ដំឡើងផ្នែកសំខាន់ៗនៃប្រព័ន្ធការពារមីស៊ីល THAAD នៅទីលានកូនហ្គោលនៅតំបន់ភាគត្បូង ជាការត្រៀមទប់ទល់មីស៊ីលកូរ៉េខាងជើង។ ស្របពេលប្រព័ន្ធការពារមីស៊ីលទំនើបនេះ ត្រៀមខ្លួនចាប់ស្ទាក់មីសីលកូរ៉េខាងជើង នៅអាមេរិកឯណោះ ប្រធានាធិបតី ដូណាល់ ត្រាំ បែរជាចង់ឲ្យកូរ៉េខាងត្បូង បង់ថ្លៃពង្រាយប្រព័ន្ធការពារនេះទៅវិញ។

ក្នុងកិច្ចសម្ភាសជាមួយទីភ្នាក់ងារព័ត៌មាន Reuters ដែលចេញផ្សាយនៅថ្ងទី២៨ ខែមេសា ប្រធានាធិបតី ត្រាំ និយាយថា៖ «ខ្ញុំស្នើកូរ៉េខាងត្បូងថា វាជារឿងសមរម្យ ប្រសិនបើពួកគេបង់មែន។ ប្រព័ន្ធការពារនេះ មានតម្លៃ ១ពាន់លានដុល្លារឯណោះ»។ បើតាមកិច្ចសម្ភាសដដែល លោក ត្រាំ ក៏ឆ្ងល់ថា ហេតុអ្វីបានជាអាមេរិកត្រូវចេញថ្លៃប្រព័ន្ធការពារនេះ ដើម្បីការពារការគំរាមកំហែងមីស៊ីលកូរ៉េខាងជើង។

យ៉ាងណាក្ដី កូរ៉េខាងត្បូង ដែលជាសម្ព័ន្ធមិត្តរបស់អាមេរិកចាប់តាំងពីសម័យសង្គ្រាមកូរ៉េឆ្នាំ១៩៥០ ដល់ឆ្នាំ១៩៥៣ មិនព្រមបង់លុយតាមការទាមទាររបស់ប្រធានាធិបតី ត្រាំ ឡើយ។ ក្រសួងការពារជាតិកូរ៉េខាងត្បូងនិយាយថា ក្រោមកិច្ចព្រមព្រៀងរវាងប្រទេសទាំង២ កូរ៉េខាងត្បូង ជាអ្នកទទួលបន្ទុកលើទីតាំងត្រូវពង្រាយប្រព័ន្ធការពារ THAAD ចំណែកឯអាមេរិកជាអ្នកចេញថ្លៃលើការពង្រាយ និងប្រតិបត្តិការឧបករណ៍ទំនើបនេះ។ ហើយគោលការណ៍ គឺមិនមានការប្រែប្រួលអ្វីទាំងអស់។

ក្រៅពីទារលុយកូរ៉េខាងត្បូងថ្លៃពង្រាយ THAAD ប្រធានាធិបតីមានអតីតជាសេដ្ឋីអចលនទ្រព្យរូបនេះ ក៏គំរាមលុបចោលកិច្ចព្រមព្រៀងពាណិជ្ជកម្មសេរីទ្វេភាគីថែមទៀត។ លោក ត្រាំ បានហៅកិច្ចព្រមព្រៀងពាណិជ្ជកម្មអាមេរិក និងកូរ៉េខាងត្បូង ជាកិច្ចព្រមព្រៀងដ៏អាក្រក់ ដែលបន្សល់ទុកដោយរដ្ឋមន្ត្រីការបរទេសលោកស្រី ហ៊ីឡារី គ្លីនតុន។ ចំពោះអនាគតកិច្ចព្រមព្រៀងពាណិជ្ជកម្មនេះ មាន២ គឺត្រូវលុបចោល ឬត្រូវចរចាឡើងវិញ។

ការទាមទារថ្លៃចំណាយរបស់ប្រធានាធិបតី ត្រាំ លើការការពារសម្ព័ន្ធមិត្តរបស់ខ្លួន មិនមែនជារឿងភ្ញាក់ផ្អើលទេ។ កាលពេលឃោសនាបោះឆ្នោត លោក ត្រាំ ក៏ធ្លាប់ទារលុយថ្លៃការពារពីកូរ៉េខាងត្បូងនិងជប៉ុន និងដកទ័ពចេញអាមេរិកទៀតផង។ អ្វីដែលប្លែកនោះ គឺខណៈដែលលោកធ្វើឲ្យឧបទ្វីបកូរ៉េទាំងមូលដើរទៅរកការវាយប្រយុទ្ធគ្នា លោកបែរជាទារថ្លៃចំណាយពីកូរ៉េខាងត្បូងទៅវិញ។ ប្រព័ន្ធការពារមីស៊ីលនេះទៀតសោត ក៏គ្រោងនឹងដំណើរការនៅប៉ុន្មានថ្ងៃខាងមុខនេះ ក្រោយទៅដល់ទីតាំងរួចហើយ។ គេ ក៏មិនដឹងថាកូរ៉េខាងត្បូង នឹងឆ្លើយតបបែបណាទៀតនឹងសកម្មភាពស្មានមិនដល់របស់លោក ត្រាំ ដែរ៕