អន្តរជាតិ
អឺរ៉ុបធូរទ្រូងវិញ ក្រោយលោក ម៉ាក្រុង ឈ្នះឆ្នោតប្រធានាធិបតីបារាំង ប្រធានាធិបតីជាប់ឆ្នោតបារាំង អេម៉ានុយអែល ម៉ាក្រុង លើកដៃស្វាគមន៍អ្នកគាំទ្រនៅសារមន្ទីរ Louvre កណ្ដាលក្រុងប៉ារីស (រូបភាព AP)
× ជ័យជម្នះរបស់បេក្ខជនកណ្ដាលនិយម អេម៉ានុយអែល ម៉ាក្រុង (Emmanuel Macron) ក្នុងការបោះឆ្នោតប្រធានាធិបតីបារាំង ធ្វើឲ្យសហភាពអឺរ៉ុបធូរស្រាលក្នុងចិត្តយ៉ាងខ្លាំង។ នៅមុននេះ អឺរ៉ុបពិតជាព្រួយបារម្ភខ្លាំង ព្រោះខ្លាចបេក្ខជនស្ដាំនិយមជ្រុល ម៉ារីន ឡឺប៉ែន (Marine Le Pen) ឈ្នះឆ្នោត ហើយនាំបារាំងចាកចេញពីសហភាពអឺរ៉ុប ដូចដែលអង់គ្លេសកំពុងដើរបច្ចុប្បន្ននេះ។ ខុសពីលោកស្រី ឡឺប៉ែន លោក ម៉ាក្រុង មានជំហរនយោបាយបើកទូលាយ មិនអភិរក្សនិយម និងគាំទ្រអឺរ៉ុប។
នៅទីបំផុត លោក អេម៉ានុយអែល ម៉ាក្រុង បានក្លាយជាប្រធានាធិបតីទី២៥ របស់សាធារណរដ្ឋបារាំង បន្ទាប់ពីផ្ដួលគូប្រជែងលោកស្រី ម៉ារីន ឡឺប៉ែន ក្នុងការបោះឆ្នោតជុំទី២ ថ្ងៃទី៧ ខែឧសភា។ លោក ម៉ាក្រុង ទទួលបានសំឡេងគាំទ្រច្រើនជាង ៦០ភាគរយ ពីអ្នកបោះឆ្នោតទាំងអស់។ អ្នកដែលកាន់តែសប្បាយចិត្តនឹងជ័យជម្នះរបស់លោក ម៉ាក្រុង គឺសហភាពអឺរ៉ុប ដែលកំពុងញាំញីដោយបញ្ហាលែងលះជាមួយចក្រភពអង់គ្លេស។
ដូចដឹងស្រាប់ហើយ ប្រធានាធិបតីជាប់ឆ្នោត ម៉ាក្រុង មានគោលនយោបាយគាំទ្រកិច្ចសហប្រតិបត្តិការនៅក្នុងសហភាពអឺរ៉ុប មិនរឹតត្បិតសេដ្ឋកិច្ច និយមសកលភាវូបនីយកម្ម និងបង្កើនទុនវិនិយោគក្នុងវិស័យសាធារណៈផងដែរ។ លោកជាអ្នកនយោបាយមានលក្ខណៈប្រសើរជាងគេ ដោយសារលោកមិនដែលលើកគោលនយោបាយទាំងឡាយណាដែលប៉ះពាល់រឿងរើសអើសសាសនាដូចអ្នកនយោបាយផ្សេងទៀតទេ។
អ្វីដែលគួរឲ្យចាប់អារម្មណ៍នោះ បទភ្លេង Ode to Joy ដែលជាភ្លេងតំណាងឲ្យសហភាពអឺរ៉ុប ត្រូវចាក់យ៉ាងកងរំពងនៅក្រៅសារៈមន្ទីរ Louvre កណ្តាលក្រុងប៉ារីស ខណៈប្រជាជនបារាំងគ្រប់ស្រទាប់វណ្ណៈអបអរសាទរជ័យជម្នះរបស់លោក ម៉ាក្រុង និងស្វាគមន៍លោកក្នុងនាមប្រធានាធិបតីក្មេងបំផុតក្នុងប្រវត្តិសាស្ត្របារាំង។ ដូច្នេះ នេះជាដំណឹងល្អសម្រាប់បារាំងផងនិងសម្រាប់អឺរ៉ុបទាំងមូលផង នៅពេលដែលលោក ម៉ាក្រុង ជាប់ឆ្នោតជាប្រធានាធិបតីបារាំងនោះ។
ជុំវិញការបោះឆ្នោតនេះ ប្រធានាធិបតីចប់អាណត្តិ ហ្វ្រង់ស្វ័រ ហូឡង់ (Francois Hollande) ដែលជាអ្នកនាំលោក ម៉ាក្រុង ចូលប្រឡូកនយោបាយនិយាយថា លទ្ធផលនៃការបោះឆ្នោតនេះ បានបញ្ជាក់ពីបំណងរបស់ប្រជាជនភាគច្រើនលើសលប់ដែលចង់បន្តរួបរួមគ្នា និងបានបង្ហាញពីបំណងរបស់ពួកគេក្នុងបន្តនៅក្នុងអឺរ៉ុប។ ចំណែកអធិការបតីអាល្លឺម៉ង់ ក៏សន្យាពួតដៃគ្នាជាមួយប្រធានាធិបតីជាប់ឆ្នោតបារាំង ដើម្បីអនាគតរបស់សហភាពអឺរ៉ុបដែរ។
ប្រធានគណៈកម្មការអឺរ៉ុប ហ្សង់ ក្លូត ចាំងកឺ ក៏បានអបអរជ័យជម្នះរបស់លោក ម៉ាក្រុង ។ លោក ចាំងកឺ ក៏បានប្រាប់លោក ម៉ាក្រុង ដែរថា លោកសប្បាយចិត្តពេលគោលនយោបាយរបស់លោក ម៉ាក្រុង ដែលគាំទ្រអឺរ៉ុប នឹងក្លាយជានយោបាយរបស់បារាំងទាំងមូល ក្រោមអាណត្តិដឹកនាំរបស់លោកផ្ទាល់។ ក្រៅពីនោះ មេដឹកនាំពិភពលោកផ្សេងទៀតមានចិន អង់គ្លេស អាមេរិកជាដើម ក៏បានអបអរលោក ម៉ាក្រុង ដែរ៕
Tag:
បារាំង
Emmanuel Macron
អឺរ៉ុប
© រក្សាសិទ្ធិដោយ thmeythmey.com