លោក ហ៊ុន ម៉ានី ពង្រឹងមិត្តភាពអ្នកដឹកនាំវ័យក្មេងកម្ពុជា-ថៃ

ជាតិ

លោក ហ៊ុន ម៉ានី ពង្រឹងមិត្តភាពអ្នកដឹកនាំវ័យក្មេងកម្ពុជា-ថៃ

06, May 2017 , 10:06 am

រូបភាព

ដោយ:

សហភាពសហព័ន្ធយុវជនកម្ពុជាបានរៀបចំ«វេទិកាអ្នកដឹកនាំវ័យក្មេងកម្ពុជា-ថៃ» លើកដំបូងនៅរាជធានីភ្នំពេញនៅថ្ងៃទី៤-៥ខែឧសភានេះ ក្នុងគោលដៅបន្តពង្រីកមិត្តភាពរវាងប្រទេសទាំងពីរ។ វេទិកាជាលទ្ធផលនៃការពិភាក្សាក្នុងដំណើរទស្សនកិច្ចរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជានៅប្រទេសថៃកាលពីចុងឆ្នាំ២០១៦។

អ្នកដឹកនាំវ័យក្មេង និងសហគ្រិនវ័យក្មេងនៃព្រះរាជាណាចក្រជិតខាងទាំងពីរកម្ពុជានិងថៃប្រមាណ៤០នាក់ បានជួបជុំគ្នា ដើម្បីបង្កើនមិត្តភាព និងស្វែងយល់ពីឱកាសវិនិយោគទៅវិញទៅមក។ វាជាជំនួបផ្លូវការលើកដំបូងនៅក្នុងវេទិកាអ្នកដឹកនាំវ័យក្មេងដែលរៀបចំឡើងដោយសហភាពសហព័ន្ធយុវជនកម្ពុជា។

វាមានសារសំខាន់ណាស់ សម្រាប់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលអ្នកដឹកនាំវ័យក្មេង ទាំងក្នុងវិស័យសាធារណៈ និងវិស័យឯកជនរបស់កម្ពុជា និងថៃបានស្គាល់គ្នា ស្វែងយល់ពីគ្នា និងអាចបង្កើនចំណងមិត្តភាពនៃប្រទេសទាំងពីរ។

នៅក្នុងសន្និសីទកាសែតនាយប់ថ្ងៃទី៥ឧសភា លោក ហ៊ុន ម៉ានី បានពន្យល់យ៉ាងដូច្នេះថា៖«វេទិកានេះនឹងធ្វើឲ្យពួកគេស្គាល់គ្នាទៅវិញទៅមក បង្កើនមិត្តភាពថ្មី។ ទំនាក់ទំនងដែលចេញពីប្រជាជន និងប្រជាជន ពីបុគ្គលនិងបុគ្គលនេះហើយ ដែលអាចបន្តថែរក្សាបាននូវចំណងមិត្តភាពដ៏ល្អរវាងព្រះរាជាណាចក្ររបស់យើងទាំងពីរ ហើយលើសពីនេះគឺការពង្រីកបន្ថែមនូវចំណងមិត្តភាពនេះសម្រាប់ថ្ងៃអនាគត ដោយចេញពីវេទិកានេះទៅ»។

វេទិកាអ្នកដឹកនាំវ័យក្មេងកម្ពុជា-ថៃ បានប្រព្រឹត្តិទៅក្រោមវត្តមានរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក សុខ ចិន្តាសោភា ដែលជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក Nuttavud Photisaro ឯកអគ្គរាជទូតថៃប្រចាំកម្ពុជា និងតំណាងសមាគមមិត្តភាពកម្ពុជា-ថៃ។

លោក សុខ ចិន្តាសោភាព ក្នុងនាមរដ្ឋាភិបាលកម្ពុជា បានផ្តល់តម្លៃយ៉ាងខ្លាំងដល់វេទិកាមួយនេះ ដែលផ្តល់ពេលវេលាដល់សហគ្រិនវ័យក្មេងរបស់ប្រទេសទាំងពីរបានជួបគ្នាផងនោះ។ មន្ត្រីជាន់ខ្ពស់រដ្ឋាភិបាលដែលទទួលបន្ទុកគ្រប់គ្រងគម្រោងវិនិយោគនៅកម្ពុជាបានបញ្ជាក់នៅក្នុងសន្និសីទសារព័ត៌មានផងដែរថា វាជាពេលវេលាដ៏ត្រឹមត្រូវដែលអ្នកដឹកនាំវ័យក្មេង និងអ្នកជំនួញវ័យក្មេងនៃប្រទេសទាំងពីរបានជួប និងស្គាល់គ្នាចាប់ពីពេលនេះទៅ។ លោក សុខ ចិន្តាសោភា បានថ្លែងយ៉ាងដូច្នេះថា៖«ពិភពលោកបានទទួលស្គាល់ថា តំបន់អាស៊ានជាតំបន់សក្តានុពល និងអភិវឌ្ឍជាងគេក្នុងពេលខាងមុខ។ រឹតតែល្អជាងនេះទៅទៀតនោះ គឺប្រទេសនៅតាមដងទន្លេមេគង្គ ដូចជាកម្ពុជា ថៃ វៀតណាម មីយ៉ាន់ម៉ា នឹងក្លាយជាប្រទេសដែលមានកំណើនសេដ្ឋកិច្ចខ្ពស់ជាងគេ។ ដូច្នេះសហគ្រិនវ័យក្មេងដែលមានសក្តានុពល ដែលនឹងក្លាយជាអ្នកដឹកនាំនៅថ្ងៃខាងមុខ បើពួកគេស្គាល់គ្នា វានឹងបង្កើតឲ្យមានផលប្រយោជន៍ធំណាស់»។

សម្រាប់លោក ចិន្តាសោភា និន្នាការថ្មីនៃការវិនិយោគបរទេសមកក្នុងតំបន់គឺសង្វាក់ផលិតកម្មដែមិននៅតែក្នុងប្រទេសតែមួយនោះទេ តែជាបណ្តុំនៃប្រទេសក្នុងតំបន់៕