សមត្ថកិច្ច រឹបអូសគ្រឿងញៀនឆ្លងដែនជាង៦០គីឡូក្រាម ពីជនសង្ស័យ២នាក់

ជាតិ

សមត្ថកិច្ច រឹបអូសគ្រឿងញៀនឆ្លងដែនជាង៦០គីឡូក្រាម ពីជនសង្ស័យ២នាក់

21, May 2017 , 9:47 am

រូបភាព

ដោយ:

ភ្នំពេញ៖ អគ្គស្នងការរងនគរបាលជាតិ បានឲ្យដឹងថា ក្នុងយុទ្ធនាការបង្ក្រាបគ្រឿងញៀនឆ្លងដែនទ្រង់ទ្រាយធំនេះ កម្លាំងរបស់ខ្លួនបានចាប់ជនសង្ស័យចំនួន២នាក់ និងគ្រឿងញៀនចំនួន៦៧គីឡូក្រាម។

លោកឧត្តមសេនីយ៍ឯក ម៉ក់ ជីតូ បានថ្លែងប្រាប់ក្រុមអ្នកសារព័ត៌មានថា ករណីនេះ គឺការជួញដូរគ្រឿងញៀនឆ្លងដែន និងមានការចាត់តាំងដោយមានការរៀបចំបណ្តាញខ្សែរយៈ៤ទៅ៥ខែរួចហើយ។ ហើយជនល្មើសទាំងនោះបានរៀបចំផែនការរក្សាទុកយ៉ាងល្អ សម្រាប់ជួញដូរគ្រឿងញៀនខុសច្បាប់ឆ្លងដែន មុននឹងសមត្ថកិច្ចចុះបង្ក្រាបបាននេះ។

អគ្គស្នងការរងនគរបាលជាតិរូបនេះ បញ្ជាក់ថា៖«ឥឡូវនេះ យើងចាប់បានមេក្លោងនៅក្នុងប្រទេសយើង និងទីកន្លែងដែលគេបញ្ជាឲ្យរក្សាទុកសម្រាប់ជួញដូរ ចំណែកមេក្លោងក្រៅប្រទេស យើងនឹងសហការណ៍ជាមួយប៉ូលីសអន្តរជាតិ ដើម្បីតាមចាប់ពួកគេបន្តទៀត»។

បើតាមលោក ម៉ក់ ជីតូ កម្ពុជា គឺជាប្រទេសរងគ្រោះនៃការដឹកជញ្ជូនគ្រឿងញៀនឆ្លងកាត់ មកពីតំបន់ត្រីកោណមាស ដែលមាន ឡាវ ភូមា ឆ្លងកាត់តាមទិសឦសានទល់ដែនកម្ពុជាឡាវ រួចនាំចេញទៅលក់នៅប្រទេសផ្សេងទៀត។ លោក ម៉ក់ ជីតូ បន្ថែមថា ករណីជួញដូរគ្រឿងញៀនខាងលើនេះ គឺមានប្រភពចេញពីប្រទេសឡាវ។

«គ្រឿងញៀនដែលចាប់បាននោះ គឺមានបីប្រភេទ ដែលក្នុងនោះរួមមាន៖ ហេរ៉ូអ៊ីន៤៧ដុំ ម្សៅមេតំហ្វេតាមីន១២កញ្ចប់ មេតំហ្វេតាមីនគ្រាប់៤៧ដុំ»។ នេះគឺជាការបញ្ជាក់របស់ លោក ម៉ក់ ជីតូ ដោយបន្ថែមថា គ្រឿងញៀនទាំង៦៧គីឡូក្រាម បានរឹបអូសពីជនសង្ស័យជនជាតិខ្មែរចំនួន២នាក់ ក្នុងប្រតិបត្តិការបង្ក្រាបរយៈពេល២៤ម៉ោង។

សូមបញ្ជាក់ថា ក្នុងយុទ្ធនាការបង្ក្រាបគ្រឿងញៀន៦ខែមកនេះ ដោយមិនគិតករណីខាងលើនេះ នគរបាលប្រឆាំងគ្រឿងញៀន ចាប់បាន៣,៥៦២ករណី និងជនល្មើស៨,០២២នាក់ ព្រមទាំងដកហូតគ្រឿងញៀនបានជាង៥០គីឡូក្រាម។ នេះបើតាមការបញ្ជាក់របស់ លោក ម៉ក់ ជីតូ៕