កីឡាអន្តរជាតិ
អន្តរជាតិ
FIFA ស៊ើបអង្កេតជុំវិញការផ្ទេរ Pogba ទៅ Man Utd ក្នុងតម្លៃកប់ពពក
× សហព័ន្ធកីឡាបាល់ទាត់អន្តរជាតិ FIFA បានបើកការស៊ើបអង្កេតករណីផ្ទេរខ្សែបម្រើ Paul Pogba ពី Juventus ទៅ Manchester United កាលពីឆ្នាំមុន ក្នុងតម្លៃឯកត្តកម្ម ៨៩.៣លានផោន ប្រហែលជាង១១៥លានដុល្លារ។
បើតាមការចុះផ្សាយរបស់ការសែតTheGuardian ថ្ងៃទី៩ ខែឧសភានេះ FIFA បើកការស៊ើបអង្កេតនេះបន្ទាប់ពីមានឯកសារបែកធ្លាយថាភ្នាក់ងារផ្ទាល់កីឡាករលោក Mino Raiola បានទទួលចំណែកប្រមាណ៤១លានផោន ប្រហែល៥៣លានដុល្លារពីការផ្ទេររបស់ខ្សែបម្រើសញ្ជាតិបារាំង ទៅកាន់ទឹកដី Old Trafford កាលពីឆ្នាំមុន។
អង្គភាពគ្រប់គ្រងកីឡាបាល់ទាត់ពិភពលោកមួយនេះ បានសរសេរលិខិតផ្ញើទៅកាន់ក្លិបនៅ Premier League ដើម្បីស្វែងរកការបំភ្លឺលើកិច្ចព្រមព្រៀងនៃការផ្ទេរនេះ។ FIFA កំពុងព្រួយបារម្ភជុំវិញការផ្ទេរក្នុងតម្លៃជាង១១៥លានដុល្លារ រវាងក្រុម Juventus និង Man Utd ថាតើលុយដ៏សន្ធឹកសន្ធាប់នេះត្រូវចំណាយដោយរបៀបមិច។
ជុំវិញករណីនេះដែរអ្នកនាំពាក្យរបស់ Man Utd បានលើកឡើងថា៖«យើងមិនធ្វើអត្ថាធិប្បាយលើកិច្ចសន្យារបស់បុគ្គលទេ។ FIFA ទទួលបានឯកសារនេះតាំងពីការផ្ទេរត្រូវបានបញ្ចប់កាលពីខែសីហាមកម្ល៉េះ»។
ខ្សែបម្រើវ័យ២៤ឆ្នាំរូបនេះ បានក្លាយជាកីឡាករថ្លៃបំផុតលើលោកបន្ទាប់ពីផ្ទេរទៅកាន់ Man United ជាលើកទី២កាលពីដើមរដូវកាលថ្មីនេះ។ នៅរដូវកាលនេះ Pogba បង្ហាញខ្លួនឲ្យបិសាក្រហម៤៨ប្រកួត និងស៊ុតបញ្ចូលទីបាន៧គ្រាប់៕
Tag:
បាល់ទាត់
FIFA
Paul Pogba
Manchester United
© រក្សាសិទ្ធិដោយ thmeythmey.com