ជាតិ
ក្រោយបោះឆ្នោត ឯ.ឧ កឹម សុខា ទៅអរគុណអ្នកគាំទ្រ នៅស្រុកស្អាង និងកោះធំមុនគេ
× ស្រុកស្អាង និងស្រុកកោះធំ គឺជាទីដែលប្រធានគណបក្សសង្គ្រោះជាតិឯកឧត្តម កឹម សុខា នាំសហការីខ្លួនទៅអរគុណម្ចាស់ឆ្នោតមុនគេ ក្រោយពីបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃទី ៤ មិថុនា។
ឯកឧត្តម កឹម សុខា បានប្រកាសប្រាប់អ្នកគាំទ្រនូវលទ្ធផលក្រៅផ្លូវការថា ក្នុងចំណោមឃុំទាំង ១៦ នៅក្នុងស្រុកស្អាង ខេត្តកណ្តាល គណបក្សសង្គ្រោះជាតិ ឈ្នះអាសនៈមេឃុំចំនួន ១២ ។ ក្រៅពីអរគុណដល់ប្រជាពលរដ្ឋដែលបោះឆ្នោតជូនគណបក្សសង្គ្រោះជាតិ ឯកឧត្តម កឹម សុខា ក៏ប្រាប់អ្នកគាំទ្រ មិនឲ្យចំអក ឬចាត់ទុកអ្នកចាញ់ឆ្នោតជាសត្រូវនោះឡើយ តែផ្ទុយទៅវិញត្រូវលើកទឹកចិត្តអ្នកចាញ់ កុំឲ្យបាក់ទឹកចិត្ត។
ជាមួយគ្នាឯកឧត្តម កឹម សុខា ប្រាប់បេក្ខជនគណបក្សសង្គ្រោះជាតិ ដែលជាប់ឆ្នោត ត្រូវបម្រើប្រជាពលរដ្ឋឲ្យបានល្អ ដោយចៀសវាងប្រព្រឹត្តអំពើពុករលួយ។
បន្ទាប់ពីថ្លែងសារនយោបាយប្រមាណ ២០ នាទី ទៅកាន់អ្នកគាំទ្រនៅស្រុកស្អាង ឯកឧត្តម កឹម សុខា ក៏បន្តដំណើរទៅជួបអ្នកគាំទ្រនៅស្រុកកោះធំ មួយទៀត ដែលជាទីគណបក្សនេះទទួលអាសនៈមេឃុំច្រើនជាងគណបក្សកាន់អំណាចដែរ៕
Tag:
កឹម សុខា
បោះឆ្នោតឃុំ- សង្កាត់
© រក្សាសិទ្ធិដោយ thmeythmey.com