អន្តរជាតិ
បុរសម៉ិកស៊ិកដែលមានទម្ងន់ជិត៦០០គីឡូក្រាម ធ្វើការវះកាត់បញ្ចុះទម្ងន់
× បុរសម៉ិកស៊ិកម្នាក់ដែលមានទម្ងន់រហូតដល់ទៅជិត៦០០គីឡូក្រាម ត្រូវបានបញ្ជូនទៅកាន់មន្ទីរពេទ្យនៅទីក្រុង Guadalajara កាលពីចុងសប្តាហ៍កន្លងមក ដើម្បីធ្វើការវះកាត់សម្រកទម្ងន់។ នេះបើតាមការផ្សាយរបស់ទីភ្នាក់ងារព័ត៌មាន AFP។
លោក Juan Pedro Franco អាយុ៣២ឆ្នាំ មានទម្ងន់រហូតដល់ទៅ៥៩៥គីឡូក្រាម។ ភ្លាមៗ បន្ទាប់ពីធ្វើការវះកាត់ លោកបានស្រកទម្ងន់ប្រមាណ១៧៥គីឡូក្រាម។ លោក Jose Castaneda Cruz ដែលជាវេជ្ជបណ្ឌិតទទួលបន្ទុកផ្នែកវះកាត់ បានរៀបរាប់ថា វាគ្រាន់តែជាការវះកាត់ដំណាក់កាលបឋមប៉ុណ្ណោះ ហើយប្រសិនបើការងារនេះ ដំណើរការទៅរលូន លោក Franco អាចស្រកទម្ងន់បន្ថែមទៀត។
ក្រុមវេជ្ជបណ្ឌិត បានអះអាងថា ការវះកាត់ផ្តោតទៅលើផ្នែកក្រពះ ពោះវៀន ដោយធ្វើយ៉ាងណា កាត់បន្ថយការស្រេកឃ្លានហួសហេតុរបស់ Franco។ បណ្តាព័ត៌មានម៉ិកស៊ិក បានរាយការណ៍ថា លោក Franco ដើរចេញមិនរួចពីគ្រែអស់រយៈពេល៧ឆ្នាំហើយ ដោយសារទម្ងន់គាត់ចេះតែឡើងជាលំដាប់ចាប់ពីអាយុ១៧ឆ្នាំមក។
តាមកំណត់ត្រា ម៉ិកស៊ិកមានប្រជាពលរដ្ឋរហូតដល់ទៅ៧២,៥ភាគរយ ជួបបញ្ហាលើសទម្ងន់។ កាលពីឆ្នាំ២០០៧ ឈ្មោះលោក Manuel Uribe ដែលជាជនជាតិម៉ិកស៊ិកផងដែរនោះ ត្រូវបានចុះបញ្ជីក្នុងសៀវភៅកំណត់ត្រា Guinness World Records ដោយមានទម្ងន់៥៩៧គីឡូក្រាម ប៉ុន្តែលោកបានទទួលមរណភាពទៅហើយកាលពីឆ្នាំមុន។
កាលពីពេលថ្មីៗកន្លងមកនេះ ស្ត្រីអេហ្ស៊ីបឈ្មោះ Eman Ahmed Abd El Aty អាយុ៣៧ឆ្នាំ ដែលមានទម្ងន់ប្រមាណ៥០០គីឡូក្រាម បានស្រកទម្ងន់ជាបន្តបន្ទាប់ ក្រោយគាត់បានសម្រេចចិត្តធ្វើដំណើរទៅព្យាបាលនៅប្រទេសឥណ្ឌា៕
Tag:
ធាត់
Juan Pedro Franco
© រក្សាសិទ្ធិដោយ thmeythmey.com