ជាតិ
MINUSCA រៀបចំពិធីគោរពវិញ្ញាណក្ខន្ធទាហានមួកខៀវនៅក្រុង Bangui លោក Jean-Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកជាប្រធានបេសកកម្មរក្សាសន្តិភាព
× បេសកកម្មរបស់អង្គការសហប្រជាជាតិប្រចាំសាធារណរដ្ឋអាហ្វ្រិកកណ្ដាល (MINUSCA) បានប្រកាសឲ្យដឹងថា ពិធីគោរពវិញ្ញាណក្ខន្ធទាហានមួកខៀវ៥នាក់ដែលទទួលមរណភាពដោយការវាយឆ្មក់របស់ក្រុមឧទ្ទាម Anti-Balaka នឹងប្រព្រឹត្តទៅនៅថ្ងៃទី១៣ ខែឧសភា នៅទីក្រុង Bangui។
MINUSCA បានសម្តែងការសោកស្តាយ បន្ទាប់ពីបានរកឃើញសាកសពទ័ពមួកខៀវម៉ារ៉ុក ដែលបានបាត់ខ្លួន ក្រោយការវាយប្រហារកាលពីថ្ងៃទី៨ ខែឧសភា នៅភូមិ ភូមិ Rafai តំបន់ Mbomou។ ចំនួននាក់ស្លាប់បានឡើងដល់៥នាក់ ដោយកងទ័ពមួកខៀវកម្ពុជា លោក អ៊ឹម សំ បានទទួលមរណភាពនៅកន្លែងកើតហេតុ មុននឹងការរកឃើញជាបន្តបន្ទាប់សាកសពទាហានខ្មែរ៤រូបទៀត គឺលោក ស៊ាន នរិន្ទ លោក មុំ តុលា និងលោក ម៉ៅ អេង។
បច្ចុប្បន្នទាហាន១០នាក់កំពុងសម្រាកព្យាបាលរបួសនៅមន្ទីរពេទ្យរបស់ MINUSCA ដែលក្នុងនោះមានម៉ារ៉ុក៩នាក់ និងខ្មែរ១នាក់ គឺលោក ធុច ធីម ។
ពិធីរំលឹកវិញ្ញាណក្ខន្ធវីរបុរសសន្តិភាពទាំង៥រូប នឹងប្រព្រឹត្តទៅក្រោមអធិបតីភាពលោក Jean-Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកជាប្រធានបេសកកម្មរក្សាសន្តិភាពរបស់ស្ថាប័នកំពូលមួយនេះ។
លោក Parfait Onanga-Anyanga តំណាងពិសេសរបស់អគ្គលេខាធិការអង្គការសហប្រជាជាតិ និងជាប្រធាន MINUSCA បានចូលរួមរំលែកទុក្ខជាមួយគ្រួសារជនរងគ្រោះ រួមទាំងរដ្ឋាភិបាលរបស់កម្ពុជា និងម៉ារ៉ុក៕
Tag:
MINUSCA
កងទ័ពមួកខៀវ
© រក្សាសិទ្ធិដោយ thmeythmey.com