ជាតិ
ជិតដល់ថ្ងៃចូលបំភ្លឺនៅតុលាការលោក ជុន ច័ន្ទបុត្រ បានចាកចេញពីកម្ពុជា
× ភ្នំពេញ៖ លោក ហួត ឃីតវុទ្ធី ហៅ ជុន ច័ន្ទបុត្រ អនុប្រធានវិទ្យុអាស៊ីសេរីផ្នែកខេមរភាសា បានចាកចេញពីប្រទេសកម្ពុជា ឆ្ពោះទៅកាន់ប្រទេសថៃហើយ។ ព័ត៌មាននេះ ត្រូវបានលោក ជី វីតា ប្រធានការិយាល័យវិទ្យុអាស៊ីសេរីប្រចាំនៅកម្ពុជា ឆ្លើយប្រាប់អ្នកសារព័ត៌មាននៃវិទ្យុស្ត្រីនៅថ្ងៃសៅរ៍នេះ។
តាមរយៈការឆ្លើយឆ្លងតាមទូរសព្ទជាមួយនឹងអ្នកសារព័ត៌មាននៃវិទ្យុស្ត្រី លោក ជី វីតា បានអះអាងថា ដំណើរបស់លោក ជុន ច័ន្ទបុត្រ ទៅកាន់ប្រទេសថៃក្នុងពេលនេះ គឺដើម្បីបំពេញកិច្ចការមួយចំនួន ដែលទាក់ទងនឹងវិទ្យុអាស៊ីសេរី។ យ៉ាងណា លោក ជី វីតា មិនបានប្រាប់ឲ្យច្បាស់នោះទេ ថាកិច្ចការអ្វី ដែលលោក ជុន ច័ន្ទបុត្រ ត្រូវបំពេញនៅក្នុងប្រទេសថៃ។
ការចាកចេញពីប្រទេសកម្ពុជារបស់លោក ជុន ច័ន្ទបុត្រ ក្នុងកាលៈទេសៈនេះ ធ្វើឲ្យសាធារណជនមួយចំនួន សង្ស័យថា លោក ទំនងជាចង់គេចវេះពីការចូលបំភ្លឺនៅក្នុងតុលាការ។ ប៉ុន្តែ បើតាមលោក ជី វីតា ដដែល លោក ជុន ច័ន្ទបុត្រ នឹងត្រឡប់មកប្រទេសកម្ពុជាវិញ មុនកាលកំណត់របស់តុលាការ។
លោក ជុន ច័ន្ទបុត្រ ត្រូវបានព្រះរាជអាជ្ញានៃសាលាដំបូងរាជធានីភ្នំពេញ ចេញដីកាកោះ ឲ្យចូលបំភ្លឺ នៅថ្ងៃទី២ ខែឧសភា ឆ្នាំ២០១៧។ ការកោះហៅនេះ គឺដោយសារតែលោក ជុន ច័ន្ទបុត្រ បានចូលទៅជួបមន្ត្រីនិងសកម្មជនគណបក្សសង្គ្រោះជាតិ នៅក្នុងពន្ធាគារព្រៃ កាលពីថ្ងៃទី១៩ ខែមេសា ឆ្នាំ២០១៧ កន្លងទៅ។
សមត្ថកិច្ច និងតុលាការ បានចាត់ទុកសកម្មភាពរបស់លោក ជុន ច័ន្ទបុត្រ ថាជាការបន្លំខ្លួន ដោយខុសច្បាប់ ដើម្បីបានចូលទៅជួបមន្ត្រីនិងសកម្មជនគណបក្សសង្គ្រោះជាតិ។ នៅក្នុងដីការបស់ព្រះរាជអាជ្ញា លោក ជុន ច័ន្ទបុត្រ គឺជាជនសង្ស័យក្នុងដំណើររឿង «ផ្តល់សេចក្តីប្រកាសដោយភូតកុហក បន្លំខ្លួនចូលពន្ធាគារ»។
តំណាងរាស្ត្រគណបក្សសង្គ្រោះជាតិ២រូប គឺលោកស្រី មូរ សុខហួរ និងលោក ឡុង រី គឺជាអ្នកនាំលោកជុន ច័ន្ទបុត្រ ទៅជាមួយ ពេលចូលទៅសួរសុខទុក្ខអ្នកជាប់ឃុំក្នុងពន្ធនាគារព្រៃស។ លោកស្រី មូរ សុខហួរ និងលោក ឡុង រី បានក្លាយជាសាក្សី នៅក្នុងសំណុំរឿងនេះ។ អ្នកទាំងពីរ បានចូលទៅបំភ្លឺនៅចំពោះមុខព្រះរាជអាជ្ញារួចហើយ ពាក់ព័ន្ធនឹងសំណុំរឿងខាងលើ។
ចំណែកឯ លោក ជុន ច័ន្ទបុត្រ នៅមិនទាន់សម្រេចចិត្តច្បាស់នោះទេ ថានឹងចូលបំភ្លឺនៅក្នុងតុលាការតាមដីកាកោះ ឬយ៉ាងណា៕
© រក្សាសិទ្ធិដោយ thmeythmey.com