ជាតិ
សម្ដេច ហ៊ុន សែន ប្រាប់ទីប្រឹក្សារដ្ឋចិនថា CPP អាចឈ្នះឆ្នោតកាន់អំណាចទៀត
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បាននិយាយថា គណបក្សប្រជាជនកម្ពុជា អាចនឹងឈ្នះឆ្នោត កាន់អំណាចនៅអាណត្តិក្រោយទៀត។ តែអ្នកវិភាគ ថា បើគណបក្សប្រជាជនមិនអាចរក្សាអ្នកគាំទ្រជាង៣លាននាក់ក្នុងដៃបានទេ នោះប្រាកដជាគ្មានឱកាសកាន់អំណាចទៀតឡើយ។
ក្នុងជំនួបជាមួយទីប្រឹក្សារដ្ឋនៃសាធារណរដ្ឋប្រជាមានិតចិន សម្ដេច ហ៊ុន សែន បាននិយាយដោយភាពជឿជាក់ថា គណបក្សប្រជាជន នឹងអាចបន្តកាន់អំណាចទៀត តាមរយៈការបោះឆ្នោតដោយមានការគាំទ្រពីសមាជិកខ្លួននៅក្នុងដៃ។ សេចក្ដីថ្លែងការណ៍ក្រសួងការបរទេស និងសហប្រតិបត្តិអន្តរជាតិ ដែលទើបចេញផ្សាយព័ត៌មាន ដោយស្រង់ប្រសាសន៍នាយករដ្ឋមន្ត្រី ហ៊ុន សែន ប្រាប់ទៅមន្ត្រីជាន់ខ្ពស់ចិន យ៉ាងដូច្នេះថា៖« បើគិតពីសមាជិកនៃគណបក្សប្រជាជនកម្ពុជាតាមចំនួនដែលមាន បើសិនជាសមាជិកម្នាក់បោះឆ្នោតបានមួយសម្លេង ហើយបូកជាមួយសម្លេងរបស់សមាជិកក្រុមគ្រួសារទៀតនោះគណបក្សប្រជាជនអាចនឹងឈ្នះ»។
ជុំវិញការលើកឡើងនេះ អ្នកវិភាគ និងជាអ្នកឃ្លាំមើលការអភិវឌ្ឍសង្គម លោក មាស នី មើលឃើញថា លទ្ធភាពនៃការទទួលបានជ័យជម្នះរបស់គណបក្សប្រជាជន គឺមានខ្ពស់ជាងគណបក្សដទៃមែន។ នោះក៏ព្រោះតែគណបក្សកាន់អំណាចមួយនេះ កំពុងមានអ្នកគាំទ្រនៅក្នុងដៃស្រាប់ជាង៣លាននាក់។ ប៉ុន្តែសម្រាប់លោក មាស នី ក្តីរំពឹងរបស់គណបក្សកាន់អំណាច អាចនឹងជួបរឿងរ៉ាវដូចកាលបោះឆ្នោតឆ្នាំ២០១៣កន្លងមកដែរ។
ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានបញ្ជាក់ដូច្នេះថា៖«វាគ្មានអ្វីដែលថ្មីទេ ព្រោះគណបក្សប្រជាជនសង្ឃឹមលើមេគ្រួសារ ដែលមានតួនាទីនិងតំណែងក្នុងបក្ស ហើយឲ្យពួកគេអូសទាញសាច់ញាតិក្រុមគ្រួសារឲ្យបោះឆ្នោតគាំទ្រខ្លួន។ តែវាមិនពិតដូចការគិតទេ ព្រោះមានក្រុមគ្រួសារខ្លះ សាច់ញាតិពួកគេចេះគិតពិចារណា ហើយគេក៏អាចបោះឆ្នោតឲ្យគណបក្សដទៃដែរ។ ហើយដោយសារតែមានជំនឿបែបនេះ ទើបគណបក្សប្រជាជនមានសមាជិកគាំទ្រខ្លួនខ្លួន៦លាននាក់ តែដល់ពេលបោះឆ្នោតឆ្នាំ២០១៣ មាននៅសល់តែជាង៣លាននាក់ ដែលបោះឆ្នោតគាំទ្រខ្លួន។ ហើយបែរជាបាត់បង់២២កៅអី»។
បន្ថែមពីនេះលោក មាស នី លើកឡើងថា សំឡេងគាំទ្ររបស់គណបក្សប្រជាជន នឹងអាចថមថយបន្ថែមទៀត ដោយសារតែបញ្ហាប្រព័ន្ធយុត្តិធម៌ សុខាភិបាល និងផលិតផលកសិកម្មគ្មានទីផ្សារ ដែលអាចអូសទាញទឹកចិត្តប្រជាពលរដ្ឋ ងាកទៅគាំទ្រគណបក្សដទៃវិញ។
កន្លងមកថ្នាក់ដឹកនាំគណបក្សសង្គ្រោះជាតិ ក៏ធ្លាប់មានជំនឿចិត្តថា គណបក្សពួកគេអាចនឹងឈ្នះឆ្នោតដឹកនាំប្រទេសនៅអាណត្តិក្រោយផងដែរ។ ងាកមកនិយាយពីការលើកឡើងរបស់គណបក្សប្រឆាំងនេះវិញ លោក មាស នី បានមើលឃើញយ៉ាងដូច្នេះថា៖«គណបក្សប្រឆាំងមានបញ្ហារអាក់រអួលច្រើន ទាំងបញ្ហាផ្ទៃក្នុងបក្ស ទាំងបញ្ហាដំណើរការនយោបាយមានឧបសគ្គច្រើន ដោយសាររងការកៀបសង្កត់ការនិយាយស្តី ដូច្នេះវាជាឱកាសមួយដ៏ល្អសម្រាប់គណបក្សតូចៗ ដែលទើបបង្កើតថ្មី។ ព្រោះគណបក្សតូច អាចមានសិទ្ធិនិយាយដោយសេរីរិះគន់ចំណុចរសើបរដ្ឋាភិបាល និងវាយប្រហារគណបក្សប្រឆាំង ហើយមិនត្រូវបានគេចាប់ទោសទណ្ឌទេកន្លងមក។ ហើយគណបក្សថ្មីទាំងនេះ សុទ្ធតែមានសមាជិកធ្លាប់ធ្វើការគណបក្សប្រឆាំងចូលរួម ដូច្នេះពួកគេអាចរិះគន់បក្សប្រឆាំង និងទាញអ្នកគាំទ្រខ្លះបែកចិត្តមកគាំទ្រពួកគេវិញ»។
លោក បន្ថែមថា៖«បើសិនគណបក្សតូចទាំងនោះ ជាចាប់ដៃគ្នារួមបញ្ចូលជាគណបក្សតែមួយ ដូចគណបក្សសិទ្ធិមនុស្ស និងគណបក្ស សម រង្ស៊ី នោះ ពួកគេនឹងអាចមានលទ្ធភាពកាន់តែធំក្នុងការប្រកួតប្រជែងសន្លឹកឆ្នោតអាណត្តិក្រោយ។ ជាពិសេសមានលទ្ធភាពខ្ពស់ក្នុងការបំបែកសំឡេងពីគណបក្សប្រជាជន និងគណបក្សសង្គ្រោះជាតិតែម្ដង»។
ប៉ុន្តែយ៉ាងណាលទ្ធភាពឈ្នះឆ្នោតកាន់អំណាចនៅអាណត្តិទី៦នោះ គឺមានតែគណបក្សប្រជាជនកម្ពុជា និងគណបក្សសង្គ្រោះជាតិប៉ុណ្ណោះ។ ហើយលទ្ធផលឈ្នះនោះ គឺមានលក្ខណៈប្រដំត្រសងគ្នា នៃចំនួនអាសនក្នុងរដ្ឋសភា។ នេះជាការសាកល្បងទស្សទាយរបស់លោក មាស នី៕
© រក្សាសិទ្ធិដោយ thmeythmey.com