ឌូទើតេថា ក្រុមភេរវជនហ្វីលីពីនទទួលជំនួយពីឈ្មួញគ្រឿងញៀនក្នុងស្រុកមិនមែនពីមជ្ឈិមបូព៌ាទេ

អន្តរជាតិ

ឌូទើតេថា ក្រុមភេរវជនហ្វីលីពីនទទួលជំនួយពីឈ្មួញគ្រឿងញៀនក្នុងស្រុកមិនមែនពីមជ្ឈិមបូព៌ាទេ

01, Jun 2017 , 5:39 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានបញ្ជាក់ថា ក្រុមភេរវជននៅហ្វីលីពីនមិនបានទទួលការគាំទ្រផ្ទាល់ពីក្រុមភេរវជនដែស្ហឬក្រុមរដ្ឋឥស្លាមឡើយ តែពួកគេបានទទួលជំនួយហិរញ្ញវត្ថុពីឈ្មួញគ្រឿងញៀនក្នុងស្រុកប៉ុណ្ណោះ។ លោកក៏សារភាពផងដែរថា កងទ័ពរដ្ឋាភិបាលរបស់លោកបរាជ័យធ្ងន់ធ្ងរ ក្នុងប្រតិបត្តិការសឹកកម្ចាត់ភេរវជនដោយសារក្រុមភេរវជននៅមិនដាណាវហាក់ត្រៀមលក្ខណៈជាមុននិងរៀបចំកម្លាំងអស់រយៈពេលយូរមកហើយដើម្បីប្រឆាំងរដ្ឋាភិបាល។ អ្វីដែលសំខាន់ប្រមុខរដ្ឋហ្វីលីពីនរូបេនះសម្រេចផ្លាស់ប្តូរជំហររបស់ខ្លួនដែរដោយប្រកាសបិទទ្វារឈប់ចរចាជាមួយក្រុមភេរវជនទៀតហើយ។

ឈានដល់សប្តាហ៍ទីពីរហើយ ការប្រយុទ្ធគ្នារវាងភេរវជន Maute បណ្តាញក្រុមដែស្ហឬក្រុមរដ្ឋឥស្លាម ជាមួយកងកម្លាំងរដ្ឋាភិបាលមិនទាន់ចប់ឡើយ ថ្វីបើរដ្ឋាភិបាលអាចគ្រប់គ្រងស្ថានការណ៍បានទាំងស្រុងក៏ពិតមែន។ បើតាមសម្តីអ្នកនាំពាក្យកងទ័ពហ្វីលីពីន Restituto Padilla ដែលដកស្រង់ដោយទីភ្នាក់ងារព័ត៌មាន AP អ្នកស្លាប់ក្នុងប្រតិបត្តិការសឹកនេះកើនឡើងដល់ ១២៩នាក់ ហើយជនស៊ីវិលប្រហែល ១០០០នាក់នៅជាប់គាំងក្នុងទីក្រុង Marawi នៅឡើយ។ កងទ័ពហ្វីលីពីនបន្តប្រើប្រាស់ឧទ្ធម្ភាគចក្របាញ់គ្រាប់រ៉ុក្កែតប្រឆាំងក្រុមភេរវជន និងប្រើប្រាស់កាំភ្លើងធំបាញ់ផ្លោងជាបន្តបន្ទាប់ដែរដើម្បីពន្លឿនប្រតិបត្តិការបោសសម្អាតក្រុមភេរវកម្មនេះ។

កងកម្លាំងរដ្ឋាភិបាលហាក់បីដូចជាប្រឈមការលំបាកច្រើនក្នុងការប្រើប្រាស់កម្លាំងកម្ចាត់ក្រុមភេរវជននៅសេសសល់ ហើយក្រុមនេះហាក់បីដូចជាត្រៀមលក្ខណៈជាមុននិងពង្រឹងកម្លាំងរបស់ខ្លួនរយៈពេលយូរមកហើយដែរ។

ក្នុងខួបលើកទី ១១៩ នៃការបង្កើតកងទ័ពជើងទឹកថ្ងៃពុធទី ៣១ ខែឧសភានេះ ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ ទទួលស្គាល់ថា កងកម្លាំងលោកប្រឈមបញ្ហាច្រើនណាស់ក្នុងការកម្ចាត់ក្រុមភេរវជន Maute ដែលជាក្រុមសកម្មប្រយុទ្ធចំណុះឲ្យក្រុមអាប៊ូសាយ៉ាវ (Abu Sayyaf)នោះ។ លោកសារភាពថា វាជាបរាជ័យធ្ងន់ធ្ងរមួយរបស់កម្លាំងរដ្ឋាភិបាល ព្រោះកងទ័ពលោកប្រៀបដូចជាទ័ពដែលកំពុងព្យាយាមវាយឈ្លានពានចូលទីក្រុង ខណៈដែលក្រុមឧទ្ទាមរៀបចំជើងព្រួលយ៉ាងរឹងមាំសម្រាប់តតាំងជាមួយរដ្ឋាភិបាលតាំងពីយូរមកហើយ។

«ខ្ញុំមិនសប្បាយចិត្តសោះដែលត្រូវប្រាប់អ្នកថា យើងបានរងគ្រោះខ្លាំងដោយសារការបរាជ័យធ្ងន់ធ្ងរនេះ។ ព្រោះយើងជាកងកម្លាំងឈ្លានពាន ហើយពួកគេបានពង្រឹងកម្លាំងនៅទីនោះអស់ពេលជាយូរមកហើយដើម្បីរង់ចាំកងទ័ពយើងចូលទៅដល់»។ នេះជាការបញ្ជាក់របស់លោក ឌូទើតេ។

កងទ័ពហ្វីលីពីនចំនួន ២១ បានពលីរួចទៅហើយក្នុងការប្រយុទ្ធប្រឆាំងជាមួយក្រុមភេរវជនដែលមានគ្នីគ្នាប្រហែលជាង ២០០នាក់នោះ ហើយដូចឃើញស្រាប់ហើយការប្រយុទ្ធនៅតែបន្ត ហើយក្រុមភេរវជនមិនចុះញ៉មសូម្បីតែបន្តិច និងមិនដាក់អាវុធសុំចុះចាញ់ឡើយ។

១.ក្រុមភេរវជនហ្វីលីពីនរស់ដោយលុយរបស់ឈ្មួញគ្រឿងញៀន មិនមែនជំនួយពីមជ្ឈិមបូព៌ាឡើយ

បន្ថែមពីលើការបរាជ័យរបស់កងទ័ពរដ្ឋាភិបាលហ្វីលីពីន លោក ឌូទើតេ ក៏បានបកស្រាយពីការពង្រីកបណ្តាញក្រុមភេរវជនរដ្ឋឥស្លាមនៅក្នុងទឹកដីហ្វីលីពីនផងដែរ។ យោងតាមសារព័ត៌មាន ហ្វីលីពីន Philippine Star មេដឹកនាំមាត់ឆៅ វ័យ ៧២ឆ្នាំនេះបានសង្កត់ធ្ងន់ថា ក្រុមភេរវជនហ្វីលីពីនដែលប្រកាសបង្ហាញភក្តីភាពចំពោះក្រុមភេរវជនដែស្ហឬក្រុមរដ្ឋឥស្លាម អាចធ្វើសកម្មភាពបានដោយសារលុយគ្រឿងញៀនតែម្តង។

លោកបកស្រាយថា រដ្ឋាភិបាលលោកមានលទ្ធភាពផ្តាច់ចរន្តលុយដែលផ្តល់មកពីមជ្ឈិមបូព៌ា ហើយលុយជំនួយដែលក្រុមភេរវជនក្នុងស្រុកទទួលបានជាលុយកខ្វក់ដែលឈ្មួញគ្រឿងញៀនផ្តល់ឲ្យប៉ុណ្ណោះ។ បន្ថែមពីនេះ ដោយសារសង្គ្រាមកម្ចាត់គ្រឿងញៀនរបស់លោកផង ទើបបានជាឈ្មួញគ្រឿងញៀនរត់រកជំនួយពីក្រុមភេរវជនដើម្បីទទួលបានការពារខ្លួន។

លោក ឌូទើតេ បានថ្លែងដូច្នេះ៖ «តាំងពីយូរមកដល់ពេលឥឡូវនេះ សកម្មភាពភេរវកម្មនៅហ្វីលីពីនបញ្ឆេះឡើង និងទទួលបានការគាំទ្រពីក្រុមឈ្មួញគ្រឿងញៀន។ ពិតណាស់ ក្រុមឈ្មួញគ្រឿងញៀនស្វះស្វែងរកការគាំទ្រនិងការពារពីក្រុមភេរវជន និងដើម្បីឲ្យជំនួញគ្រឿងញផនរបស់គេទទួលជោគជ័យ»។

តាមរបាយការណ៍សង្គមស៊ីវិល និងក្រុមសិទ្ធិមនុស្ស សង្គ្រាមគ្រឿងញៀនដ៏ចម្រូងចម្រាសរបស់លោក ឌូទើតេ បានសម្លាប់មនុស្សអស់ចន្លោះពី ៧ពាន់ទៅ ៩ពាន់នាក់។ ប៉ុន្តែខាងប៉ូលិសហ្វីលីពីន បានទាត់ចោលរបាយការណ៍នេះ ហើយអះអាងថាអ្នកស្លាប់មានប្រហែល ៤ពាន់នាក់ប៉ុណ្ណោះ។ សង្គ្រាមបង្ហូរឈាមបំបែកឈ្មួញគ្រឿងញៀននេះ ឈានដល់ការចាប់ខ្លួននិងបាញ់សម្លាប់មន្ត្រីជាន់ខ្ពស់ហ្វីលីពីនជាច្រើនរួមទាំងសមាជិកសភា និងអភិបាលក្រុងជាដើមផងដែរ។

២. ឌូទើតេ៖«ទ្វារសម្រាប់ការចរចាជាមួយក្រុមភេរវជនបិទហើយ»

ដោយសារកងកម្លាំងរដ្ឋាភិបាលកាន់តែមានប្រៀបក្នុងការប្រយុទ្ធបោសសម្អាតភេរវជន លោក ឌូទើតេ បានប្តូរជំហរបិទទ្វារឈប់ចរចាជាមួយក្រុមភេរវជនទៀតហើយ។កាលពីសប្តាហ៍មុនលោក ឌូទើតេ បានប្រកាសថា លោកទុកទ្វារចំហរសម្រាប់ក្រុមភេរវជន Maute ចង់ចរចាជាមួយរដ្ឋាភិបាល។

បច្ចុប្បន្ននេះ កងកម្លាំងរដ្ឋាភិបាលបានកាប់កាប់បាន ៩០ភាគរយនៃទីក្រុងទាំងមូល ខណៈក្រុមភេរវជននៅបន្តកាន់កាប់ ១០ភាគរយផ្សេងទៀតរួមជាមួយជនស៊ីវិលប្រហែល មួយពាន់នាក់ផ្សេងទៀតផង។ លើសពីនេះ រដ្ឋាភិបាលមានលទ្ធភាពក្តោបក្តាប់ស្ថានការណ៍បានទាំងស្រុង និងអាចគ្រប់គ្រងអ្នកចេញ អ្នកចូលក្នុងទីក្រុងបានផងដែរ។ យ៉ាងណាក៏ដោយ មេខ្លោងក្រុមភេរវជន អាប៊ូ សាយ៉ាវ Isnilon Hapilon មិនទាន់ត្រូវបានគេចាប់ខ្លួនឡើយ ប៉ុន្តែយោធាហ្វីលីពីនជឿជាក់ថា ជននេះនៅបន្តសម្ងំលាក់ខ្លួននៅក្នុងទីក្រុង Marawi នេះនៅឡើយ។

ថ្វីបើលោក ឌូទើតេ បិទទ្វារឈប់ចរចាជាមួយក្រុមភេរវជនក្តី អ្នកនាំពាក្យកងទ័ពហ្វីលីពីន Restituto Padilla បានបកស្រាយថា កងកម្លាំងហ្វីលីពីននៅតែរក្សាសិទ្ធិទាក់ទងជាមួយរាល់ក្រុមសកម្មប្រយុទ្ធដែលព្រមដាក់អាវុចុះនិងអាចជួយសម្រួលដល់ការរំដោះចំណាប់ខ្មាំងបាននោះ។

តាមពិតទៅ កម្លាំងរដ្ឋាភិបាលបានបង្កើនការវាយប្រហារដោយប្រើប្រាស់ឧទ្ធម្ភាគចក្របាញ់រ៉ុក្កែតនាំផ្លូវ និងប្រើប្រាស់កាំភ្លើងធំបាញ់ផ្លោងផងដើម្បីបោសសម្អាតក្រុមភេរវជននៅក្នុងទីក្រុងនេះចាប់ពីថ្ងៃសៅរ៍សប្តាហ៍មុន ព្រោះរដូវបុណ្យបួសសាសនាឥស្លាម Ramadan បានមកដល់។ រដ្ឋាភិបាលហ្វីលីពីនយល់ពីការលំបាករបស់ប្រជាជនដែលស្ថិតនៅទីក្រុង ព្រោះពួកគាត់ចាំបាច់ត្រូវប្រារព្ធពិធីបុណ្យសាសនានេះ ហើយបើសិនការប្រយុទ្ធគ្នាមិនចប់ ពួកគាត់ក៏មិនអាចជួបជុំគ្រួសារបានស្រួលដែរ។

សូមបញ្ជាក់ថា ប្រធានាធិបតីហ្វីលីពីលោក រ៉ូឌ្រីហ្គោ ឌូទើតេ បានប្រកាសប្រើប្រាស់ច្បាប់អាជ្ញាសឹកនៅថ្ងៃអង្គារទី ២៣ ឧសភាក្រោយការប៉ះទង្គិចគ្នានេះ។ លោកធ្លាប់លើកឡើងថា រដ្ឋាភិបាលលោកអាចនឹងអនុវត្តច្បាប់អាជ្ញាសឹកក្នុងរយៈពេលវែងក្នុងករណីដែលចាំបាច់ដើម្បីឆ្លើយតបបញ្ហាសន្តិសុខបង្កដោយក្រុមភេរវជន។ លោកព្រលយថា លោកមិនខ្វាយខ្វល់ពីការសម្រេចរបស់តុលាការកំពូល និងសភាដែលជាអ្នកធានារក្សាការពាររដ្ឋធម្មនុញ្ញនោះឡើយ។ យោងតាមរដ្ឋធម្មនុញ្ញហ្វីលីពីនឆ្នាំ ១៩៨៧ ច្បាប់អាជ្ញាសឹកមានអនុភាពគតិយុត្តិរយៈពេល៦០ថ្ងៃប៉ុណ្ណោះ ហើយប្រធានាធិបតីហ្វីលីពីនត្រូវសុំការយល់ព្រមពីសភាជាមុនសិនដើម្បីបន្តការអនុវត្តច្បាប់នេះ៕