មនុស្ស៣នាក់របួស ក្របី២ក្បាលងាប់ ដោយសាររន្ទះបាញ់ កាលពីថ្ងៃព្រហស្បតិ៍

ជាតិ

មនុស្ស៣នាក់របួស ក្របី២ក្បាលងាប់ ដោយសាររន្ទះបាញ់ កាលពីថ្ងៃព្រហស្បតិ៍

05, May 2017 , 10:23 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ភ្លៀងធ្លាក់លាយឡំជាមួយនឹងខ្យល់កន្ត្រាក់ បានបណ្ដាលឲ្យមនុស្ស៣នាក់រងរបួស និងក្របី២ក្បាលងាប់ ដោយសាររន្ទះបាញ់ រួមទាំងខូតខាតផ្ទះសម្បែងជាច្រើនខ្នង។ គ្រោះបាតុភូតធម្មជាតិនេះ បានកើតឡើងនាថ្ងៃទី៤ ឧសភា នៅតាមបណ្ដាខេត្តមួយចំនួនក្នុងប្រទេសកម្ពុជា។ នេះបើតាមទំព័រហ្វេសប៊ុកផ្លូវការរបស់ក្រសួងធនធានទឹក និងឧតុនិយម។

កាលពីថ្ងៃទី៤ ខែឧសភា កន្លងទៅនេះ នៅតាមបណ្ដាខេត្តមួយចំនួនក្នុងប្រទេសកម្ពុជា បានទទួលរងនូវបាតុភូតធម្មជាតិភ្លៀងកក់ខែលាយឡំនឹងខ្យល់កន្ត្រាក់ បានបណ្ដាលឲ្យមនុស្ស៣នាក់រងរបួស និងក្របី២ក្បាលងាប់ រួមទាំងខូតខាតផ្ទះសម្បែងប្រជាពលរដ្ឋជាច្រើនខ្នង។ ក្នុងករណីគ្រោះធម្មជាតិនេះ នៅខេត្តស្វាយរៀង នារសៀលថ្ងៃទី៤ ឧសភានេះ ក្របី ២ក្បាលបានងាប់ ដោយសាររន្ទះបាញ់ ខណៈមេឃកំពុងភ្លៀង។

ក្រសួងធនធានទឹក និងឧតុនិយម បានផ្សព្វផ្សាយបន្ថែមថា នាល្ងាចថ្ងៃដដែលនេះ នៅខេត្តកណ្ដាល មានគ្រោះធម្មជាតិបង្កឡើង ដោយបាតុភូតរន្ទះ និងខ្យល់កន្ត្រាក់។ គ្រោះធម្មជាតិ ក្នុងខេត្តកណ្ដាល បានវាយប្រហារផ្ទះប្រជាពលរដ្ឋចំនួន ៩១ខ្នង របើកដំបូល និងរលំ រួមទាំងមនុស្ស ១នាក់ បានរងរបួសដោយសាររន្ទះបាញ់។

បើតាមប្រភពដដែល នៅខេត្តឧត្តរមានជ័យវិញ កាលពីថ្ងៃទី៤ ឧសភានេះ មានមនុស្ស ២នាក់ រងរបួស ដោយសារខ្យល់កន្ត្រាក់ វាយប្រហារធ្វើឲ្យរលំដើមឈើ សង្កត់លើជម្រកស្នាក់នៅ។ ភ្លៀងធ្លាក់លាយឡំជាមួយនឹងខ្យល់កន្ត្រាក់នេះ បណ្ដាលឲ្យផ្ទះប្រជាពលរដ្ឋចំនួន ២៦ខ្នង រងការខូតខាត។

គួររម្លឹកថា តាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅសប្ដាហ៍ទី១ ចាប់ពីថ្ងៃទី ២-៤ ខែឧសភា កម្ពុជា អាចនឹងមានភ្លៀងធ្លាក់ពីតិចទៅបង្គួរ នៅតាមបណ្ដាខេត្តមួយចំនួន។ ម្យ៉ាងទៀត ចាប់ពីថ្ងៃទី ៦-១១ ខែឧសភា អាចនឹងមានភ្លៀងធ្លាក់រាយប៉ាយពីបង្គួរទៅច្រើន ក្នុងក្របខ័ណ្ឌស្ទើរទូទាំងប្រទេស។ ចំពោះបាតុភូតរន្ទះ និងខ្យល់កន្ត្រាក់នេះ ដែលអាចនឹងកើតមានញឹកញាប់ ចាប់ពីថ្ងៃទី៦ ឧសភានេះ ពិសេសនៅតំបន់វាលទំនាប និងខ្ពង់រាប៕