អន្តរជាតិ
មេដឹកនាំអាមេរិក-ចិន ប្រជែងគ្នាយកចិត្តលោក Duterte ដែលស្ថិតក្នុងតំណែងជាប្រធានអាស៊ាន
× ត្រឹមរយៈពេល ៥ថ្ងៃ ប្រធានាធិបតីហ្វីលីពីន Rodrigo Duterte បាននិយាយតាមទូរសព្ទមេដឹកនាំពិភពលោកជាបន្តបន្ទាប់។ កាលពីចុងសប្ដាហ៍មុន លោក Duterte បានជជែកជាមួយប្រធានាធិបតីអាមេរិក ដូណាល់ ត្រាំ ហើយនៅថ្ងៃទី៣ ខែឧសភាម្សិលមិញ លោក ក៏បាននិយាយទូរសព្ទជាមួយសមភាគីចិន ស៊ី ជីនភីង ទៀត។ ប្រធានបទសំខាន់នៃការជជែកតាមទូរសព្ទនេះ គឺបញ្ហាកូរ៉េខាងជើង ដែលកំពុងឡើងកម្ដៅខ្លាំង។
តំណែងជាប្រធានអាស៊ានសម្រាប់ឆ្នាំ២០១៧ កំពុងធ្វើឲ្យប្រធានាធិបតីហ្វីលីពីន Rodrigo Duterte មានមុខមាត់យ៉ាងខ្លាំង។ លោក Duterte បានជជែកតាមទូរសព្ទជាមួយមេដឹកនាំធំៗលើពិភពលោកមានប្រធានាធិបតីអាមេរិក ដូណាល់ ត្រាំ និងចុងក្រោយប្រធានាធិបតីចិន ស៊ី ជីនភីង ។ ក្នុងជំនួបតាមទូរសព្ទ មេដឹកនាំទាំង៣ប្រទេស សុទ្ធតែបាននិយាយដល់ការស្វែងរកដំណោះស្រាយបញ្ហានៅឧបទ្វីបកូរ៉េ ដែលតានតឹងខ្លាំងនាពេលថ្មីៗនេះ។
សារព័ត៌មានរដ្ឋចិន Xinhua ផ្សាយថា តាមរយៈការនិយាយទូរសព្ទនៅថ្ងៃទី៣ ខែឧសភា ប្រធានាធិបតីហ្វីលីពីន និងប្រធានាធិបតីចិន បានពិភាក្សាលើបញ្ហាឧបទ្វីបកូរ៉េ បន្ថែមពីលើជម្លោះសមុទ្រចិនខាងត្បូង។ មេដឹកនាំទាំង២ បានផ្លាស់ប្ដូរទស្សនៈពីដំណោះស្រាយបញ្ហានុយក្លេអ៊ែរនេះ ហើយលោក Duterte បានប្រាប់លោក ស៊ី ជីនភីង ពីតួនាទីដ៏សំខាន់របស់ចិនក្នុងការដោះស្រាយវិបត្តិកូរ៉េខាងជើង ដែលជាក្ដីបារម្ភរបស់ពិភពលោកទាំងមូល។
នៅមុននេះ ប្រធានាធិបតី Duterte ធ្លាប់លើកឡើងដែរថា ចិន អាចធ្វើស្ពានរវាងអាមេរិក និងកូរ៉េខាងជើង ដើម្បីដោះស្រាយបញ្ហាបាន ព្រោះការសន្ទនាណាមួយរវាងអាមេរិក និងកូរ៉េខាងជើង អាចធ្វើទៅបានបើមានការសហការរបស់ចិន។ ចិន ដែលតែងស្នើឲ្យភាគីជម្លោះទាំងអស់រក្សាការអត់ធ្មត់ ពិតជាចង់ឃើញវិបត្តិនុយក្លេអ៊ែរនេះ ត្រូវបានដោះស្រាយតាមសម្រួល ដ្បិតចិនក៏មិនចង់ឲ្យមានសង្គ្រាមក្បែរផ្ទះរបស់ខ្លួនដែរ។
ច្បាស់ណាស់ថា ការដែលមេដឹកនាំមហាអំណាចនិយាយទូរសព្ទជាមួយលោក Duterte ជាបន្តបន្ទាប់បែបនេះ ក៏ព្រោះតែលោកជាប្រធានអាស៊ានតែម្ដង។ ជាប្រធានប្ដូរវេនរបស់អាស៊ាន ហ្វីលីពីន ពិតជាដើរតួនាទីសំខាន់ក្នុងការជួយដោះស្រាយបញ្ហាតំបន់ ជាពិសេសតាមរយៈការស្វែងរកដំណោះស្រាយសន្តិភាពតែម្ដង។ ចិន និងអាមេរិក បោះដៃពឹងអាស៊ាន ព្រោះកូរ៉េខាងជើង ក៏ជាដៃគូសន្ទនារបស់អាស៊ានមួយដែរ ហើយក៏ជាសមាជិកវេទិកាតំបន់អាស៊ានទៅទៀត។
មិនត្រឹមតែចិន និងអាមេរិក ដែលមករកអាស៊ាននោះ សូម្បីកូរ៉េខាងជើង ក៏ធ្លាប់ផ្ញើសំបុត្រសុំការគាំទ្រពីអាស៊ានដែរ។ ប្រមុខការទូតកូរ៉េខាងជើង ធ្លាប់ផ្ញើលិខិតមួយមកកាន់អគ្គលេខាធិការអាស៊ាន និងបានរៀបរាប់ពីមូលហេតុដែលស្ថានការណ៍នៅឧបទ្វីបកូរ៉េធ្លាក់ដុនដាប និងបានព្រមានពីគ្រោះថ្នាក់នៃសង្គ្រាមនុយក្លេអ៊ែរទៀតផង។ ប៉ុន្តែអាស៊ាន មិនបានឆ្លើយតបដោយវិជ្ជមានលើសំណើរបស់កូរ៉េខាងជើងឡើយ តែបានប្រាប់ឲ្យរដ្ឋឯកោមួយនេះអនុវត្តតាមសេចក្ដីសម្រេចរបស់ក្រុមប្រឹក្សាសន្តិសុខ៕
Tag:
ហ្វីលីពីន
អាស៊ាន
Rodrigo Duterte
ចិន
អាមេរិក
© រក្សាសិទ្ធិដោយ thmeythmey.com