អន្តរជាតិ
កាតា មិនចុះញ៉មសម្ពាធរបស់រដ្ឋអារ៉ាប់ផ្សេងទៀតឡើយ ទោះត្រូវហ៊ុមព័ទ្ធជុំជិតក្ដី
រដ្ឋមន្ត្រីការបរទេសកាតា Sheikh Mohammed bin Abdulrahman Al Thani (រូបភាព Al Jazeera Forum)
×![]()
ដោយ: តន ចាន់រិទ្ធារ៉ា
រដ្ឋមន្ត្រីការបរទេសកាតា Sheikh Mohammed bin Abdulrahman Al Thani បានលើកឡើងថា ការផ្ដាច់ទំនាក់ទំនងទាំងអស់លើកាតាពីសំណាក់រដ្ឋឈូងសមុទ្រដូចជាបារ៉ែន អារ៉ាប៊ីសាអូឌីត និងអារ៉ាប់រួមអេមីរ៉ាតជាដើម នឹងមិនអាចធ្វើឲ្យកាតាចុះញ៉មបានឡើយ។ ជាមួយការប្ដេជ្ញាមិនផ្លាស់ប្ដូរនយោបាយការបរទេសរបស់ខ្លួន រដ្ឋមន្ត្រីការបរទេសកាតាបញ្ជាក់ថា កាតាអាចរស់នៅបានដោយខ្លួនឯង ហើយកាតាក៏មានអ៊ីរ៉ង់ចាំជួយដែរ។
ជម្លោះការទូតនៅឈូងសមុទ្រពែរ្ស នៅមិនទាន់បញ្ចប់នៅឡើយ។ យ៉ាងណាក្ដី ប្រមុខការទូតកាតា Sheikh Mohammed bin Abdulrahman Al Thani ប្រកាសថា សម្ពាធរបស់អារ៉ាប៊ីសាអូឌីត បារ៉ែន, អេហ្ស៊ីប, អារ៉ាប់រួមអេមីរ៉ាត និងយេម៉ែន មិនអាចធ្វើអ្វីកាតាបានឡើយ។ លោក Mohammed bin Abdulrahman ក៏ប្រកាសដែរថា កាតានឹងរក្សានយោបាយការបរទេសរបស់ខ្លួនដដែល ដោយមិនងាករេអ្វីឡើយ។
រដ្ឋមន្ត្រីការបរទេសកាតាបានប្រាប់សារព័ត៌មាន Al Jazeera នៅថ្ងៃទី៨ ខែមិថុនា ថា កាតាមិនចុះញ៉មឡើយ ហើយក៏នឹងមិនចុះញ៉មនយោបាយការបរទេសរបស់ខ្លួនដែរ។ លោកបញ្ជាក់ដូចនេះ ខណៈដែលសមាជិកក្រុមប្រឹក្សាប្រទេសឈូងសមុទ្រ បានផ្ដាច់ទំនាក់ទំនងការទូតជាមួយកាតា ព្រមទាំងបានរឹតត្បិតការធ្វើដំណើរទាំងផ្លូវគោក ផ្លូវទឹក និងផ្លូវអាកាសទៀតផង។ ច្រកផ្លូវគោកតែគត់របស់កាតា ដែលភ្ជាប់ជាមួយអារ៉ាប៊ីសាអូឌីត និងជាច្រកនាំចូលទំនិញដ៏សំខាន់ក៏ត្រូវបានបិទដែរ។
លោក Mohammed bin Abdulrahman ក៏បញ្ជាក់ដែរថា មហាក្សត្រកាតា Sheikh Tamim bin Hamad Al Thani នឹងមិនយាងចេញពីប្រទេសបានដែរ ដ្បិតការធ្វើដំណើរតាមផ្លូវអាកាសត្រូវបានបិទអស់ទៅហើយ។ នេះមានន័យថាមហាក្សត្រកាតាមិនចូលរួមជំនួបផ្សះផ្សានៅសេតវិមាន ដែលស្នើឡើងដោយប្រធានាធិបតីអាមេរិក ដូណាល់ ត្រាំ បានទេ។
ទោះជាមានសម្ពាធខ្លាំងពីរដ្ឋឈូងសមុទ្រផ្សេងទៀតក្ដី ប្រមុខការទូតកាតា ក៏សង្កត់ធ្ងន់ដែរថា បញ្ហានឹងត្រូវដោះស្រាយដោយសន្តិវិធី ដ្បិតកាតាមានការគាំទ្រពីសហគមន៍អន្តរជាតិជាខ្នងបង្អែក។ បើតាមសម្ដីប្រមុខការទូតនេះ កាតានឹងនៅតែអាចចិញ្ចឹមខ្លួនឯងបាន ហើយរដ្ឋាភិបាលនឹងបន្តរក្សាការរស់នៅប្រចាំថ្ងៃរបស់ប្រជាជនឲ្យនៅមានភាពប្រក្រតីដដែល។ ជាមួយគ្នានេះ កាតាកំពុងរង់ចាំការទាមទាររដ្ឋឈូងសមុទ្រដើម្បីបញ្ចប់បញ្ហានេះដែរ។
យ៉ាងណាមិញ រដ្ឋមន្ត្រីការបរទេសអារ៉ាប៊ីសាអូឌីតលោក Adel Al-Jubeir បានប្រាប់ឲ្យកាតាឈប់គាំទ្រក្រុមហាម៉ាស់នៅប៉ាឡេស្ទីន និងក្រុមភាតរភាពមូស្លីមនៅអេហ្ស៊ីប ដែលក្រុមទាំងពីរនេះជាក្រុមភេរវករ មុនពេលចាប់ផ្ដើមភ្ជាប់ទំនាក់ទំនងឡើងវិញ។ ក្រុងដូហា ក៏បានឆ្លើយតបនឹងការចោទប្រកាន់នេះដែរ ដោយប្រកាសថាខ្លួនមិនបានគាំទ្រក្រុមភេរវកម្មជ្រុលនិយមអ្វីឡើយ ហើយថា ការចោទប្រកាន់ទាំងអស់ គឺគ្មានមូលដ្ឋានឡើយ៕
Tag:
កាតា
មជ្ឈិមបូព៌ា
© រក្សាសិទ្ធិដោយ thmeythmey.com
