ពីនេះ ពីនោះ
ហេតុអ្វីគេមិនប្រើពាក្យ«នេត្រាទស្សន៍» ជំនួសពាក្យ «ទូរទស្សន៍»?
× សៀវភៅ សិក្សាអក្សរសាស្ត្រខ្មែរ របស់លោកលាង ហាប់អាន អតីត ប្រធានសមាគមអ្នកនិពន្ធខ្មែរ បានឲ្យដឹងថា នៅអំឡុងឆ្នាំ១៩៦៧ ក្រោយពេលមានការហូរចូលដំបូង នូវឧបករណ៍ទំនើបសម្រាប់មើលរូបភាពកម្សាន្ត តេឡេវីស្យុង(Television) កាន់តែច្រើនទៅៗ សមាគមអ្នកនិពន្ធខ្មែរ ហាក់មានការព្រួយបារម្ភចំពោះវិស័យអំណានរបស់ខ្លួន។
សមាគមអ្នកនិពន្ធខ្មែរ ចាប់ផ្តើមធ្វើ សកម្មភាពខ្លាំងឡើងៗ ដើម្បីប្រជែងដណ្តើមយក ប្រជាប្រិយភាពពីប្រព័ន្ធបច្ចេកវិទ្យា តេឡេវីស្យុងនេះ ដូចជាការឃោសនាតាមវិទ្យុ ចុះផ្សាយអត្ថបទនិពន្ធតាមសារព័ត៌មាន ទស្សនាវដ្តី ក្នុងនោះ ប្រព័ន្ធនេត្រាទស្សន៍(Television) ក៏ជាគោលដៅសំខាន់ក្នុងការផ្សព្វផ្សាយ ពីសកម្មភាព និងចលនាអក្សរសិល្បិ៍ខ្មែរផងដែរ។
នេត្រាទស្សន៍ ទំនងជាពាក្យ ដែលត្រូវបានសមាគមអ្នកនិពន្ធខ្មែរ សម័យនោះ បង្កើតឡើង ដើម្បីជំនួសពាក្យថា Television។ តាមរៀមច្បងចាស់ៗ ដែលធ្លាប់ដឹងរឿង នេះ បានបញ្ជាក់ថា នេត្រាទស្សន៍ ត្រូវបានបង្កើតឡើង ក្រោយពេលTelevision ចូលមកដល់ ហើយក្រោយមក បន្ទាប់ពីប្រធានសមាគម យកពាក្យនេះទៅឆ្លង សម្តេចព្រះសង្ឃរាជជួន ណាត ជោតញាណោ បានស្នើឲ្យប្រើពាក្យថា ទូរទស្សន៍ ជំនួសពាក្យថា នេត្រាទស្សន៍វិញ។ នេត្រាទស្សន៍ មានន័យថា ការមើល ឬទស្សនា ដោយភ្នែក។ ចំណែកពាក្យថា ទូរទស្សន៍ មានន័យថា ការទស្សនាពីចម្ងាយ។ ទូរ មានន័យថាឆ្ងាយ ពីចម្ងាយ ឬមកពីពាក្យថា ទូរគមនាគមន៍ ឯ ពាក្យថាទស្សន៍ មានន័យថា ការមើល ការសម្លឹង ជាដើម។
បច្ចុប្បន្ននេះ នៅមជ្ឈមណ្ឌលបូផាណា មានបង្កើតពាក្យថ្មីមួយទៀត សម្រាប់ប្រើប្រាស់ ជាផ្លូវការរបស់មជ្ឈមណ្ឌលនេះ គឺពាក្យ សោតទស្សន៍(មជ្ឈមណ្ឌលសោតទស្សន៍បូផាណា) ដែលអាចមានន័យថា ស្តាប់ផង មើលផង ឬមើលផង ស្តាប់ផង៕
© រក្សាសិទ្ធិដោយ thmeythmey.com