អន្តរជាតិ
បេក្ខជនប្រធានាធិបតីបារាំង ទាស់សម្ដីគ្នាដល់ថ្នាក់ព្រមានផ្ទុះសង្គ្រាមស៊ីវិល បេក្ខជនប្រធានាធិបតីបារាំង លោកស្រី Marine Le Pen និងលោក Emmanuel Macron អំឡុងពេលការជជែកដេញដោលតាមទូរទស្សន៍មុនការបោះឆ្នោតថ្ងៃទី៧ ខាងមុខ (រូបភាព Reuters)
× បេក្ខជនប្រធានាធិបតីបារាំង បេក្ខជនគ្មានបក្ស Emmanuel Macron និងបេក្ខជនស្ដាំនិយមជ្រុល Marine Le Pen បាននិយាយវាយប្រហារគ្នាយ៉ាងខ្លាំងលើឆាកជជែកដេញដោលដែលផ្សាយផ្ទាល់តាមកញ្ចក់ទូរទស្សន៍។ បេក្ខជនទាំង២ ជជែកគ្នាឡើងតឹងសរសៃកលើរបៀបវារៈសេដ្ឋកិច្ច និងសន្តិសុខ នៅមុនការបោះឆ្នោតជុំទី២ នៅថ្ងៃអាទិត្យនេះ រហូតដល់លោក Macron ព្រមានថាអាចមានសង្គ្រាមផង។
ការជជែកដេញដោលទល់មុខគ្នារវាងបេក្ខជនប្រធានាធិបតីបារាំង បានក្លាយជាវេទិកាវាយប្រហារគ្នាទៅវិញទៅមក អមដោយការគំរាមផ្ទុះសង្គ្រាមក្នុងស្រុកទៅទៀត។ លោក Emmanuel Macron បេក្ខជនកណ្ដាលនិយម គាំទ្រអឺរ៉ុប បានអង្គុយទល់មុខគ្នាជាមួយលោកស្រី Marine Le Pen បេក្ខជនស្ដាំនិយមជ្រុល ប្រឆាំងអឺរ៉ុប ដើម្បីជជែកដេញដោលគ្នានៅថ្ងៃទី៣ ខែឧសភា។ បេក្ខជនទាំង២ បានចំណាយពេលភាគច្រើនរិះគន់នយោបាយគ្នាទៅវិញទៅមកទៀត។
នេះ គឺជាជំនួបទល់មុខចុងក្រោយរវាងបេក្ខជនប្រធានាធិបតីទាំង២ មុននឹងការបោះឆ្នោតជុំទី២ នៅថ្ងៃទី៧ ខែឧសភាខាងមុខ។ ក្នុងការជជែកដេញដោលតាមទូរទស្សន៍នេះ លោក Macron បានបង្ហាញកាន់តែច្បាស់នយោបាយសេដ្ឋកិច្ចសេរីរបស់លោក ដើម្បីសង្គ្រោះសេដ្ឋកិច្ចបារាំង ខណៈដែលលោកស្រី Le Pen ក៏បញ្ចេញសារនយោបាយដែលផ្ដោតលើការគាំពារនិយម ការលុបចោលប្រាក់អឺរ៉ូ និងការចាកចេញពីសហភាពអឺរ៉ុបជាដើម។
ក្រៅពីបង្ហាញនយោបាយរៀងខ្លួន បេក្ខជនទាំង២ ក៏មិនភ្លេចវាយប្រហារគូប្រជែងរបស់ខ្លួនដែរ។ បេក្ខជនស្ដាំនិយមជ្រុល Le Pen បានហៅលោក Macron ជាទាយាទស្នងតំណែងនៃរដ្ឋាភិបាលសង្គមនិយមបច្ចុប្បន្ន ដែលមិនសូវមានប្រជាប្រិយភាពប៉ុណ្ណោះ។ លោកស្រី ក៏បានរិះគន់គូប្រជែងទៀតថា បើអតីតរដ្ឋមន្ត្រីសេដ្ឋកិច្ចរូបនេះ ឈ្នះឆ្នោត សេដ្ឋកិច្ចរបស់បារាំង នឹងធ្លាក់ទៅក្រោមអាល្លឺម៉ង់ទៅទៀត ព្រោះបើ Macron ឈ្នះប្រៀបដូចអធិការបតីអាល្លឺម៉ង់ Angela Merkel ឈ្នះដែរ។
បើតាមទីភ្នាក់ងារព័ត៌មាន Reuters លោកស្រី Le Pen ក៏រិះគន់លោក Macron លើការប្រយុទ្ធប្រឆាំងភេរវកម្ម និងនយោបាយគាំទ្របន្តជាសមាជិកអឺរ៉ុបដែរ។ ជាការឆ្លើយតប បេក្ខជនកណ្ដាលនិយម Macron ក៏បានហៅលោកស្រី Le Pen ជាមនុស្សកុហក និយាយគ្មានបានការ ហើយការលើកឡើងទាំងអស់មិនមានអ្វីជាសម្អាងគ្រប់គ្រាន់ឡើយ។ ជុំវិញបញ្ហាសន្តិសុខ លោក Macron បញ្ជាក់ថា ការប្រយុទ្ធអំពើជ្រុលនិយម គឺជាអាទិភាព បើលោកឈ្នះឆ្នោត។
ក្នុងការដេញដោលដែលទាក់ទាញអ្នកទស្សនាជាច្រើនលាននាក់ បេក្ខជនប្រធានាធិបតីដែលមានសំឡេងនាំមុខនៅជុំទី១ ចាត់ទុកដំណោះស្រាយប្រឆាំងភេរវកម្មរបស់លោកស្រី Le Pen ជាអន្ទាក់ដែលក្រុមភេរវករចង់បាន ហើយអាចធ្វើឲ្យបារាំងបែកបាក់ទៅទៀត។ លោក Macron ក៏ព្រមានពីការកើតឡើងសង្គ្រាមស៊ីវិល ដែលជាលទ្ធផលនៃនយោបាយប្រឆាំងសកម្មភាពជ្រុលនិយមរបស់លោកស្រី Le Pen តែម្ដង។
រំឮកទៅកាន់ការបោះឆ្នោតជុំឆ្នោតទី១ លោក Macron នាំមុខលោកស្រី Le Pen បន្តិចបន្តួចប៉ុណ្ណោះ ។ ដូច្នេះ វេទិកាដេញដោលលើកនេះ គឺជាឱកាសចុងក្រោយសម្រាប់លោកស្រី Le Pen ដើម្បីទាក់ទាញចិត្តអ្នកបោះឆ្នោត ដែលនៅតែមិនចេញចិត្តនយោបាយរបស់លោកស្រីរាប់ទាំងការប្រឆាំងលំហូរជនអន្តោប្រវេសន៍ ការងាកមកប្រើប្រាស់លុយក្នុងស្រុកជំនួសលុយអឺរ៉ុប និងជំហរចាកចេញពីសហភាពអឺរ៉ុបជាដើម៕
Tag:
បារាំង
Emmanuel Macron
Marine Le Pen
© រក្សាសិទ្ធិដោយ thmeythmey.com