ពីនេះ ពីនោះ
រវាងពាក្យ «យល់» , «ដឹង» , «ស្គាល់» មានអត្ថន័យ និងប្រើខុសគ្នាយ៉ាងដូចម្តេច ?
× «យល់ គឺយល់ដោយការគិត ឬប្រាជ្ញា, ដឹង គឺដឹងដោយការយល់ និងស្គាល់ គឺស្គាល់ដោយការចាំ ឬចំណាំ» នេះជាលក្ខណសម្គាល់ពីភាពខុសគ្នារវាងពាក្យទាំងបីនេះ។ ខាងក្រោមនេះជាពន្យល់លម្អិតតាមវចនានុក្រមខ្មែររបស់សម្តេច ជួន ណាត ៖
ពាក្យ «យល់» ជាកិរិយាសព្ទ បានន័យថា ឃើញដោយប្រាជ្ញា, គិតឃើញច្បាស់។ ឧទាហរណ៍ថា យល់ការខុសត្រូវ។ ក្នុងន័យផ្សេងទៀតបានន័យថា យល់ចិត្ត គឺឃើញជ្រៅដល់ទឹកចិត្ត, យល់ព្រម គឺព្រមតាម ឬ អនុលោមតាម, យល់មុខ គឺយោគយល់ ឬអត់ឱនដោយឃើញថាមានមុខមានឈ្មោះ។ ល។
ចំណែកពាក្យ «ដឹង» ជាកិរិយាសព្ទ បានន័យថា បានដំណឹង, ចូលចិត្តជាក់, ជ្រាបច្បាស់ក្នុងចិត្ត, យល់ជាក់។ ឧទាហរណ៍ថា ដឹងការណ៍ពិត ។ បើជា នាមសព្ទ មានន័យថា ប្រដាប់ ឬគ្រឿងប្រើប្រាស់ធ្វើដោយដែក មានដងមានផ្លែសម្រាប់ក្របែលដូចជា ពុះ, ច, ចាំងឈើ ។ល។
រីឯពាក្យ «ស្គាល់» ជាកិរិយាសព្ទ បានន័យថា ចាំបាន, ចាំជាក់, ចំណាំបាន, ដឹងបាន, ដឹងច្បាស់, ចាំស្និទ្ធ ស្គាល់គ្នា, ស្គាល់ចិត្ត, ស្គាល់ឈ្មោះ, ស្គាល់ផ្លូវ ។ល៕
© រក្សាសិទ្ធិដោយ thmeythmey.com