អតីតសកម្មជនសិទ្ធិមនុស្ស លោក ឆាយ ធី ឈ្នះកៅអីមេឃុំនៅរតនគិរី

ជាតិ

នយោបាយជាតិ

អតីតសកម្មជនសិទ្ធិមនុស្ស លោក ឆាយ ធី ឈ្នះកៅអីមេឃុំនៅរតនគិរី

05, Jun 2017 , 10:34 am

រូបភាព

ដោយ: អុឹង ចំរើន (Ung Chamroeun)

លោក ឆាយ ធី អតីតអ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី ទទួលបានសំឡេងគាំទ្រសម្រាប់តំណែងមេឃុំប៉ាតេ ស្រុកអូរយ៉ាដាវ ក្នុងកូតាគណបក្សប្រជាជនកម្ពុជា។ នេះបើតាមលទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អណត្តិទី៤ កាលពីថ្ងៃអាទិត្យ ទី៤ ខែមិថុនា។

លទ្ធផលបឋមដែលផ្សាយគណៈកម្មាធិការជាតិរៀបចំការបោះឆ្នោត (គ.ជ.ប) បានបង្ហាញថា គណបក្សប្រជាជនកម្ពុជា ទទួលបានការគាំទ្រ៣០៩សំឡេង ហើយគណបក្សប្រជាធិបតេយ្យមូលដ្ឋាន ផ្តល់ភាពភ្ញាក់ផ្អើល ដោយទទួលបាន២៨៩សំឡេង ខណៈគណបក្សសង្គ្រោះជាតិស្ថិតនៅលំដាប់ទីបី ជាមួយនឹង២៤៧សំឡេង។

ឃុំប៉ាតេ ត្រូវបានគ្រប់គ្រងដោយមេឃុំមកពីគណបក្សសម រង្ស៊ី ពីរអណត្តិមកហើយ។ យោងតាមលទ្ធផលបោះឆ្នោត កាលពីឆ្នាំ២០១២ ក្នុងចំណោមអាសនៈចំនួន៥នៅក្នុងនេះ គណបក្សសម រង្ស៊ី បានតំណែងមេឃុំ និងជំទប់ទី១ ហើយគណបក្សប្រជាជនកម្ពុជា កាន់តួនាទីជាជំទប់ទី២ រួមទាំងសមាជិក១បន្ថែមទៀតរៀងៗខ្លួន។

នៅក្នុងអណត្តិទី៤នេះ គណបក្សប្រជាជនកម្ពុជា បានដាក់បេក្ខភាពចំនួន១២នាក់ ដោយលោក ឆាយ ធី ឈរលំដាប់ទីមួយ លោក សេវ ញាំង ដែលបានឈ្នះក្នុងកូតាគណបក្សសម រង្ស៊ី កាលពីឆ្នាំ២០១២ ឈរនៅលំដាប់ទីពីរ។

គណបក្សប្រជាធិបតេយ្យមូលដ្ឋាន ដែលទទួលបានការគាំទ្ររហូតដល់២៨៩សំឡេងផងដែរនោះ មាន លោក លុយ ដន ឈរលំដាប់ទីមួយ។ អ្វីដែលគួរឲ្យកត់សម្គាល់នោះ គណបក្សដ៏ថ្មីថ្មោងមួយនេះ ទទួលសំឡេងគាំទ្រលើសបក្ស២ផ្សេងទៀតនៅការិយាល័យមួយក្នុងចំណោមការិយាល័យទាំង៥នៅឃុំប៉ាតេ។

ដោយឡែក គណបក្សសង្គ្រោះជាតិ បានដាក់លោក រម៉ាម ខាំផន ជាបេក្ខជនលំដាប់ទីមួយ ហើយបច្ចុប្បន្ន លោក រម៉ាម យួត គឺជាមេឃុំ ក្នុងកូតាគណបក្ស សម រង្ស៊ី ដែលនឹងត្រូវផុតអណត្តិ។

យោងតាម បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្ដិទី៤ ឆ្នាំ២០១៧ អាសនៈនៅក្នុងក្រុមប្រឹក្សាឃុំ សង្កាត់ត្រូវបែងចែកដោយផ្អែកលើអាសនៈ និងលទ្ធផលនៃការបោះឆ្នោតក្នុងឃុំ សង្កាត់នីមួយៗ។

បើទោះបីជា គ.ជ.ប មិនទាន់ឈានដល់ការបែងចែកអាសនៈក៏ដោយ តែលោក យ៉ង សាំង កុមារ រំពឹងថា គណបក្សរបស់លោក ទំនងទទួលបាន២អាសនៈក្រុមប្រឹក្សានៅឃុំប៉ាតេ ក្នុងខេត្តរតនគីរី ភាគឦសាននៃប្រទេសកម្ពុជា៕