អន្តរជាតិ
អាហ្វ្រិកខាងលិចចាប់កប៉ាល់នេសាទត្រីខុសច្បាប់របស់ចិន៨គ្រឿង
× កប៉ាល់នេសាទចំនួន ប្រាំបីគ្រឿងត្រូវបានកងកម្លាំងនិងក្រុមអភិរក្សបរិស្ថានប្រចាំប្រទេសអាហ្វ្រិកខាងលិចចំនួនបី ចាប់ឃុំ ដោយសារតែពួកគេចូលនេសាទត្រីដោយខុសច្បាប់។ ម្ចាស់កប៉ាលនេសាទអាចនឹងប្រឈមមុខនឹងការពិន័យអស់ច្រើនលានដុល្លារថែមទៀត ដោយសារពួកគេរំលោភបំពានតំបន់អភិរក្សត្រីសមុទ្រនិងប្រើប្រាស់ឧបករណ៍នេសាទខុសច្បាប់។
ប្រទេសអាហ្វ្រិកខាងលិចចំនួនបីមាន ហ្គីណេ (Guinea), សៀរ៉ា ឡេអូន (Sierra Leone) និងហ្គីណេប៊ីស្សូ (Guinea-Bissau) បានសម្រេចចាប់ឃុំកប៉ាល់នេសាទរបស់ចិនចំនួន ប្រាំបីគ្រឿងនៅថ្ងៃ ៣ ខែឧសភានេះដោយសារពួកគេនេសាទត្រីខុសច្បាប់។
យោងតាមទីភ្នាក់ងារព័ត៌មាន Reuters ដែលស្រង់សម្តីមន្ត្រីរដ្ឋាភិបាលនិងមន្ត្រីអង្គការអភិរក្សបរិស្ថាន Greenpeace កប៉ាល់ចំនួនប្រាំបីគ្រឿងនេះបានបំពានបទបញ្ញតិ្តពាក់ព័ន្ធការនេសាទក្នុងនោះគេបាននេសាទត្រីតំបន់អភិរក្សនិងប្រើប្រាស់សំណាញ់ញឹកទៀត។ ចំណែកម្ចាស់កប៉ាលនេសាទទាំងនេះប្រឈមមុខនឹងការផាកពិន័យរាប់លានដុល្លារអាមេរិកថែមទៀត។
ការចាប់ឃាត់នាវារបស់ចិននេះកើតឡើងពីរខែក្រោយពេលដែលអង្គការអភិរក្សាបរិស្ថាន Greenpeace ចាប់ផ្តើមល្បាតសមុទ្រ រួមជាមួយបណ្តាក្រុមឆ្នាំដែលល្បាតសមុទ្រមកពីប្រទេសអាហ្វ្រិកខាងលិចផ្សេងទៀតដែរ។
អាហ្វ្រិកខាងលិចត្រូវបានគេស្គាល់ថាជាតំបន់ដែលមានដែនសមុទ្រសម្បូរដោយធនធានជាងគេលើពិភពលោក។ ប៉ុន្តែធនធានទាំងនោះចេះតែខើចទៅៗដោយសារការនេសាទទ្រង់ទ្រាយធំ និងការនេសាទខុសច្បាប់ជាដើមផង។ គ្រាន់តែដោយសារការនេសាទខុសច្បាប់នេះ តំបន់អាហ្វ្រិកខាងលិចត្រូវខាតបង់ចំណូលប្រចាំឆ្នាំស្មើ ២,៣ពាន់លានដុល្លារ។
ត្រឡប់មកវិញ រដ្ឋមន្ត្រីនេសាទហ្គីណេលោក Andre Loua ទទួលស្គាល់ថា វាមានជាមានការចាប់ឃាត់នាវារបស់ចិនមែន។ ប៉ុន្តែមន្ត្រីជាន់ខ្ពស់រូបនេះបានលើកឡើងពីតម្រូវការរបស់កងកម្លាំងឆ្មាំសមុទ្រ ក្នុងពេលបំពេញប្រតិបត្តិការ។ គេត្រូវការថវិកា និងទូកល្បាតបន្ថែមដើម្បីបំពេញការងារឲ្យកាន់តែមានប្រសិទ្ធភាព។
ចំណែករដ្ឋមន្ត្រីព័ត៌មានសៀរ៉ាឡេអូន Mohamed Bangura បានបញ្ជាក់ថា នាវាចិនបីគ្រឿងត្រូវបានចាប់ឃុំនិងផាកពិន័យរួចរាល់ហើយ។ ប៉ុន្តែលោកមិនបានបញ្ជាក់ច្បាស់ពីព័ត៌មានលម្អិតពាក់ព័ន្ធនាវាដែលត្រូវចាប់ឃុំផ្សេងទៀតទេ ហើយការបង់ថ្លៃពិន័យរបស់នាវាដែលសេសសល់ស្ថិតក្នុងការចរចានៅឡើយ៕
Tag:
អាហ្វ្រិកខាងលិច
ចិន
Greenpeace
© រក្សាសិទ្ធិដោយ thmeythmey.com