អន្តរជាតិ
បេក្ខជនប្រធានាធិតីកូរ៉េខាងត្បូង សម្រុកធ្វើយុទ្ធនាការរកសំឡេងឆ្នោតនៅថ្ងៃចុងក្រោយ បេក្ខជនទាំង៥ ដែលប្រជែងកៅអីប្រធានាធិបតី។ លោក Moon Jae-in (ឆ្វេងបំផុត) ជាបេក្ខជមានសង្ឃឹមខ្ពស់ជាងគេសម្រាប់តំណែងប្រធានាធិបតី (រូបភាព Xinhua)
× ការបោះឆ្នោតប្រធានាធិបតីកូរ៉េខាងត្បូង នឹងរៀបចំឡើងនៅថ្ងៃទី៩ ខែឧសភាស្អែកនេះ ខណៈបេក្ខជនប្រធានាធិបតីទាំងអស់ កំពុងញាប់ដៃញាប់ជើងធ្វើយុទ្ធនាការស្វែងរកការគាំទ្រនៅថ្ងៃចុងក្រោយ។ លោក Moon Jae-in នៅតែជាបេក្ខជនមានភាគរយខ្ពស់ក្នុងការដណ្ដើមតំណែងប្រធានាធិបតី បើទោះជាមានការប្រជែងយ៉ាងស្វិតស្វាញពីសំណាក់បេក្ខជនសំខាន់ៗផ្សេងទៀតក្ដី។
យុទ្ធនាការស្វែងរកសំឡេងឆ្នោតសម្រាប់ការបោះឆ្នោតប្រធានាធិបតីកូរ៉េខាងត្បូង ដែលមានរយៈពេល ២២ថ្ងៃមកហើយនោះ នឹងត្រូវបញ្ចប់នៅពាក់កណ្ដាលយប់ថ្ងៃទី៨ ខែឧសភានេះ។ បេក្ខជនប្រធានាធិបតីទាំងអស់ មិនបានបន្ធូរដៃអ្វីឡើយ ដោយពួកគេបានចំណាយពេលចុងក្រោយរបស់ពួកគេប្រឹងប្រែងស្វែងរកសំឡេងគាំទ្រពីសំណាក់អ្នកបោះឆ្នោត។ បេក្ខជនសំខាន់ៗទាំង៥ នឹងធ្វើដំណើរទៅកាន់ទីក្រុងធំៗរបស់ប្រទេស ដើម្បីទាក់ទាញសំឡេងឆ្នោតឲ្យច្រើនតាមតែអាចធ្វើបាន។
បេក្ខជននាំមុខគេ លោក Moon Jae-in មកពីគណបក្សប្រជាធិបតេយ្យសេរី ធ្វើដំណើរទៅកាន់ទីក្រុងកំពង់ផែប៊ូសាន ដែលទីក្រុងធំជាងគេទី២ មុននឹងត្រឡប់ទៅកាន់រដ្ឋធានីសេអ៊ូលដើម្បីបិទបញ្ចប់យុទ្ធនាការរបស់លោក។ លោក Moon Jae-in ដែលជាបេក្ខជនសេរីនិយម សង្ឃឹមទទួលបានការគាំទ្រពីប្រជាជនក្នុងទីក្រុងប៊ូសាន បើទោះជាទីក្រុងនេះជាមូលដ្ឋានរឹងមាំរបស់ក្រុមអភិរក្សនិយមក្ដី។ លោក ក៏នឹងទៅធ្វើយុទ្ធនាការនៅក្រុងដេគូ (Daegu) ដែលជាទីតាំងរបស់ក្រុមអភិរក្សដូចគ្នា។
បើតាមទីភ្នាក់ងារព័ត៌មាន Yonhap ការស្ទាប់ស្ទង់កន្លងមកបង្ហាញថា លោក Moon Jae-in មានសង្ឃឹមខ្ពស់ក្នុងការប្រជែងកៅអីប្រធានាធិបតី។ ប៉ុន្តែលោកមានគោលនយោបាយទន់ភ្លន់ដាក់កូរ៉េខាងជើង ដែលគំរាមកម្ទេចកូរ៉េខាងត្បូង និងចង់ពិនិត្យឡើងវិញលើការពង្រាយប្រព័ន្ធការពារមីស៊ីល THAAD លើទឹកដីកូរ៉េខាងត្បូងទៀតផង។
បេក្ខជនម្នាក់ទៀត គឺ Hong Joon-pyo ដែលជាបេក្ខជនអភិរក្សមកពីគណបក្សសេរីនិយមកូរ៉េ ក៏មិនទុកពេលថ្ងៃធ្វើយុទ្ធនាការរកសំឡេងឆ្នោតឲ្យដើរហួសដែរ។ លោក នឹងទៅកាន់ទីក្រុងប៊ូសានដូចលោក Moon Jae-in ដែរ ព្រោះទីក្រុងប៊ូសាន ជាមូលដ្ឋានរឹងមាំរបស់ក្រុមអភិរក្សនិយមស្រាប់។ លោក Hong Joon-pyo រំពឹងថាអាចការពារមូលដ្ឋានរបស់លោកបានក្នុងការបោះឆ្នោតថ្ងៃទី៩ ខែឧសភាស្អែកនេះ។
បេក្ខជនផ្សេងទៀតមាន លោក Ahn Cheol-soo របស់បក្សប្រជាជនឆ្វេងនិយម ដែលទទួលសំឡេងគាំទ្រច្រើនគួរសមក្នុងការស្ទាបស្ទង់កន្លងមក បានទៅធ្វើយុទ្ធនាការនៅតំបន់ភាគកណ្ដាលប្រទេស ដែលត្រូវចាត់ទុកជាតំបន់ប្រទាញប្រទង់រវាងបេក្ខជនទាំងអស់។ ដោយឡែក លោកស្រី Sim Sang-jeung ជាបេក្ខជនជឿនលឿន និងលោក Yoo Seong-min ជាបេក្ខជនអភិរក្សដែរនោះ ក៏ធ្វើដំណើរទៅកាន់ទីក្រុងធំៗ ដើម្បីស្វែងរកការគាំទ្រដែរ។
ការបោះឆ្នោតប្រធានាធិបតីនៅកូរ៉េខាងត្បូង នឹងចាប់ផ្ដើមវេលាម៉ោង ៦ព្រឹក ដល់ម៉ោង៨យប់ ថ្ងៃទី៩ ខែឧសភា។ នៅថ្ងៃទី៤ ខែឧសភា ប្រជាជនកូរ៉េខាងត្បូងមួយចំនួន ក៏បានទៅបោះឆ្នោតមុនកំណត់ហើយដែរ។ លទ្ធផលថានរណានឹងក្លាយជាប្រធានាធិបតីបន្តពីលោកស្រី ប៉ាក ហ្គឺនហេ ដែលត្រូវអស់តំណែង ទំនងជាដឹងនៅប្រហែលម៉ោង ៣ព្រឹក ថ្ងៃបន្ទាប់ ខណៈលទ្ធផលផ្លូវការនឹងត្រូវប្រកាសនៅពេលព្រឹកថ្ងៃទី ខែឧសភា៕
© រក្សាសិទ្ធិដោយ thmeythmey.com