ចុងក្រោយចិនព្រមគាំទ្រអ៊ីរ៉ង់ជាសមាជិកអង្គការសន្តិសុខ «កិច្ចសហប្រតិបត្តិការសៀងហៃ»

អន្តរជាតិ

ចុងក្រោយចិនព្រមគាំទ្រអ៊ីរ៉ង់ជាសមាជិកអង្គការសន្តិសុខ «កិច្ចសហប្រតិបត្តិការសៀងហៃ»

06, Jun 2017 , 9:19 am

រូបភាព

ដោយ: ថ្មីៗ

មហាយក្សចិនគាំទ្រអ៊ីរ៉ង់ជាសមាជិកអង្គការកិច្ចសហប្រតិបត្តិការសៀងហៃ (SCO) ដែលដឹកនាំដោយរុស្ស៊ីនិងចិនផ្ទាល់។ កិច្ចពិភាក្សាស្តីលទ្ធភាពនៃការទទួលយកអ៊ីរ៉ង់ជាសមាជិកនៃអង្គការសន្តិសុខតំបន់នេះនឹងត្រូវរៀបចំឡើងក្នុងកិច្ចប្រជុំរបស់ខ្លួននៅក្នុងសប្តាហ៍នេះដែរ។

ការស្នើសុំរបស់អ៊ីរ៉ង់ដើម្បីចូលជាសមាជិកអង្គការកិច្ចសហប្រតិបត្តិការសៀងហៃនឹងត្រូវលើកយកមកពិភាក្សានៅសប្តាហ៍នេះក្នុងកិច្ចប្រជុំកំពូលប្រចាំឆ្នាំ។ ចិនដែលជាមេដឹកនាំអង្គការថ្នាក់តំបន់នេះដែរនោះ បានប្រកាសគាំទ្របេក្ខភាពរបស់អ៊ីរ៉ង់ក្នុងការចូលរួមជាមួយខ្លួនផងដែរ។

យោងតាមទីភ្នាក់ងារព័ត៌មាន Reuters ឧបការីរដ្ឋមន្ត្រីការបរទេសចិន Li Huilai បានលើកឡើងថា អ៊ីរ៉ង់បានក្លាយជាសមាជិកអង្កេតការណ៍យូរមកហើយរបស់អង្គការកិច្ចសហប្រតិបត្តិការសៀងហៃ ហើយអ៊ីរ៉ង់ក៏បានចូលរួមចំណែកយ៉ាងសកម្មក្នុងការជំរុញឲ្យមានការអភិវឌ្ឍក្នុងស្ថាប័ននេះច្រើនដែរកន្លងមក។

«ចិនពិតជាកោតសរសើរអ៊ីរ៉ង់។ ចិនស្វាគមន៍និងគាំទ្របំណងអ៊ីរ៉ង់ក្នុងការក្លាយខ្លួនជាសមាជិកអង្គការកិច្ចសហប្រតិបត្តិការសៀងហៃជាផ្លូវការ»។ នេះជាការបញ្ជាក់របស់មន្ត្រីជាន់ខ្ពស់ចិនរូបនេះ។

សំណុំរឿងអ៊ីរ៉ង់នេះនឹងត្រូវលើកយកទៅជជែកក្នុងប្រជុំកំពូលអង្គការកិច្ចសហប្រតិបតិ្តការសៀងហៃក្នុងសប្តាហ៍នេះនៅទីក្រុង Astana ប្រទេសកាហ្សាក់ស្ថាន ហើយប្រធានាធិបតីចិនលោក ស៊ី ជិនភីង ក៏នឹងមានវត្តមានក្នុងកិច្ចប្រជុំកម្រិតខ្ពស់នេះដែរ។

បើតាមលោក Li នៅក្នុងកិច្ចប្រជុំកំពូលខាងមុខនេះដែរ ប្រទេសពីរឥណ្ឌានិងប៉ាគីស្ថាននឹងក្លាយជាសមាជិកកិច្ចសហប្រតិបត្តិការសៀងហៃជាផ្លូវការ ហើយវាបង្ហាញឲ្យឃើញថា អង្គការនេះកំពុងតែទទួលបានការគាំទ្រច្រើននិងអាចមានលទ្ធភាពពង្រីកឥទ្ធិពលរបស់ខ្លួនបានរហ័សផងដែរ។

លោក Li បានបន្តថា៖ «ប្រទេសកាន់តែច្រើនរំពឹងថានឹងក្លាយជាដៃគូសន្ទនា, ជាសមាជិកអង្កេតការណ៍ និងជាសមាជិកផ្លូវការរបស់អង្គការកិច្ចសហប្រតិបត្តិការសៀងហៃ។ ចិនស្វាគមន៍ប្រទេសទាំងអស់ដែលចង់ចូលរួមនិងមានលទ្ធភាពបំពេញតាមលក្ខខណ្ឌដើម្បីស្នើសុំចូលជាសមាជិកក្តី, ជាសមាជិករដ្ឋអង្កេតការណ៍ក្តី ឬជាដៃគូសន្ទនាក្តី»។

ត្រឡប់មកវិញ អ៊ីរ៉ង់បានគោះទ្វារស្នើសុំចូលរួមជាមួយអង្គការតំបន់នេះក្រោយពេលដែលទណ្ឌកម្មលោកខាងលិចត្រូវបានដក ហើយអ៊ីរ៉ង់រំពឹងខ្ពស់ថា ខ្លួនអាចក្លាយជាសមាជិកអង្គការនេះជាផ្លូវការ។ ប៉ុន្តែឆ្នាំមុន អង្គការកិច្ចសហប្រតិបត្តិការសៀងហៃនេះបានបដិសេធសំណើរបស់អ៊ីរ៉ង់សុំចូលរួមជសមាជិក ទោះបីជារុស្ស៊ីបានស្នើសុំនិងគាំទ្រសំណើរបស់អ៊ីរ៉ង់ក៏ដោយ។ វាបង្ហាញឲ្យឃើញពីការបែកខ្ញែកគ្នារវាងប្រទេសជាមេដឹកនាំអង្គការទាំងពីរគឺរុស្ស៊ីនិងចិនតែម្តង។

សូមបញ្ជាក់ថា អង្គការកិច្ចសហប្រតិបត្តិការសៀងហៃត្រូវបានបង្កើឡើងនៅឆ្នាំ ២០០១ ដោយមានសមាជិកដូចជារុស្ស៊ី,ចិន, កាហ្សាក់ស្ថាន, គៀស៊ីស្ថាន និងអ៊ុយបេគីស្ថាន ហើយគោលដៅសំខាន់នៃការបង្កើតអង្គការនេះឡើងគឺប្រឆាំងរាល់ការគំរាមកំហែងដែលបង្កឡើងដោយចលនាភេរវកម្មនិងការជួញដូរគ្រឿងញៀនមកទឹកដីអាហ្វហ្គានីស្ថាន៕