ជាតិ
គ.ជ.ប ទទួលបានបណ្ដឹងជិត៥០ពីCPP និងជាង១០ពីCNRP ក្នុងយុទ្ធនាការឃោសនាបោះឆ្នោត
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលពាក្យបណ្ដឹងជាង៦០ ពីគណបក្សនយោបាយ ក្នុងយុទ្ធនាការបោះឆ្នោតឃុំ-សង្កាត់ រយៈពេល១៣ថ្ងៃនេះ។ បណ្ដឹងភាគច្រើនប្ដឹងដោយគណបក្សប្រជាជន និងគណបក្សសង្គ្រោះជាតិ។
ក្នុងយុទ្ធនាការឃោសនាបោះឆ្នោតនេះ គ.ជ.ប បានសង្តេតឃើញថា គណបក្សប្រជាជនកម្ពុជា និងគណបក្សសង្គ្រោះជាតិ ដង្ហែក្បួនឃោសនាទ្រង់ទ្រាយធំ ទូទាំង២៥ រាជធានី-ខេត្ត ជារៀងរាល់ថ្ងៃ ខណៈដែលគណបក្សចំនួន១០ទៀត បានត្រឹមតែហែក្បួនឃោសនានៅក្នុងឃុំ-សង្កាត់ ដែលពួកគេដាក់បេក្ខជនឈរឈ្មោះប៉ុណ្ណោះ។ ក្រៅពីហែក្បួនឃោសនានេះ គណបក្សទាំង១២នេះ ក៏មានសកម្មភាពចុះចែកខិតបណ្ណ មួក អាវយឺត បដា ពាក្យស្លោក ស្លាកសញ្ញាគណបក្សតាមផ្ទះ និងចាក់មេក្រូផ្សព្វផ្សាយពីគោលនយោបាយគណបក្សតាមភូមិផងដែរ។
តាមរយៈការឃោសនានេះ គ.ជ.ប បានទទួលពាក្យបណ្ដឹងចំនួន៦៥ពីគណបក្សនយោបាយ ដោយក្នុងនោះពីខាងគណបក្សប្រជាជនកម្ពុជាចំនួន៤៨ គណបក្សសង្គ្រោះជាតិ១៤ គណបក្សហ្វ៊ុនស៊ីនប៉ិច១ និងពីប្រជាពលរដ្ឋចំនួន២បណ្ដឹង។ ក្នុងចំណោមបណ្ដឹងទាំង៦៥នេះ មានបណ្ដឹងចំនួន៨ ត្រូវបានដាក់ប្ដឹងទៅគណៈកម្មាធិការខេត្តរៀបចំការបោះឆ្នោត ហើយត្រូវគណៈកម្មាធិការឃុំ-សង្កាត់ រៀបចំការបោះឆ្នោតនិង គណៈកម្មាធិការខេត្តរៀបចំការបោះឆ្នោត កំពុងដោះស្រាយតាមនីតិវិធី។
ជុំវិញបញ្ហានេះដែរ អ្នកនាំពាក្យគ.ជ.ប ធ្លាប់ប្រាប់សារព័ត៌មានថ្មីៗថា បណ្ដឹងគណបក្សប្រជាជនកម្ពុជាភាគច្រើនប្ដឹង ទៅលើគណបក្សសង្គ្រោះជាតិ ក្រោមអង្គហេតុបែបរិះគន់គ្នាដោយសម្តីធ្ងន់ៗ និងការជេរប្រមាថ បន្តុះបង្អាប់គ្នាជាដើម។ ហើយគណបក្សសង្គ្រោះជាតិ ក៏បានប្ដឹងទៅគណបក្សប្រជាជនវិញដែរ។
តែយ៉ាងណាអ្នកនាំពាក្យគ.ជ.បរូបនេះ នៅតែវាយតម្លៃថា ដំណើការឃោសនាបោះឆ្នោតឃុំ-សង្កាត់ អាណត្តិទី៤នេះ មានភាពល្អប្រសើច្រើនជាងឆ្នាំមុន ត្រង់ថា គ.ជ.ប ទទួលបានពាក្យបណ្ដឹងតិច ហើយភាគច្រើនអាចដោះស្រាយបានតាមនីតិវិធី។
សូមបញ្ជាក់ថា យុទ្ធនាការឃោសនាបោះឆ្នោតឃុំ-សង្កាត់ នឹងត្រូវបញ្ចប់នៅថ្ងៃទី០២ មិថុនា ។ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាអាណត្តិទី៤ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧ ដោយមានគណបក្សនយោបាយចំនួន ១២ ចូលរួមប្រកួតប្រជែងដណ្តើមបេក្ខភាព នៅក្នុងឃុំ-សង្កាត់ចំនួន ១,៦៤៦ ទូទាំង ២៥រាជធានី-ខេត្ត៕
Tag:
គ.ជ.ប
CPP
CPP
បោះឆ្នោតឃុំសង្កាត់
© រក្សាសិទ្ធិដោយ thmeythmey.com