អន្តរជាតិ
ការវាយប្រហារថ្មីមួយទៀតនៅអាហ្វ្រិកកណ្តាល ធ្វើឲ្យទាហានម៉ារ៉ុកម្នាក់ស្លាប់ កងកម្លាំងមួកខៀវ MINUSCA នាអំឡុងប្រតិបត្តិការនៅក្រុង Bangui ប្រទេសអាហ្វ្រិកកណ្តាល។ រូបថត UN
× អគ្គលេខាធិការអង្គការសហប្រជាជាតិ លោក Antonio Guterres បានថ្កោលការវាយប្រហារថ្មីមួយទៀតរបស់ក្រុមឧទ្ទាម anti-Balaka ទៅលើជនស៊ីវិល និងកងបេសកកម្មរក្សាសន្តិភាពរបស់អង្គការសហប្រជាជាតិ នៅសាធារណរដ្ឋអាហ្វ្រិកកណ្ដាល (MINUSCA) កាលពីថ្ងៃទី១២ និង១៣ ខែឧសភា នៅទីក្រុង Bangassou ប្រទេសអាហ្វ្រិកកណ្តាល។ ការវាយប្រហារនេះ បានធ្វើឲ្យមានការជម្លៀសជនស៊ីវិលជាច្រើន និងបណ្តាលឲ្យទាហានម៉ារ៉ុកម្នាក់ទទួលមរណភាព។
«អគ្គលេខាធិការអង្គការសហប្រជាជាតិ ចូលរួមរំលែកទុក្ខយ៉ាងក្រៀមក្រំចំពោះគ្រួសារជនរងគ្រោះ និងរដ្ឋាភិបាលម៉ារ៉ុក»។ នេះបើតាមសេចក្តីថ្លែងការណ៍មួយកាលពីថ្ងៃអាទិត្យរបស់អ្នកនាំពាក្យអង្គការសហប្រជាជាតិ លោក Stepane Dujarric។
ការវាយប្រហារថ្មីនេះ ស្របពេលដែល UN និង MINUSCA រៀបចំពិធីរំលឹកវិញ្ញាណក្ខន្ធ ទាហានមួកខៀវ MINUSCA ៥នាក់ (កម្ពុជា៤នាក់ និងម៉ារ៉ុក១នាក់) បានទទួលមរណភាពដោយសារការស្ទាក់វាយប្រហាររបស់ក្រុមឧទ្ទាម anti-Balaka កាលពីថ្ងៃទី៨ ខែឧសភា នៅភូមិ Rafai តំបន់ Mbomou ។ បច្ចុប្បន្ន ទាហានមួកខៀវ កម្ពុជា១នាក់ និងម៉ារ៉ុក៩នាក់កំពុងសម្រាកនៅមន្ទីរពេទ្យ។
លោក Antonio Guterres បានថ្កោលទោសចំពោះសកម្មភាពព្រៃផ្សៃរបស់ក្រុមឧទ្ទាម ដោយលោកបានចាត់ទុកថា ជាឧក្រិដ្ឋកម្មសង្គ្រាម។ តាមរយៈអ្នកនាំពាក្យ អគ្គលេខាធិការអង្គការសហប្រជាជាតិរូបនេះ អំពាវនាវដល់អាជ្ញាធរអាហ្វ្រិកកណ្តាល រួមទាំងសហគមន៍អន្តរជាតិរួមគ្នាប្រយុទ្ធប្រឆាំងអំពើឧក្រិដ្ឋកម្ម ដើម្បីនាំអ្នកប្រព្រឹត្តល្មើសឲ្យទទួលខុសត្រូវចំពោះមុខច្បាប់៕
Tag:
អាហ្វ្រិកកណ្តាល
MINUSCA
© រក្សាសិទ្ធិដោយ thmeythmey.com